ސްވިޓްޒަލޭންޑްގައި ބާއްވާ ފެސްޕޯ ފެއަރގައި އެމްއެމްޕީއާރުސީއާއި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ބައިވެރިވެއްޖެއެވެ.
މި ފެއަރގައި އެމްއެމްޕީއާރުސީން ރާއްޖޭގެ ގުދުރަތީ ރީތިކަމާއި ލަގްޒަރީ ފަތުރުވެރިކަމުގެ ހިދުމަތްތަކާއި ޕްރޮޑަކްޓްތައް މާކެޓްކުރާނެއެވެ.
މި ފެއަރ ކުރިއަށްދާނީ މިމަހުގެ 2 އިން 5 އަކަށެވެ. މި ފެއަރ ކުރިއަށްދަނީ ސްވިޓްޒަލޭންޑްގެ ޒޫރިކްގައެވެ. މި ހަރަކާތަކީ ދުނިޔޭގެ އެކި ކަންކޮޅުތަކުން 600 އަށް ވުރެ ގިނަ އެގްޒިބިޓަރުން ބައިވެރިވާ ހަރަކާތެކެވެ. މި ހަރަކާތަށް ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާއި ޚިދުމަތް ލިބިގަންނަ ފަރާތްތަކުން ޒިޔާރަތްކުރާނެއެވެ.
މި ފެއަރއަށް 60،000 ފަރާތުން ޒިޔާރަތްކުރާނެކަމަށް ވަނީ އަންދާޒާކޮށްފައެވެ. މި ހަރަކާތުގައި އެމްއެމްޕީއާރުސީ އާއެކު އިންޑަސްޓްރީގެ 12 ޕާޓްނަރުން ބައިވެރިވެއެވެ. އެމްއެމްޕީއާރުސީން ބުނީ އަމާޒަކީ މި ހަރަކާތުގެ ޒަރިއްޔާއިން ސްވިސް މާކެޓުގައި ރާއްޖޭއާ މެދު ހޭލުންތެރިކަން އިތުރުކޮށް، ޓްރެވަލް ޓްރޭޑް އާއި މި މާކެޓުން ރާއްޖެއަށް ދަތުރުކުރަން ބޭނުންވެފައި ތިބި ފަރާތްތަކަށް ރާއްޖެއިން ލިބެންހުރި ފަތުރުވެރިކަމުގެ ފުރުސަތުތަކާއި ބެހޭ އެންމެ ފަހުގެ މައުލޫމާތު ފޯރުކޮށްދިނުންކަމަށެވެ. މިފަދަ އިވެންޓްތަކަކީ ރާއްޖެއިން ލިބެން ހުރި ފުރުސަތުތަކާއި ރާއްޖޭގެ ނަލަކަމާއި ސަގާފަތާއި މެހެމާންދާރީ ދުނިޔެއަށް މާކެޓްކުރުމަށް ލިބޭ ރަނުގެ ފުރުސަތެއްކަމަށް އެމްއެމްޕީއާރުސީން ބުނެއެވެ.
ސްވިޓްޒަލޭންޑްއަކީ މިދިޔަ އަހަރު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި 10 މާކެޓުގެ ތެރޭގައި ހިމެނޭ އެއް މާކެޓެވެ. މިދިޔަ އަހަރުގެ ތެރޭގައި ސްވިޓްޒަލޭންޑްއިން ވަނީ ރާއްޖެއަށް 34،737 ފަތުރުވެރިން ޒިޔާރަތްކޮށްފައެވެ.
މި މާކެޓުގައި ރާއްޖޭގެ މަޤުބޫލުކަން ދެމެހެއްޓުމަށް އެމްއެމްޕީއާރުސީއިން ދަނީ ގިނަ ހަރަކާތްތަކެއް ހިންގަމުންނެވެ. މިގޮތުން އެމްއެމްޕީއާރުސީން ސްވިސް މާކެޓުގައި ރާއްޖެ ޕްރޮމޯޓް ކުރުމަށް މި އަހަރުވެސް ފިޒިކަލް ފެއަރތަކުގައި ބައިވެރިވުމުގެ އިތުރުން، މީޑިއާ ފެމިލިއަރައިޒޭޝަން ދަތުރުތަކާއި އިޝްތިހާރުކުރުމެ ކެމްޕޭންތަކާއި ޓްރެވަލް އޮޕަރޭޓަރުންނާ އެކު ޖޮއިންޓް މާކެޓިންގ ކެމްޕޭންތައް ހިންގުމުގެ އިތުރުން ޑެސްޓިނޭޝަން އީ-ލާނިންގ ޕްރޮގްރާމްއެއް ހިންގުމަށް ވަނީ ހަމަޖެހިފައެވެ.