ތުރުކީވިލާތާއި ސޫރިޔާއަށް އައި ބާރުގަދަ ބިންހެލުންތަކުގައި މަރުވި މީހުންގެ ޢަދަދު 4,300 އަށްވުރެ އިތުރުވެފައިވާއިރު، މި ޢަދަދު އެތައް ގުނައަކަށް އިތުރުވާނެ ކަމަށް ބެލެވޭ ކަމުގައި މީހުން ސަލާމަތްކުރުމުގެ މަސައްކަތުގައި ހަރަކާތްތެރިވާ ފަރާތްތަކުން ބުނެފިއެވެ. ވެއްޓިފައިވާ އެތަކެއް ސަތޭކަ ޢިމާރާތެއްގެ ދަށުގައި ތާށިވެފައިވާ މީހުން ހޯދުމަށް މަސައްކަތް ކުރަމުންދާއިރު، މަރުވެފައިވާ ގިނަ ޢަދަދެއްގެ ބަޔެއްގެ ހަށިތައް ދަނީ ފެންނަމުންނެވެ.
ތުރުކީވިލާތަށް އައި އެންމެ ބާރުގަދަ ބިންހެލުން ރެކޯޑު ކުރެވިފައި ވަނީ ރިކްޓަރ މިންގަނޑުން 7.8 ގައެވެ. އެއަށްފަހު، 7.6 ގެ ބާރުމިނުގައި އިތުރު ބިންހެލުމަކާއި، ގިނަ ލޮޅުންތަކެއް އެ ސަރަޙައްދަށް އައެވެ. ބިންހެލުންތަކުގައި އެ ދެ ޤައުމުގައި 5,600 އަށްވުރެ ގިނަ ޢިމާރާތް ވެއްޓިފައިވާއިރު، އެތަކެއް ހާސް ބަޔަކު ވަނީ ޢިމާރާތްތަކުގެ ދަށުވެފައެވެ. ވެއްޓުނު ޢިމާރާތްތަކުގެ ތެރޭގައި އުސްކޮށް ބިނާކޮށްފައިވާ ޢިމާރާތްތައް ވެސް ހިމެނެއެވެ.
ޢިމާރާތްތަކުގެ ދަށުވެފައިވާ މީހުން ހޯދައި، ސަލާމަތް ކުރުމަށް ދެ ޤައުމުގައި އޮފިޝަލުންނާއި ޢާންމުން ގުޅިގެން ދަނީ މަސައްކަތް ކުރަމުންނެވެ. މި ހާދިސާގައި ހާލުގައި ޖެހިފައިވާ އެތަކެއް ހާސް ބަޔަކަށް އިންސާނީ އެހީ ފޯރުކޮށްދިނުމަށް ދެ ޤައުމުން ވެސް ދަނީ މަސައްކަތް ކުރަމުންނެވެ. އަދި، ބައެއް ޤައުމުތަކުން ދަނީ އެ ދެ ޤައުމަށް އެހީގެ ސާމާނު ފޮނުވަން ތައްޔާރުވަމުންނެވެ.
ބިންހެލުމުގައި ތުރުކީވިލާތުގައި މަރުވި މީހުންގެ ޢަދަދު 2,921 އަށް އަރާފައިވާ ކަމުގައި އެ ޤައުމުގެ އެހީއާ ބެހޭ އޭޖެންސީ (އޭ.އެފް.އޭ.ޑީ)އިން ބުނެއެވެ. އަދި، ސޫރިޔާގައި 1,444 މީހުން ވަނީ މަރުވެފައެވެ. ޢިމާރާތްތަކުގެ ދަށުން މަރުވެފައިވާ އިތުރު މީހުންގެ ހަށިތައް ފެންނަމުންދާއިރު، މި ހާދިސާތަކުގައި މަރުވި މީހުންގެ ޢަދަދު 20,000 އަށްވުރެ މައްޗަށް އަރާނެ ކަމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން އަންދާޒާ ކުރެއެވެ.
ބިންހެލުމުގައި އެންމެ ބޮޑަށް ގެއްލުންވެފައި ވަނީ ތުރުކީވިލާތުގެ ކަހްރަމަންމަރާސްއާއި ގަޒިއެންޓެޕްއާއި އެ ދެ ރަށުގެ މެދުގައިވާ ސަރަޙައްދަށެވެ. ތުރުކީވިލާތުގެ ރަށެއް ކަމުގައިވާ ގައިއެންޓެޕް ކައިރިއަށް އައި މި ބިންހެލުމުގެ އަސަރު އަވަށްޓެރި ސައިޕްރަސްއާއި ލުބުނާނަށް ވެސް ކޮށްފައިވެއެވެ. އަދި، ފުރަތަމަ ބިންހެލުމުގެ ލޮޅުންތައް ގްރީންލެންޑަށް ވެސް ފޯރިއެވެ. މި ބިންހެލުން އައިސްފައި ވަނީ ބިމުގެ ފަށަލައަށްވުރެ 17.9 ކިލޯމީޓަރު އަޑިއަށް ކަމުގައި ޔޫ.އެސް. ޖިޔޮލޮޖިކަލް ސަރވޭއިން ބުނެއެވެ.
ގަޒިއެންޓެޕްއަކީ ދެ މިލިޔަނަށްވުރެ ގިނަ މީހުން ދިރިއުޅޭ ސަރަޙައްދެކެވެ. ބިންހެލުމާ ގުޅިގެން އަނިޔާވި މީހުންގެ ޢަދަދު 14,000 އަށްވުރެ އިތުރުވެފައިވާ ކަމުގައި ތުރުކީވިލާތުން ބުނެއެވެ. މީގެ ތެރެއިން ގިނަ ބަޔަކަށް ހޮސްޕިޓަލުތަކުގައި ދަނީ ފަރުވާ ދެމުންނެވެ. ސޫރިޔާގައި އަނިޔާވެފައިވާ މީހުންގެ ޢަދަދު 3,411 އަށް އަރާ ކަމުގައި އެ ޤައުމުން ބުނެއެވެ. އާދަޔާޚިލާފަށް ފިނިހޫނުމިން ދަށަށް ދިޔުމާއި، ބޯކޮށް ވާރޭވެހުމުގެ ސަބަބުން، މީހުން ސަލާމަތްކުރުމުގެ މަސައްކަތަށް ދަނީ ހުރަސްއެޅެމުންނެވެ.
މި ބިންހެލުމަކީ ތާރީޚީ ކާރިސާއެއް ކަމުގައި ތުރުކީވިލާތުގެ ރައީސް ރަޖަބް ތައްޔިބް އުރުދުޣާން ސިފަކުރެއްވިއެވެ. 1999 ވަނަ އަހަރު ވެރިރަށް އިސްތަންބޫލްގެ އިރުމަތީގައި އޮންނަ މަރްމަރާ ކަނޑުގެ ސަރަޙައްދަށް އައި ބާރުގަދަ ބިންހެލުމެއްގައި 17,000 އަށްވުރެ ގިނަ މީހުން މަރުވިއެވެ.