އަތޮޅުތަކުގައި ސަރުކާރުން އަލަށް ތަރައްޤީކުރުމަށް ނިންމާފައިވާ 4 އެއަރޕޯޓަށް ބޭނުންވާ ބިން ހިއްކުމަށް ހުޅުވާލި ފުރުޞަތުގައި، 3ރަށެއްގެ ބިން ހިއްކުމަށް މިހާތަނަށް ބީލަން ލިބިފައިވާކަމަށް ޕްލޭނިން މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރއިން ވިދާޅުވެއްޖެއެވެ.
ފިނޭންސް މިނިސްޓްރީއިން ބިޑަށް ހުޅުވާލީ ހދ.މަކުނުދޫއާއި، ށ.ބިލެއްފައްސާއި ބ.ތުޅާދޫ އަދި ތ.ވިލުފުށީގެ އެއަރޕޯޓްގެ މަސައްކަތަށް ބޭނުންވާ ބިން ހިއްކުމަށެވެ.
ޕްލޭނިން މިނިސްޓްރީއިން ވިދާޅުވީ މި 4 ރަށުގެ ތެރެއިން 3 ރަށެއްގެ ބިން ހިއްކުން ކުރިއަށްގެންދިއުމަށް ޝައުގުވެރިކަން ފާޅުކޮށް 3 ފަރާތަކުން ބީލަން ހުށައަޅާފައިވާކަމަށެވެ. ލިބިފައިވާ ބީލަންތައް ބަލާ، އެކަށީގެންވާ ކުންފުންޏެއް ހޮވުމަށް ކުރިއަށްގެންދާ އިވަލުއޭޝަންގެ މަސައްކަތް ކުރިއަށްގެންދަނީ ފިނޭންސް މިނިސްޓްރީ އަދި ޕްލޭނިން މިނިސްޓްރީއާއި ގުޅިގެންކަމަށްވެސް ޕްލޭނިން މިނިސްޓްރީއިން ވިދާޅުވިއެވެ. ރެސްޓްރިކްޓެޑް ޓެންޑަރިންއަށް ކުރިއަށްގެންދިޔަ މި ބީލަމުގައި، ބީލަން ހުށައެޅޭނީ ކަނޑައެޅޭ ވަކި މިންގަނޑަކަށް ވަކި އަދަދެއްގެ ކުންފުންޏަށެވެ.
ބިން ހިއްކާ ނިމުމާއެކު މި އެއަރޕޯޓްތަކުގެ ޢަމަލީ މަސައްކަތްތައް ވަރަށް އަވަހަށް ފެށިގެންދާނެކަން ސަރުކާރުކަން ހާމަކުރައްވައެވެ. ސަރުކާރުން އަލަށް އެއަރޕޯޓް ތަރައްޤީކުރުމަށް ނިންމާފައިވާ ރަށްތަކަކީ، ސަރަޙައްދުގެ އާބާދީއަށް ބަލައި ވައިގެ ދަތުރުފަތުރު އެންމެ ދަތި ހިސާބުތައް ބަލައިގެން ކަނޑައަޅާފައިވާ ރަށްތަކެވެ.
ބީލަމަށް ހުޅުވާލާފައިވާ މި 4 އެއަރޕޯޓާއެކު ޖުމްލަ 8 އެއަރޕޯޓް މުޅިން އަލަށް ސަރުކާރުން އަންނަނީ ތަރައްޤީކުރަމުންނެވެ.
މީގެތެރެއިން އެންމެ ބާރަށް ކުރިއަށްދަނީ ގދ.ފަރެސްމާތޮޑާ އެއަރޕޯޓްގެ މަސައްކަތެވެ. އެއަރޕޯޓްގެ މައިގަނޑު މަސައްކަތްތައް ނިމި، މިހާރުވަނީ ޚިދުމަތް ފެށުމަށް ތައްޔާރުވެފައެވެ. އަންނަ މަހު ފަރެސްމާތޮޑާ އެއަރޕޯޓަށް ޓެސްޓް ފްލައިޓް ބޭއްވުމަށް ވަނީ ހަމަޖެހިފައެވެ.
މީގެއިތުރުން މަސައްކަތް ކުރިއަށްދަނީ މ.މުލީގައި ތަރައްޤީކުރަމުންދާ މީމު އެއަރޕޯޓްގެއެވެ. އެ އެއަރޕޯޓަށް ބޭނުންވާ ޓާރމިނަލްއާއި ފަޔަރަ ބިލްޑިންގެ މަސައްކަތް ދަނީ ކުރިއަށެވެ. އަދި ރަންވޭގެ މަސައްކަތް ފެށުމަށް ވަނީ ތައްޔާރުވެފައެވެ. މި މަސައްކަތުގު ކޮންޓްރެކްޓަރ އެމްޓީސީސީން ވަނީ، މި އެއަރޕޯޓްގެ މަސައްކަތް ކުރިއަށް އޮތް 3 މަސްތެރޭގައި ނިންމުމަށް މަސައްކަތް ކުރަމުންދާކަމަށް ވިދާޅުވެފައެވެ.
މީގެއިތުރުން ފ.މަގޫދޫ އެއަރޕޯޓާއި، ރ.އަލިފުށީ އެއަރޕޯޓުގެ މަސައްކަތްވެސް މިހާރުވަނީ އެމްޓީސީއާއި ހަވާލުކޮށްފައެވެ. މި މަސައްކަތްތައް މިއަހަރު ނިމޭނެކަމަށް އެ ކުންފުނިން މަޢުލޫމާތުދެއްވައެވެ. އަލަށް ތަރައްޤީކުރާ އެއަރޕޯޓްތައް ތަރައްޤީކުރަނީ އެރަށްރަށުގެ ފަޅުން ބިން ހިއްކައިގެންނެވެ. މި އެއަރޕޯޓްތަކަކީ އެތެރޭގެ އުދުހުންތަކަށް ޚާއްސަކޮށް ތަރައްޤީކުރާ އެއަރޕޯޓްތަކެވެ.
މީގެއިތުރުން ސަރުކާރުން ވަނީ ހދ.ހަނިމާދޫގައި އޮންނަ، ހަނިމާދޫ އިންޓަނޭޝަން އެއަރޕޯޓް ޒަމާނީ ފެންވަރަށް ތަރައްޤީކުރުމުގެ ޢަމަލީ މަސައްކަތްތައްވެސް ފަށްޓަވާފައެވެ.