އިސްރާއީލުގެ އެންމެ މުހިންމު މަޤުޞަދަކީ އީރާން ނިއުކްލިޔަރ ބާރަކަށް ވިޔަ ނުދިނުން: ނަތަންޔާހޫ
އިސްރާޢީލުގެ އައު ސަރުކާރުގެ އެންމެ މުހިންމު މަޤުޞަދަކަށް ވާނީ އީރާނުން ނިއުކްލިޔަރ ހަތިޔާރު އުފައްދައި، ނިއުކްލިޔަރ ބާރަކަށްވުމަށް ކުރަމުންދާ މަސައްކަތްތަކަށް ހުރަސްއެޅުން ކަމުގައި އެ ޤައުމުގެ ބޮޑުވަޒީރު ކަމުގެ މަޤާމާ ހަވާލުވެވަޑައިގެންނެވި ބެންޖަމިން ނަތަންޔާހޫ ވިދާޅުވެއްޖެއެވެ. މިއީ، އިސްރާޢީލުގެ ބޮޑުވަޒީރު ކަމުގެ މަޤާމާ 73 އަހަރުގެ ނަތަންޔާހޫ ހަވާލުވެވަޑައިގެންނެވި ތިން ވަނަ ފަހަރެވެ.
ނޮވެންބަރު މަހުގެ 1 ވަނަ ދުވަހު ބޭއްވި އިންތިޚާބުގައި ނަތަންޔާހޫއަށް ތާޢީދު ކޮށްފައި ވަނީ ކަނާތު ފިޔައިގެ ހަރުކަށި ޕާޓީތަކެވެ. އޭނާގެ ސަރުކާރު ވެސް އެކުލެވިގެން ވަނީ ޒަޔަނިސްޓު ޕާޓީތަކަށް ނިސްބަތްވާ ހަރުކަށި ފިކުރުގެ ވަޒީރުންގެ މައްޗަށެވެ. ވެރިކަމާ ހަވާލުވެ ވަޑައިގެންނެވުމަށް ފަހު ނަތަންޔާހޫ ވަނީ، ޔަހޫދީން އަތްގަދަ ކޮށްފައިވާ ފަލަސްޠީނުގެ ބިންތަކުގައި ޔަހޫދީން އާބާދު ކުރުމަށް އިތުރު މަސައްކަތްތަކެއް ކުރައްވާނެ ކަމަށް ވިދާޅުވެފައެވެ.
މީގެ ކުރިން ދެ ފަހަރެއްގެ މަތިން ޔަހޫދީ ދަޢުލަތުގެ ބޮޑުވަޒީރު ކަމުގެ މަޤާމު ނަތަންޔާހޫ ފުރުއްވާފައިވެއެވެ. އެއީ، 1996 އިން 1999 އަށާއި، 2009 ވަނަ އަހަރުން ފެށިގެން 2021 އާ ހަމައަށެވެ. އޭނާއަކީ، ޔަހޫދީންގެ ބޮޑުވަޒީރު ކަމުގެ މަޤާމު އެންމެ ގިނަ ދުވަހު ކުރައްވާފައިވާ ބޭފުޅާއެވެ. ނަމަވެސް، އޭނާގެ ވެރިކަމަކީ ކޮރަޕްޝަނާއި ފަސާދައިން ފުރިފައިވާ ވެރިކަމެކެވެ. އަދި، އޭނާގެ މައްޗަށް އުފުލާފައިވާ ކޮރަޕްޝަންގެ ދައުވާއެއް ކޯޓުގައި މިހާރު ވެސް ދަނީ ބަލަމުންނެވެ.
ވެރިކަމުގެ ހުވާ ކުރެއްވުމުގެ ކުރިން ޔަހޫދީންގެ ޤާނޫނު ހަދާ މަޖިލީހުގައި ވާހަކަފުޅު ދައްކަވަމުން ނަތަންޔާހޫ ވިދާޅުވެފައި ވަނީ، އޭނާގެ ސަރުކާރެއްގެ އެންމެ މުހިންމު އަމާޒަކަށް ވާނީ، އިރާނާ ދެކޮޅަށް މަސައްކަތް ކުރުން ކަމުގައެވެ. އީރާނުން ނިއުކްލިޔަރ ހަތިޔާރެއް އުފައްދަން ކުރަމުންދާ މަސައްކަތްތައް ހުއްޓުވުން ކަމުގައެވެ. އަދި، ޔަހޫދީންގެ ދަޢުލަތަކީ، އެ ސަރަޙައްދުގެ އެންމެ ބާރުގަދަ އަސްކަރިއްޔާއަށް ހެދުން ކަމުގައެވެ.
އޭނާ ޔަހޫދީންގެ ވެރިކަމާ ތިންވަނަ ފަހަރަށް ހަވާލުވެ ވަޑައިގަންނަވާފައި މި ވަނީ، ޔަހޫދީންނާއި ޢަރަބީންނާ ދެމެދު ސުލްޙަ ޤާއިމު ކުރުމަށް މަސައްކަތް ކުރަމުންދާ، އެ ދާއިރާއިން ބޮޑެތި ކުރިއެރުންތަކެއް ހޯދަމުންދާ ދަނޑިވަޅެއްގައެވެ. މި ކަމުގައި އިސްނަގައިގެން މަސައްކަތް ކޮށްފައި ވަނީ އެމެރިކާއިންނެވެ. އަދި، ޔަހޫދީންގެ ދަޢުލަތާއި ގިނަ ޢަރަބި ދަޢުލަތްތަކަކާ އެކު އޮތް ގުޅުންތައް މިހާރު ދަނީ ރަނގަޅުވަމުންނެވެ.
އެ ގުޅުންތައް އިތުރަށް ބަދަހިކުރަން މަސައްކަތް ކުރައްވާނެ ކަމުގައި ވެސް ނަތަންޔާހޫ ވިދާޅުވިއެވެ. އަދި، އޭނާގެ ޚާރިޖީ ވަޒީރުގެ ހައިސިއްޔަތުން އެ މަސައްކަތްތައް ވިލަރެސް ކުރައްވާނީ ޔަހޫދީންގެ ކުރީ ސަރުކާރުގައި ޖާސޫސީ އިދާރާގެ ވަޒީރުކަމުގެ މަޤާމު ފުރުއްވާފައިވާ އީލައި ކޯއެންއެވެ.
ނަތަންޔާހޫގެ ވެރިކަން ވައްޓައިލާފައި ވަނީ 2021 ވަނަ އަހަރުގެ ޖޫން މަހުއެވެ. ނަތަންޔާހޫގެ ވެރިކަން ވެއްޓުނީ، އޭނާގެ މައްޗަށް ކޮށްފައިވާ ކޮރަޕްޝަންގެ މައްސަލަތަކުގެ ދައުވާތަކާ ގުޅިގެންނެވެ. އޭނާގެ ވެރިކަން ވައްޓައިލުމުގެ ފަހަތުގައި ތިބީ ވާތު ފިޔައިގެ ޕާޓީތަކާއި ޢަރަބި ޕާޓީތަކުންނެވެ. އިސްކޮށް އުޅުއްވީ ނަފްލާތީ ބެލެޓްއާއި އެންމެ ފަހުން ބޮޑުވަޒީރު ކަމުގެ މަޤާމު ފުރުއްވި ޔައިރު ލަޕިދެވެ.
ފަލަސްޠީނު ރައްޔިތުންގެ ބިންތަކުގައި ޔަހޫދީން އާބާދު ކުރަން މަސައްކަތް ކުރައްވާނެ ކަމަށް ނަތަންޔާހޫ ވިދާޅުވުމާ ގުޅިގެން އޭނާއަށް ވަނީ ބައިނަލްއަޤުވާމީ މުޖުތަމަޢުގެ ފާޑުކިޔުންތަކާ އަމާޒުވެފައެވެ. ޔަހޫދީންގެ ދަޢުލަތުގެ އެންމެ ގާތް އެކުވެރިޔާ ކަމުގައިވާ އެމެރިކާއިން ވެސް މިކަމާ ދެކޮޅެވެ.
އެމެރިކާގެ ޚާރިޖީ ވަޒީރު އެންތަނީ ބްލިކަން ވިދާޅުވީ، ފަލަސްޠީނުގެ ބިންތަކުގައި ޔަހޫދީން އާބާދު ކުރުމަށް އެމެރިކާއިން ދެކޮޅު ހަދާނެ ކަމުގައެވެ. އަދި، ފަލަސްޠީނުގެ އިތުރު ބިންތަކަށް ޔަހޫދީން އަތްގަދަ ކުރުމާ ވެސް ދެކޮޅު ހަދާނެ ކަމުގައި އޭނާ ވިދާޅުވިއެވެ.
އެމެރިކާގެ ރައީސް ޖޯ ބައިޑަން ވިދާޅުވީ، ނަތަންޔާހޫއާ އެކު ގުޅިގެން މަސައްކަތް ކުރައްވަން ތައްޔާރަށް ހުންނެވި ކަމުގައެވެ. ނަމަވެސް، އޭނާގެ އެންމެ މުހިންމު މަޤުޞަދަކީ، މެދުއިރުމަތީގައި ސުލްޙަ ޤާއިމު ކުރުން ކަމުގައެވެ. އަދި، މި ކަން ހާސިލު ކުރަން ޔަހުދީންނާއި ފަލަސްޠީނާ އެކު ގުޅިގެން މަސައްކަތް ކުރައްވާނެ ކަމުގައި ވެސް އޭނާ ވިދާޅުވިއެވެ.
"އެމެރިކާއިން ތާޢީދު ކުރަނީ ދެ ދަޢުލަތެއްގެ ހައްލަށް. ފަލަސްޠީނާއި އިސްރާޢީލުގެ މިނިވަން ދެ ދަޢުލަތް ޤާއިމު ކުރުމަށް. އަދި، އެ ކަމަށް ހުރަސްއެޅޭ ހުރިހާ ފިޔަވަޅުތަކާއި ސިޔާސަތުތަކަށް އެމެރިކާއިން ދެކޮޅު ހަދާނެ،" ވައިޓް ހައުސްއިން ނެރުނު ބަޔާނެއްގައި ބައިޑަން ވިދާޅުވިއެވެ.