މި ސަރުކާރުން އެކުލަވާލެއްވި ތަޢުލީމާ ބެހޭ ޤާނޫނާއެކު، އުނގެނުމާއި ގުޅޭ އެތައް ޙައްގެއް ކަށަވަރު ކޮށްދެއްވިއްޖެކަމަށް ރައީސުލްޖުމްހުރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އައްޑޫ ސިޓީ ފޭދޫ ސްކޫލްގެ ރަންޔޫބިލް ފާހަގަކުރުމަށްޓަކައި ބޭއްވި ޖަލްސާގައި ވާހަކަދައްކަވަމުންނެވެ.
މި ޖަލްސާގައި ރައީސް ވަނީ ތަޢުލީމީ ދާއިރާއިން ސަރުކާރުން ހޯއްދަވާފައިވާ ކާމިޔާބީތަކުގެ މައްޗަށް އަލިއަޅުއްވާލައްވާފައެވެ. އެގޮތުން ރާއްޖޭގެ ކޮންމެ އަތޮޅަކީ މަތީ ސާނަވީ ތަޢުލީމު ދޭ މަރުކަޒެއް ހުރި އަތޮޅުތަކަށް ހައްދަވައިދެއްވުމާއި، ދަރިވަރުން މަދުވުމުގެ ސަބަބުން ކިޔަވައި ނުދޭ ރަށްރަށުގައި ސެޓަލައިޓް ސްކޫލިންގެ ޚިދުމަތް މި ސަރުކާރުން ފެއްޓެވުމަކީ، އެއްވެސް ދަރިވަރަކު ތަޢުލީމުން މަހުރޫމު ނުކުރާނެކަމުގެ ހެއްކެއްކަމަށް ރައީސް ވިދާޅުވިއެވެ.
އެންމެ މުހިންމު ކަމެއްގެ ގޮތުގައި ރައީސް ފާހަގަކުރެއްވީ ތައުލީމީ ޤާނުނެއް ވުޖޫދުކޮށް ޢަމަލުކުރަން ފެށުމެވެ. އެގޮތުން އުނގެނުމުގެ ޙައްގު ކަށަވަރުވުމާއެކު ލިބޭ އެންމެ ބޮޑު ކުރިއެރުމަކީ، ސްކޫލުގެ ކިޔެވުން ފުރިހަމަކޮށް ނިކުންނަ ކޮންމެ ދަރިވަރަކީ ފަންނީ މަސައްކަތެރިކަމުގެ ހުނަރު ލިބޭ ދަރިވަރެއްކަން ކަށަވަރުކުރުންކަމަށް ރައީސް ވިދާޅުވިއެވެ. އެ ނިޒާމުން މިހާރުވެސް މުހިންމު މަސައްކަތަކެއް ފެށިފައިވާކަން ރައީސް ފާހަގަކުރެއްވިއެވެ.
ރައީސްގެ ވާހަކަފުޅުގައި، ސަރުކާރުން އެންމެ ބޮޑު އިސްކަމެއް ދެއްވަނީ މަސައްކަތްތެރި ހުނަރުވެރިންތަކެއް، މުޖުތަމަޢުއަށް ނެރުމަށްކަން ފާހަގަކުރައްވާ ވިދާޅުވީ، ސްކޫލް ނިންމާ ކޮންމެ ދަރިވަރަކީ މަސައްކަތެއް ދަސްވެ، އަމިއްލައަށް އާމްދަނީ ހޯދޭނެ ހުނަރެއް ލިބިފައިވާ މީހަކަށް ހެދުމަށް މަސައްކަތް ކުރަމުންދާކަމަށެވެ. އެގޮތުން ފަންނުވެރި ފުދުންތެރި ޒުވާނުންތަކެއް ނެރުމަކީ، މުޅި ޤައުމުން އޭގެ ހެޔޮ ބަދަލު ފެންނާނެ ކަމެއްގެގޮތުގައި ރައީސް ސިފަކުރެއްވިއެވެ.
"ރާއްޖޭގައި ފުރަތަމަ ފަހަރަށް ތަޢުލީމުގެ ޤާނޫނެއް އެކުލަވާލައި ތަންފީޒުކުރަން ފެށީ 2021 ވަނަ އަހަރު. އެ ޤާނޫނު ތަންފީޒުކުރަން ފެށުމާއެކު، ޤާނޫނީ އޮނިގަނޑުގެ ތެރެއިން ކަށަވަރު ނުވެ ހުރި، އުނގެނުމާ ގުޅޭ އެތައް ޙައްޤެއް މިހާރު ކަށަވަރު ކުރެވިއްޖެ." ރައީސް ވިދާޅުވިއެވެ.
މީގެއިތުރުން ސްކޫލްތަކުންދޭ ތަޢުލީމުގެ ފެންވަރު ރަނގަޅުކުރުމަށް މުދައްރިސުން އިތުރުކުރުމާއި، މުދައްރިސުންގެ ތަމްރީނާއި، ހުނަރި އިތުރުކުރުމަށް ގިނަ މަސައްކަތަކެއް ކުރައްވާފައިވާކަމަށްވެސް ރައީސް ވިދާޅުވިއެވެ. އަދި މުދައްރިސުންނާއި ތަޢުލީމީ ނިޒާމުގެ މަސައްކަތެރިންގެ މުސާރަ ބޮޑުކުރުމަކީ، އެތަށް އަހަރުތަކެއްވީ އިންތިޒާރެއްކަމަށާއި، އެކަންވެސް މި ސަރުކާރުން ފުއްދަވައިދެއްވާފައިވާކަމަށް ރައީސް ވިދާޅުވިއެވެ.
" މުދައްރިސުންގެ ފަންނީ ޤާބިލްކަން އިތުރުކުރުމަށް ހިންގި ތަފާތު ޕްރޮގްރާމްތަކުން މިހާތަނަށް 26500 އަށްވުރެ ގިނަ މުވައްޒަފުން ތަމްރީނު ކުރެވިއްޖެ.ރިންސިޕަލުން ތަމްރީނު ކުރުމަށް، މާސްޓަރ އޮފް އެޑިޔުކޭޝަނަލް މެނޭޖްމަންޓްގެ 20 ސްކޮލަރޝިޕް ފުރުޞަތު މިދިޔަ އަހަރު ވަނީ ހުޅުވާލެވިފައި. އެ ފުރުޞަތުގެ ބޭނުން ހިއްޕެވި 18 ޕްރިންސިޕަލުން މިހާރު އަންނަނީ ތަމްރީނުތައް ފުރިހަމަކުރަމުން." ރައީސް ވިދާޅުވިއެވެ.
ރައީސް ވިދާޅުވީ ސްޓޫޑެންޓް ލޯނުގެ އިންޓްރެސްޓް %5 އިން %1 އަށް ކުޑަކުރެއްވީވެސް މި ސަރުކާރުގައިކަމަށެވެ. އަދި ހިލޭ ޑިގްރީ ޕްރޮގްރާމާއި، އެކި ދާއިރާތަކަށް ޒުވާނުން ނެރުމަށް ބޭނުންވާ ތަމްރީންގެ ގިނަ ޕްރޮގްރާމްތަކެއް މިސަރުކާރުން ހިންގައި ތަޢުލީމީ ދާއިރާއަށް ބޮޑު ބަދަލެއް ގެނެސްފައިވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.