ކުރީގެ ރައީސް މައުމޫން ޢަބްދުލްޤައްޔޫމް ފަރުވާއަށްފަހު ހޮސްޕިޓަލުން ދޫކޮށްލައިފިއެވެ.
ދަރުމަވަންތަ ހޮސްޕިޓަލުގައި ރައީސް މައުމޫން މިއަދު އެޑްމިޓްކުރެއްވީ ލޭގެ ޕްރެޝަރ ދަށްވެގެންނެވެ. ނަމަވެސް ހާލުކޮޅު ރަނގަޅުކަމަށް ރައީސް މައުމޫން ވިދާޅުވެފައިވެއެވެ. ހޮސްޕިޓަލުގައި އެޑްމިޓްކުރެއްވުމަށްފަހު ބައެއް ޓެސްޓްތައް ހެއްދެވިކަމަށްވެސް އެމަނިކުފާނު ވިދާޅުވިއެވެ.
ހޮސްޕިޓަލުން ފަރުވާ ހޯއްދެވުމަށްފަހު ރައީސް މައުމޫން ކުރެއްވި ޓްވީޓެއްގައި ވިދާޅުވީ، މިހާރު އެމަނިކުފާނު ހުންނެވީ ގެކޮޅުގައިކަމަށެވެ. އެމަނިކުފާނު ވަނީ ހޮސްޕިޓަލުގައި އެޑްމިޓްކުރެއްވުމާއި ގުޅިގެން އާއިލާގެ ބޭފުޅުންނާއި، ރަހްމަތްތެރިންނާއި، އެނޫންވެސް ހެޔޮއެދޭ ހުރިހާ ފަރާތްތަކުން ފޮނުއްވި މެސެޖުތަކަށް ޝުކުރުއަދާކުރައްވާފައެވެ. ޚާއްޞަކޮށް ޑޮކްޓަރުންނާއި ނަރުހުން ބެހެއްޓެވި ގާތްކަމަށް ޝުކުރު އަދާކުރެއްވިއެވެ.
Alhamdu lillah I am back home from the hospital after the doctors gave the all clear. Thank you relatives and friends for your concern and to everyone who sent their best wishes. I particularly thank all doctors and nurses for their excellent care. @igmhmv
— Maumoon Abdul Gayoom (@maumoonagayoom) January 13, 2023
މިހާރު ޢުމުރުފުޅުން 85 އަހަރުފުރިފައިވާ ރައީސް މައުމޫން ވަނީ މީގެ ކުރިންވެސް ބަލި ޙާލަތާއި ގުޅިގެން ހޮސްޕިޓަލުގައި އެޑްމިޓްކުރައްވާފައެވެ. އެގޮތުން ކޯވިޑްގެ އާލާސްކަންފުޅާއި ގުޅިގެން ތިން ހަފްތާ ވަންދެން ދަރުމަވަންތަ ހޮސްޕިޓަލުގައި އެޑްމިޓްކޮށްގެން ފަރުވާ ހޯއްދަވާފައިވެއެވެ.