ޑެންމާކުގައި ވެސް މުޞްޙަފުތަކެއް އަންދައިލާ، އިސްލާމް ދީނާއި މުސްލިމުންނަށް ފުރައްސާރަކޮށްފިއެވެ. މުޞްޙަފުތަކެއްގައި ރޯކޮށްލާ، މުސްލިމުންނަށް ފުރައްސާރަ ކޮށްފައި ވަނީ ހަރުކަށި ފިކުރަށް ތާޢީދުކުރާ ސިޔާސީ ޕާޓީއެއް ކަމުގައިވާ "ހާޑް ލައިން"ގެ އިސްވެރިއެއް ކަމުގައިވާ ރަސްމުސް ޕެލުޑާންއެވެ. ސްވިޑެންއާއި ޑެންމާކަށް ނިސްބަތްވާ ޕެލުޑާންއަކީ މުސްލިމުންނަށް ފުރައްސާރަކުރުމާއި، މުސްލިމުންނާ މެދު ނަފްރަތު އުފެއްދުމުގެ ރެކޯޑެއް އޮންނަ މީހެކެވެ.
ޕެލުޑާން ފުރަތަމަ މުޞްޙަފުގައި ރޯކޮށްލާފައި ވަނީ ޑެންމާކުގެ ވެރިރަށް ކޯޕެންހާގަންގައި ހުންނަ މިސްކިތެއްގެ ކުރިމަތީގައެވެ. އެއަށްފަހު އޭނާ ވަނީ ކޯޕެންހާގަންގައި ހުންނަ ތުރުކީވިލާތުގެ އެމްބަސީ ކުރިމަތީގައި އިތުރު މުޞްޙަފެއްގައި ހުޅުޖަހާފައެވެ. މި އަމަލު ހިންގާފައި ވަނީ، ސްވިޑެން ނޭޓޯއާ ގުޅުމަށް ކުރަމުންދާ މަސައްކަތަށް ތުރުކީވިލާތުން ހުރަސްއަޅާތީ ކަމުގައި އޭނާ ބުނެއެވެ.
މި ހާދިސާއާ ގުޅިގެން މުސްލިމް އުންމަތުން ވަނީ ނުރުހުން ފާޅުކޮށްފައެވެ. އަދި، ތުރުކީވިލާތުން ވަނީ، އެ ޤައުމުގައި ހުންނަ ޑެންމާކުގެ ސަފީރު ހާޒިރުކޮށް، އެ ކަމާ ގުޅޭގޮތުން ކަންބޮޑުވުން ފާޅުކޮށްފައެވެ. މީގެ ހަފުތާއެއްހާ ދުވަސް ކުރިން ޕެލުޑާން ވަނީ ސްވިޑެންގެ ސްޓޮކްހޯމްގައި ހުންނަ ތުރުކީވިލާތުގެ އެމްބަސީ ކައިރީގައި ވެސް މުޞްޙަފެއް އަންދައިލާފައެވެ.
"މިއީ މުސްލިމުންނާ މެދު ނަފްރަތު އުފައްދަން ހިންގާފައިވާ އަމަލެއް. މި ފަދަ އަމަލެއް ހިންގުމުގެ ހުއްދަ ޑެންމާކުގެ ސަރުކާރުން ދިނުމަކީ ކަންބޮޑުވާ ބޮޑު މައްސަލައެއް،" ތުރުކީވިލާތުގެ ޚާރިޖީ ވުޒާރާގެ އިސްވެރިއަކު ވިދާޅުވިއެވެ. މި ކަމާ ގުޅޭގޮތުން ތުރުކީވިލާތުގައި ހުންނަވާ ޑެންމާކުގެ ސަފީރު ލާސް ލޯކީ ރަސްމުސެން ވިދާޅުވީ، ޕެލުޑާންގެ އަމަލުތަކަކީ ޑެންމާކުގެ ސަރުކާރުން ދެކޭގޮތް ނޫން ކަމަށާއި، ޑެންމާކަކީ އެކި ފިކުރުތަކުގެ މީހުން ދިރިއުޅޭ ޤައުމެއް ކަމުގައެވެ.
ނޭޓޯއާ ގުޅުމަށް ސްވިޑެންއިން ކުރަމުންދާ މަސައްކަތަށް ތުރުކީވިލާތުން ހުރަސްއެޅުން ހުއްޓައިނުލައިފި ނަމަ، ކޮންމެ ހުކުރު ދުވަހަކު މުޞްޙަފު އެންދުން ކުރިއަށްގެންދާނެ ކަމުގައި ޕެލުޑާން ވަނީ ބުނެފައެވެ. ސްވިޑެންގެ ސަރުކާރުން ވެސް ވަނީ ޕެލުޑާންގެ އަމަލުތައް ހަރުކަށި އިބާރާތުން ކުށްވެރިކޮށްފައެވެ. ނަމަވެސް، އެ ޤައުމުގެ ރައްޔިތުންގެ ޚިޔާލު ފާޅުކުރުމުގެ މިނިވަންކަމަށް ހުރަސް ނާޅާނެ ކަމަށް އެ ޤައުމުން ބުނެއެވެ.
ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމައާ ގުޅިގެން ސްވިޑެންއާއި ފިންލެންޑުން ވަނީ ނޭޓޯއާ ގުޅުމުގެ މަސައްކަތް ފަށާފައެވެ. ނޭޓޯގެ 30 މެންބަރު ޤައުމުގެ ތެރެއިން އެ ކަމަށް އެއްބަސްނުވާ ހަމައެކަނި ޤައުމުތަކަކީ ހަންގެރީއާއި ތުރުކީވިލާތެވެ. މުޞްޙަފު އެންދި މައްސަލައިގައި ތުރުކީވިލާތުން ވަނީ، ސްވިޑެން ނޭޓޯއާ ގުޅުމަށް އާނބަސް ނުބުނާނެ ކަމަށް ބުނެފައެވެ.
ޢަރަބި ދުނިޔެއިން ސަޢޫދީ ޢަރަބިއްޔާއާއި ޢުރުދުނާއި ކުވައިތުގެ އިތުރުން ދިވެހިރާއްޖެއާއި ޕާކިސްތާނާއި ސޮމާލިޔާއިން ވަނީ ސްވިޑެންގައި މުޞްޙަފު އެންދި މައްސަލަ އެންމެ ހަރުކަށި އިބާރާތުން ކުށްވެރިކޮށްފައެވެ. އަދި، އޮގަނައިޒޭޝަން އޮފް އިސްލާމިކް ކޯޕޮރޭޝަން (އޯ.އައި.ސީ)އާއި ގަލްފް ކޯޕޮރޭޝަން ކައުންސިލް (ޖީ.ސީ.ސީ)އިން ވެސް ވަނީ އެ ކަމާމެދު ނުރުހުން ފާޅުކޮށްފައެވެ.