ފ. ނިލަންދޫގެ ގޮނޑުދޮށް ޙިމާޔަތްކުރުމުގެ މަޝްރޫޢާއި، ރ. އިނގުރައިދޫ ބަނދަރު ނެރުފައިކަށި ހެދުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމް.ޓީ.ސީ.ސީއާ ހަވާލުކޮށްފިއެވެ.
ފ. ނިލަންދޫގެ ގޮނޑުދޮށް ޙިމާޔަތްކުރުމުގެ މަޝްރޫޢުގެ ދަށުން އެމްޓީސީސީއާއި ހަވާލުކޮށްފައިވަނީ ރަށުގެ ހުޅަނގު ފަރާތުގައި 503 މީޓަރުގެ ބޮޑުހިލައިގެ ރިވެޓްމަންޓަކާއި 20 މީޓަރުގެ ބޮޑުހިލައިގެ ގްރޮއިންސް ޖެހުމާއި، އިރުއުތުރު ފަރާތުގައި 429 މީޓަރުގެ ޖިއޯބޭގް ރިވެޓްމަންޓެއް ޤާއިމް ކުރުމަށެވެ.
29.9 މިލިއަން ރުފިޔާއަށް މި މަސައްކަތް އެމް.ޓީ.ސީ.ސީއާއި ހަވާލުކޮށްފައިވަނީ 8 މަސް ދުވަހުން ނިންމާގޮތަށެވެ.
މީގެއިތުރުން ރ. އިނގުރައިދޫ ބަނދަރުގެ ނެރު ފައިކަށި ހެދުމުގެ މަސައްކަތްވެސް އެމް.ޓީ.ސީ.ސީއާވަނީ ހަވާލުކޮށްފައެވެ. މިމަސައްކަތުގެ ތެރޭގައި ބަނދަރާއި ނެރު ފުންކުރުމާއި، 295 މީޓަރުގެ ބްރޭކް ވޯޓަރ ޖެހުމާއި، ބަނދަރުގައި 2 ނެވިގޭޝަން ލައިޓް ހަރުކުރުން ހިމެނެއެވެ.
މި މަސައްކަތް އެމް.ޓީ.ސީ.ސީއާއި ހަވާލުކޮށްފައިވަނީ 17 މިލިއަނަށްވުރެ ގިނަ ރުފިޔާއަށް 6 މަސް ދުވަހުން މަސައްކަތް ނިންމާގޮތަށެވެ.
މި ދެ ޕްރޮޖެކްޓް އެމް.ޓީ.ސީ.ސީއާއި ހަވާލުކުރުމުގެ އެއްބަސްވުމުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ޝާނާ ފާރޫޤްއެވެ. އެމް.ޓީ.ސީ.ސީގެ ފަރާތުން ސޮއިކުރެއްވީ އެ ކުންފުނީގެ ޗީފް އޮޕަރޭޓިން އޮފިސަރ ޝާހިދު ހުސައިން މޫސާއެވެ.
ސަރުކާރުން ދަނީ ރަށްރަށުގައި ހުރި ޒަމާންވީ ބަނދަރުތައް މަރާމާތުކޮށް ތަރައްޤީކުރަމުންނެވެ. އަދި އާ ބަނދަރުތައްވެސް ދަނީ ތަރައްޤީކުރަމުންނެވެ.