އައްޑޫ ސިޓީ ފޭދޫ ސްކޫލަށް ދިމާވެފައިވާ ޖާގައިގެ ދަތިކަން ހައްލުކުރުމުގެ ގޮތުން އައު ސްކޫލެއް އެޅުމަށް ބޭނުންވާ ބިން އެޑިއުކޭޝަން މިނިސްޓްރީއާއި ހަވާލުކޮށްފިއެވެ. ބިން ހަވާލުކޮށްދެއްވީ، ފޭދޫ ސްކޫލަށް 50 އަހަރު ފުރުމުގެ މުނާސަބަތުގައި ބޭއްވި ރަންޔޫބިލް ހަފްލާގެ ތެރެއިންނެވެ.
ފޭދޫ ސްކޫލްގެ ރަންޔޫބިލް ޖަލްސާ ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުއެވެ. ފޭދޫ ސްކޫލްގެ ރަން ޔޫބިލް ފާހަގަކުރުމަށް ބޭއްވި ޖަލްސާގައި ވަނީ ފޭދޫ ސްކޫލް "ރަންޔޫބިލް ހަނދާނީ ފިލާ" ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އަދި އެޑިއުކޭޝަން މިނިސްޓަރ ޑރ.އައިޝަތު އަލީއަށް އަރުވާފައެވެ.
ފޭދޫގެ އައު ސްކޫލް ޢިމާރާތް އަޅާ ބިމުގެ ލިޔުން، އެޑިއުކޭޝަން މިނިސްޓްރ ޑރ.އައިޝަތު އަލީއާއި ހަވާލުކޮށްދެއްވީ އައްޑޫ ސިޓީގެ މޭޔަރ ޢަލީ ނިޒާރެވެ.
ފޭދޫ ސްކޫލްގެ އައު ޢިމާރާތް އެޅުމަށް ބިން ދީފައިވަނީ، އެރަށުގެ ހިއްކާފައިވާ ސަރަޙައްދުންނެވެ. ފޭދޫގެ އައު ސްކޫލް ޢިމާރާތްކުރުމަށާއި،އެ ސްކޫލްގެ އުމްރާނީ މަސައްކަތަށް ބޭނުންވާ ފައިސާ ވަނީ މިއަހަރުގެ ބަޖެޓުގައި ހިމަނާފައެވެ.
މިޖަލްސާގައި ވާހަކަފުޅުދައްކަވަމުން މިނިސްޓަރ އޮފް އެޑިއުކޭޝަން ޑރ.އާއިޝަތު ޢަލީ ވިދާޅުވީ، މިދިޔަ އަހަރުގެ މަރިޗް މަހު ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ފޭދުއަށް ކުރެއްވި ދަތުރުފުޅުގައި ރައްޔިތުން އެދުނު އެންމެ މުހިންމު ކަމަކީ ފޭދޫގެ ތަޢުލީމީ ނިޒާމު ހަރުދަނާކުރުމަށް އައު ސްކޫލެއް އަޅައިދިނުމަށްކަމަށެވެ.
މިނިސްޓަރ ވިދާޅުވީ އައު ސްކޫލްގެ މަސައްކަތަށް ބޭނުންވާ ފައިސާ، މިއަހަރުގެ ބަޖެޓުގައި ހިމަނާފައިވާކަމަށެވެ. އަދި މި ސްކޫލް ވެގެންދާނީ، އެއް ދަންފަޅިއަށް ކިޔަވައިދެވޭނެ ވަޞީލަތްތަކާއިއެކު ތަރައްޤީކުރާ ޒަމާނީ ސްކޫލަކަށްކަމަށާއި، މި ސްކޫލްގެ ޢަމަލީ މަސައްކަތް ވަރަށް އަވަހަށް ފަށްޓަވާނެކަމަށެވެ.
President @ibusolih attended the special ceremony to celebrate the golden jubilee of Feydhoo School in Addu City. pic.twitter.com/j5xDax7soz
— The President's Office (@presidencymv) January 13, 2023
"މިސްކޫލަކީ ޖާގަ ތަނަވަސް ސްކޫލަކަށް ވާނެ. ވޯކްޝޮޕްތަކާ، އިތުރު ހަރަކާތްތަކާއި، ނާސްތާ މާލަމާއި ކުޅިވަރާއި ގަސްހެއްދުންފަދަ ހަރާކާތްތައް ހިންގޭނެ ގޮތައް ސްކޫލް ޑިޒައިންކޮށްފައިވަނީ." އެޑިއުކޭޝަން މިނިސްޓަރ ވިދާޅުވިއެވެ.
ރަސްމީ ތަޢުލީމީ ނިޒާމުގެ ތެރެއިން ފޭދޫ ސްކޫލްގައި ކިޔަވައިދޭން ފަށާފައިވަނީ 1972 ވަނަ އަހަރުއެވެ. ފޭދޫ ސްކޫލްގައި މިވަގުތު 581 ދަރިވަރުން ތަޢުލީމު ޙާސިލްކުރަމުންދެއެވެ. އޭގެތެރޭގައި ނުކުޅެދުންތެރިކަން ހުންނަ 37 ދަރިވަރުން ހިމެނެއެވެ. އަދި 70އަށްވުރެ ގިނަ މުދަރިސުން ކިޔަވައިދެމުންދެއެވެ.
ރަންޔޫބިލް ޖަލްސަގައި ވަނީ ސްކޫލަށް 10އަހަރާއި 15އަހަރުގެ މުއްދަތަށް ޚިދުމަތް ކޮށްދެއްވާފައިވާ ފަރާތްތަކަށް ހަނދާނީ ފިލާ އަރުވާފައެވެ.