200 އަށްވުރެ ގިނަ މީހުންނާ އެކު ލުބުނާނުން ފުރައިގެން ދަތުރު ކުރަމުންދިޔަ ބޯޓެއް އެ ޤައުމުގެ އައްސޭރިފަށަށް ފެތި ދެ މީހުން މަރުވެއްޖެއެވެ. ލުބުނާނުގެ ބަނދަރުމަތީ ރަށެއް ކަމުގައިވާ ތަރާބުލުސްއިން ފުރައިގެން ދަތުރު ކުރި ބޯޓު ކަނޑުވެ، ފެތިފައި ވަނީ އެ ޤައުމުގެ އިރުމަތީ އައްސޭރިފަށުގެ ސަރަޙައްދަށެވެ. ބޯޓުގައި ދަތުރުކުރި މީހުންގެ ތެރެއިން 200 އެއްހާ މީހުން ވަނީ ސަލާމަތްކޮށްފައެވެ.
ފެތުނު ބޯޓުގައި ތިބީ ލުބުނާނަށް ކުރިމަތިވެފައިވާ އިޤުތިޞާދީ ކާރިސާއިން ސަލާމަތްވުމަށް، ވިލާތުގެ ޤައުމުތަކަށް ހިޖުރަކުރަން މަސައްކަތް ކުރި މީހުންނެވެ. މީގެ ތެރޭގައި ގިނައީ ސޫރިޔާއިން ލުބުނާނަށް ހިޖުރަކޮށްފައިވާ ރެފިޔުޖީންނެވެ. މީގެ އިތުރުން، ލުބުނާނުގެ 50 އަށްވުރެ ގިނަ މީހުން ވެސް ބޯޓުގައި ތިބި ކަމުގައި ލުބުނާނުގެ އަސްކަރިއްޔާއިން ބުނެއެވެ.
ފެތުނު ބޯޓުގައި ތިބި މީހުން ސަލާމަތް ކޮށްފައި ވަނީ ލުބުނާނުގެ އަސްކަރީ ތިން މަނަވަރަކާއި، އެ ޤައުމުގައި ހަރަކާތްތެރިވާ އ.ދ.ގެ މިޝަންގެ އުޅަނދަކުން ކުރި މަސައްކަތުންނެވެ. މި އުޅަނދުތައް އެ ސަރަޙައްދަށް ގޮސްފައި ވަނީ، ޤަވާޢިދާ ޚިލާފަށް ފުރަން އުޅުނު އުޅަނދު ހުއްޓުވުމުގެ ބޭނުމުގައެވެ. އ.ދ.ގެ މިޝަންއިން ބުނީ، ތަރާބުލުސްއިން ފުރި ބޯޓެއް ހާލުގައި ޖެހުމުން އެހީތެރިކަން ފޯރުކޮށްދިނުމަށް ހަރަކާތްތެރިވެފައިވާ ކަމުގައެވެ.
ސޫރިޔާގެ ދާޚިލީ ހަނގުރާމައިން ސަލާމަތްވުމަށް ލުބުނާނަށް ހިޖުރަކޮށްފައިވާ މީހުންގެ އަދަދު މިލިޔަނަކަށް ވުރެ މައްޗަށް އަރައެވެ. ނަމަވެސް، ލުބުނާނަށް ވެސް މި ވަގުތު އޮތީ އިޤުތިޞާދީ ކާރިސާއެއް ކުރިމަތިވެފައެވެ. އަދި، އެ ކަމުން ސާލަމަތްވުމަށް އެތަކެއް ހާސް ބަޔަކު ދަނީ ޤަވާޢިދާ ޚިލާފަށް ވިލާތުގެ ޤައުމުތަކަށް ހިޖުރަކުރަން މަސައްކަތް ކުރަމުންނެވެ. މީގެ ތެރޭގައި އެ ޤައުމުގައި ދިރިއުޅޭ ފަލަސްޠީނުގެ ރެފިޔުޖީންގެ އިތުރުން ލުބުނާނުގެ ރައްޔިތުން ވެސް ހިމެނެއެވެ.
އެ މީހުން ދަތުރު ކުރުމަށް ބޭނުން ކުރަނީ ބާވެ، ހަލާކުވެފައިވާ އުޅަނދުފަހަރެވެ. ހުސްވި އަހަރުގެ ސެޕްޓެންބަރު މަހު މި ފަދަ ބޯޓެއް ކަނޑުވި ހާދިސާއެއްގައި 100 އަށްވުރެ ގިނަ މީހުން މަރުވިއެވެ. 2021 ޖަނަވަރީން ނޮވެންބަރުގެ ނިޔަލަށް 1,570 އަށްވުރެ ގިނަ މީހުން ލުބުނާން ދޫކޮށް ހިޖުރަކުރަން މަސައްކަތް ކޮށްފައިވާ ކަމުގައި އ.ދ.ގެ ރެފިޔުޖީންނާ ބެހޭ އިދާރާ (ޔޫ.އެން.އެޗް.ސީ.އާރް)އިން ބުނެއެވެ.