ޔޫކްރެއިނާ ގުޅޭ ސަރަޙައްދީ އިން ކައިރީގައި އޮންނަ ރަޝިޔާގެ ރަށަކަށް ޔޫކްރެއިނުގެ ސިފައިން ދިން ވަރުގަދަ ހަމަލާތަކެއްގައި ޢާންމުންގެ މީހަކު މަރުވެ، ގިނަ އަދަދެއްގެ ބަޔަކު ޒަޚަމުވެއްޖެއެވެ. ޔޫކްރެއިނުގެ ހަމަލާތައް އަމާޒުކޮށްފައި ވަނީ، ބެލްގޮރޮޑް ސަރަޙައްދަށެވެ.
މިއީ، ރަޝިޔާއިން ޔޫކްރެއިނުގެ އަމާޒުތަކަށް ދެމުންދާ ހަމަލާތަކުގެ ބަދަލު ހިފުމުގެ ގޮތުން ޔޫކްރެއިނުން ދީފައިވާ ހަމަލާތަކެއް ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. ރަޝިޔާގެ މިސައިލާއި ޑްރޯން ހަމަލާތައް އަމާޒު ކުރަމުން ދަނީ ޔޫކްރެއިނުގައި ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށެވެ.
ބެލްގޮރޮޑަށް ޔޫކްރެއިނުން ދީފައިވާ ހަމަލާތައް އަމާޒުވެފައި ވަނީ ޢާންމުން ދިރިއުޅޭ ސަރަޙައްދަކަށް ކަމުގައި ބެލްގޮރޮޑްގެ ގަވަރުނަރު ވިޔަޝެސްލާވް ގްލެޑްކޮފް ވިދާޅުވިއެވެ. މީގެ ތެރެއިން އެއް ހަމަލާ އަރާފައި ވަނީ ކުކުޅު ގެންގުޅޭ ދަނޑަކަށް ކަމަށާއި، މި ހާދިސާގައި އެކަކު މަރުވެ، އިތުރު ބަޔަކު ޒަޚަމުވި ކަމުގައި އޭނާ ވިދާޅުވިއެވެ.
ބެލްގޮރޮޑްގެ އެހެން ސަރަޙައްދަކަށް ޔޫކްރެއިނުން ދިން ހަމަލާއެއްގައި އިތުރު އަށް މީހަކު ޒަޚަމުވި ކަމުގައި ވެސް އޭނާ ވިދާޅުވިއެވެ. އެ ހާދިސާގައި ޒަޚަމުވި މީހުންގެ ތެރެއިން ހަތް މީހަކަށް އައި.ސީ.ޔޫ.ގައި ދަނީ ފަރުވާ ދެމުންނެވެ.
ޔޫކްރެއިނުގެ ހަމަލާތަކުގައި ބެލްގޮރޮޑްގެ ބައެއް ޢިމާރާތްތަކާއި އެއްގަމު އުޅަނދު ފަހަރަށް ބޮޑެތި ގެއްލުންތަކެއް ލިބިފައިވާ ކަމުގައި ވެސް ގްލެޑްކޮފް ވިދާޅުވިއެވެ. ފެބުރުވަރީ މަހުގެ 24ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން، ޔޫކްރެއިނުގެ ސިފައިން ދޭތެރެދޭތެރެއިން ދަނީ ބެލްގޮރޮޑް ސަރަޙައްދަށް ހަމަލާ ދެމުންނެވެ.
މި ފަދަ ހަމަލާތަކުން ރައްކާތެރިވުމުގެ ގޮތުން ރަޝިޔާއިން ވަނީ ބެލްގޮރޮޑްގައި ދިފާޢީ ނިޒާމުތައް ވަރުގަދަ ކޮށްފައެވެ. އަދި، އެ ސަރަޙައްދުގައި ފާރުތަކެއް ބިނާކުރަން ނިންމާފައިވާ ކަން ވެސް ގްލެޑްކޮފް އިޢުލާނު ކުރެއްވިއެވެ. ނަމަވެސް، އެ ކަމުގެ އިތުރު ތަފުސީލެއް ނުދެއްވައެވެ.