ބ.ކެޔޮދޫއިން ވެލާތަކެއް ހިފައި، އެ ފެޅި މައްސަލާގައި ހަރަކާތްތެރިވި 5 މީހުން ހައްޔަރުނުކޮށް, ބަޔާން ނެގުމަށްފަހު ދޫކޮށްލާފައިވާކަމަށް އެންވަޔަރަމަންޓް ޕްރޮޓެކްޝަން އެޖެންސީ، އިޕީއޭއިން ބުނެފިއެވެ.
މިމަހު ތިން ވަނަ ދުވަހު ފުލުހުން ވަނީ 6 ވެލާ ކަތިލުމުގައި ބައިވެރިވި ފަސް މީހުންގެ ގްރޫޕެއް ކެންދޫ ޕޮލިސް ސްޓޭޝަންގެ ފުލުހުން ވަނީ އަތުލައިގެންފައެވެ. އަދި އެމީހުން އަތުލައިގަތީ ވެލާ މަސް ކައްކާ, ފުޅާ ދާއިރާއެއްގައި ޕްރޮސެސް ކުރުމުގެ މަސައްކަތް ކުރަމުން ދަނިކޮށް ކަމަށް މައުލޫމާތު ލިބިފައިވެއެވެ.
އީޕީއޭއިން ބުނީ އެ މައްސަލާގައި ޝާމިލުވާ 5 މީހުން ބަޔާން ނެގުމަށްފަހު ދޫކޮށްލާފައިވަނީ ގާނޫނީ މަރުހަލާ ކުރިއަށް ދާތީ, އިތުރު ފިޔަވަޅެއް އެޅެންދެންކަމަށެވެ.
އީޕީއޭއިން ބުނީ, އެ ހާދިސާއާ ގުޅޭ ހެއްކާއި, އެހެނިހެން މައުލޫމާތު ހޯދުމުގައި ފުލުހުންނަށް އެހީތެރިވެދިނުމުގެ ގޮތުން އެ އެޖެންސީގެ އިތުރުން, ބ. އަތޮޅު ބައޮސްފެއާ ރިޒާވްގެ މުވައްޒަފުންވެސް އެ ސަރަހައްދަށް ގޮސް ހަރަކާތްތެރިވެފައިވާކަމަށެވެ.
ދިވެހިރާއްޖޭގެ ވެލާ ކަހަނބަކީ ނެތިދިޔުމުގެ ނުރައްކަލުގައިވާ ދިރުމެއްކަމަށް އިންޓަނޭޝަނަލް ޔޫނިއަން ފޯރ ކޮންޒަވޭޝަން އޮފް ނޭޗާސް (އައި.ޔޫ.ސީ.އެން(އިން ކަނޑައަޅާފައިވާ ދިރުމެކެވެ. ވެލާކަހަނބު ޙިމާޔަތްކޮށްފައިވަނީ "ގުދުރަތީ ގޮތުގައި ނުވަތަ ތަބައީ ގޮތުގައި ރައްކާތެރިކުރާ ދިރޭތަކެއްޗާބެހޭ ޤަވާއިދު" އަދި ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ 4 ވަނަ މާއްދާގެދަށުންނެވެ.
އެގޮތުން ވެލާ ބިސް ވިއްކުން 1996ވަނަ އަހަރު ވަނީ މަނާކޮށްފައެވެ. އަދި 2006ވަނަ އަހަރު ވެލާކަހަނބު އެންމެ ގިނައިން ބިސްއަޅާކަމަށް ފާހަގަކުރެވިފައިވާ 14 ރަށަކުން ބިސްނެގުން ޤާނޫނީގޮތުން މަނާކުރިއެވެ. އަދި 2016 ވަނައަހަރު ވެލާ ކަހަނބާއި އޭގެ ބިސްތައް ފުރިހަމައަށް ހިމާޔަތްކުރިއެވެ.