ތުރުކީވިލާތާއި ސޫރިޔާއަށް ބާރުގަދަ ބިންހެލުމެއް އައިސް 300 އަށްވުރެ ގިނަ މީހުން މަރުވެއްޖެއެވެ. ތުރުކީވިލާތުގެ ރަށެއް ކަމުގައިވާ ގައިއެންޓެޕް ކައިރިއަށް އައި މި ބިންހެލުމުގެ އަސަރު އަވަށްޓެރި ސައިޕްރަސްއާއި ލުބުނާނަށް ވެސް ކޮށްފައިވެއެވެ. ބިންހެލުމުގެ ބާރުމިން ރެކޯޑް ކުރެވިފައި ވަނީ ރިކްޓަރ މިންގަނޑުން 7.8 ގައެވެ.
މި ބިންހެލުމާ ގުޅިގެން ތުރުކީވިލާތާއި ސޫރިޔާގެ ގިނަ ޢިމާރާތްތަކެއް ވެއްޓި، ބޮޑެތި ގެއްލުންތަކެއް ލިބިފައިވާއިރު، ސޫރިޔާގައި މަރުވެފައިވާ މީހުންގެ ޢަދަދު 230 އަށްވުރެ މައްޗަށް އަރާފައިވާ ކަމުގައި އެ ޤައުމުން ބުނެއެވެ. އަދި، އިތުރު 600 އަށްވުރެ ގިނަ މީހުންނަށް އަނިޔާވެފައިވާ ކަމުގައި ވެސް އެ ޤައުމުގެ އޮފިޝަލުން ވިދާޅުއެވެ.
މި ބިންހެލުމާ ގުޅިގެން ތުރުކީވިލާތުގައި މަރުވި މީހުންގެ ޢަދަދު މިހާރު ވަނީ 76 އަށްވުރެ މައްޗަށް އަރާފައެވެ. އެ ޤައުމުގައި ވެސް 440 އަށްވުރެ ގިނަ މީހުންނަށް ބިންހެލުމާ ގުޅިގެން އަނިޔާވިއެވެ. ތުރުކީވިލާތުގައި ބިންހެލުން އައި ސަރަޙައްދުގައި މިހާރު ވަނީ ކުއްލި ހާލަތެއް އިޢުލާނުކޮށްފައެވެ. އަދި، ވެއްޓިފައިވާ ޢިމާރާތްތަކުގެ ދަށުވެފައިވާ މީހުން ސަލާމަތް ކުރުމާއި، ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމުގެ މަސައްކަތް ވަނީ ފަށާފައެވެ.
ބިންހެލުމުގައި ތުރުކީވިލާތުގެ އަށް ޕުރޮވިންސަކަށް ގެއްލުން ލިބިފައިވާއިރު، ސޫރިޔާގެ ޙަމާ، ޙަލަބް އަދި ލަތާކިޔާއަށް ވެސް ވަނީ ބޮޑެތި ގެއްލުންތަކެއް ލިބިފައެވެ. އެ ރަށްތަކުގައި ގިނަ ޢަދަދެއްގެ ޢިމާރާތްތައް ވެއްޓިފައިވާ ކަމުގައި ސޫރިޔާގައި ހަރަކާތްތެރިވާ ވައިޓް ހެލްމެޓްސް ޖަމުޢިއްޔާއިން ބުންޏެވެ. ބިންހެލުމާ ގުޅިގެން ރައީސް ބައްޝާރުލް އަސަދު އޭނާގެ ކެބިނެޓުގެ ކުއްލި ބައްދަލުވުމެއް ބާއްވަވާފައިވާ ކަމުގައި އެ ޤައުމުން ބުނެއެވެ.
ރިކްޓަރ މިންގަނޑުން 7.8 ގެ ބާރުމިނުގެ ބިންހެލުން އައިސްފައި ވަނީ ބޮމުގެ ފަށަލައަށްފަހު 17.9 ކިލޯމީޓަރު އަޑިއަށް ކަމުގައި ޔޫ.އެސް. ޖިޔޮލޮޖިކަލް ސަރވޭއިން ބުނެއެވެ. އަދި، އެ ބިންހެލުމަށް ފަހު 6.7 ގެ ބާރުމިނުގައި އިތުރު ލޮޅުމެއް އައި ކަމުގައި ވެސް އެ އިދާރާއިން ބުނެއެވެ. އަދި، ލޮޅުންތައް މިނެޓަކަށްވުރެ ގިނަ ވަގުތަށް ދެމިގެންދިޔަ ކަމުގައި ވެސް އެ އިދާރާއިން ބުންޏެވެ.
ތުރުކީވިލާތަކީ ބިންހެލުންތައް އެންމެ ޢާންމު އެއް ހިސާބުގައި އޮންނަ ޤައުމެކެވެ. 1999 ވަނަ އަހަރު އެ ޤައުމަށް އައި ރިކްޓަރ މިންގަނޑުން 7.6ގެ ބާރުމިނުގެ ބިންހެލުމެއްގައި 17,000 އަށްވުރެ ގިނަ މީހުން މަރުވިއެވެ. އަދި، 2011 ވަނަ އަހަރު އައި ބިންހެލުމެއްގައި 500 އަށްވުރެ ގިނަ މީހުން ވަނީ މަރުވެފައެވެ.