ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ބްރެޒިލުގެ ލެޖެންޑް ޕެލޭ އުމުރުން 82 އަހަރުގައި މަރުވެއްޖެއެވެ.
ޕެލޭ މަރުވެފައިވަނީ ސައު ޕައުލޯ ހޮސްޕިޓަލުގައި ކެންސަރު ބައްޔަށް ފަރުވާ ހޯދަމުން ދަނިކޮށެވެ. މީގެ އިތުރުން ގޮހޮރުގެ ބައްޔަކަށާއި، ކިޑްނީގެ ބައްޔަކަށްވެސް ޕެލޭ ގެންދިޔައީ ފަރުވާ ހޯދަމުންނެވެ.
މި މަހުގެ ކުރީކޮޅުވެސް ޕެލޭގެ ހާލު ދަށަށް ގޮސްފައިވާ ކަމަށް މީޑިއާ ރިޕޯޓްތައް ބުންޏެވެ. އެކަމަކު އެ ފަހަރު ސައު ޕައުލޯ ހޮސްޕިޓަލުން ވަނީ ޕެލޭގެ ހާލު ރަނގަޅުވަމުން އަންނަ ކަމަށް ބުނެފައެވެ.
ދުނިޔޭގެ ތައްޓަށް ކުޅޭ ވޯލްޑް ކަޕް ފުޓުބޯޅަ މުބާރާތް ތިން ފަހަރު ކާމިޔާބުކުރި ހަމައެކަނި ކުޅުންތެރިޔަކީ ޕެލޭއެވެ. އޭނާ ވަނީ 1958، 1962 އަދި 1970 ވަނަ އަހަރު މި މުބާރާތް ކާމިޔާބު ކޮށްފައެވެ. މި ތިން މުބާރާތުގައިވެސް ޕެލޭގެ ފަރާތުން މޮޅު ކުޅުމެއް ފެނިގެންދިޔައިރު، ބްރެޒިލްގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ، ވަނީ ގައުމީ ޖާޒީގައި 77 ލަނޑު ކާމިޔާބު ކޮށްދީފައެވެ.
ޕެލޭ ފުޓްބޯޅަ ދަނޑުން ފުރަތަމަ ފެނިގެންދިޔައީ 1956 ވަނަ އަހަރު އޭނާގެ އުމުރުން އެންމެ 16 އަހަރުގައެވެ. 15 އަހަރުގެ ފުޓްބޯޅަ ކެރިއަރުގައި އޭނާ ފާހަގަވެފައިވަނީ އާދަޔާ ޚިލާފު މޮޅު ކުޅުންތެރިއެއްގެ ގޮތުގައެވެ. 1999 ވަނަ އަހަރު އިންޓަނޭޝަލް އޮލިމްޕިކް ކޮމިޓީން ވަނީ ޤަރުނުގެ އެންމެ މޮޅު ކުޅިވަރު ކުޅުންތެރިޔާގެ ލަޤަބު އޭނާއަށް ދީފައެވެ. މީގެ އިތުރުންވެސް އެތައް އެވޯޑްތަކަކާއި ޝަރަފުތަކެއް ޕެލޭއަށް ލިބިފައިވެއެވެ.