ގުއަޓެމާލާގައި އޮންނަ ފުއެގޯގެ ނަން ދީފައިވާ އަލިފާން ފަރުބަދަ ގޮވައި، ދިޔާ އަލިފާން ފޭބުމާއި، އަޅިޔާއިން ދުން އަރަން ފެށުމާ ގުޅިގެން އެ ސަރަޙައްދުގެ ވައިގެ ބަނދަރު ބަންދުކުރަން ޖެހިއްޖެއެވެ. ފުއެގޯއަކީ މެދުތެރޭ އެމެރިކާގައި އޮންނަ އެންމެ ހަރަކާތްތެރި އަލިފާން ފަރުބަދައެވެ.
އަލިފާން ފަރުބަދަ ގޮވަން ފެށުމާއެކު ދިޔާ އަލިފާން ފައިބާ، ދެ ކިލޯމީޓަރު އުހަށް ދުން އަރަމުންދާ ކަމުގައި ގުއަޓެމާލާގެ އޮފިޝަލުން ބުނެއެވެ. އަދި، އަލިފާން ފަރުބަދައިން އަރަމުންދާ އަޅި، ފަރުބަދައާ 35 ކިލޯމީޓަރު ދުރުގައި އޮންނަ ގުއަޓެމާލާ ސިޓީއާ ހަމައަށް ފެތުރިފައިވާ ކަމުގައި ވެސް އޮފިޝަލުން ބުނެއެވެ.
މި ހާދިސާއާ ގުޅިގެން ވައިގެ އުދުހުންތައް ވަގުތީ ގޮތުން މެދުކަނޑައިލަން ޖެހުނެއެވެ. އަދި، ގުއަޓެމާލާގެ އެންމެ ބޮޑު ވައިގެ ބަނދަރު ކަމުގައިވާ ލެ އަރޯރާ އިންޓަރނޭޝަނަލް އެއަރޕޯޓް ހުއްޓުމަކަށް އައެވެ. އަދި، އެ ވަގުތު ވައިގެ ބަނދަރަށް ދަތުރު ކުރަމުންދިޔަ ދެ މަތިންދާބޯޓެއް އެހެން އެއަރޕޯޓަކަށް ފޮނުވައިލަން ޖެހުނު ކަމުގައި ވެސް އޮފިޝަލުން ބުނެއެވެ.
އަލިފާން ފަރުބަދައިން އަރަމުންދާ އަޅިއާއި ދުމުގެ ސަބަބުން ގުއަޓެމާލާގެ ދެކުނާއި މެދުތެރޭގެ ރަށްތައް ގުޅައިދޭ މައި ހައިވޭ ވެސް ވަނީ ބަންދުކޮށްފައެވެ. ހައިވޭ ވަގުތީ ގޮތުން ބަންދުކޮށްފައި ވަނީ ރައްކާތެރި ކަމުގެ ފިޔަވަޅެއްގެ ގޮތުން ކަމުގައި އޮފިޝަލުން ބުނެއެވެ.
މެދުތެރޭ އެމެރިކާގައި އޮންނަ އެންމެ ހަރަކާތްތެރި އަލިފާން ފަރުބަދަ ކަމުގައި ފުއެގޯއަކީ ކޮންމެ ހަތަރެއް ނުވަތަ ފަސް އަހަރުން އެއް ފަހަރު ގޮވާ އަލިފާން ފަރުބަދައެކެވެ. މި އަލިފާން ފަރުބަދަ އޮންނަނީ ގުއަޓެމާލާގެ ކުރީގެ ވެރިރަށް އަންތީހުއާއާ 16 ކިލޯމީޓަރު ދުރުގައެވެ. އެއީ ފަތުރުވެރިންގެ މެދުގައި މަޝްހޫރު މަންޒިލެކެވެ.
2018ވަނަ އަހަރު މި އަލިފާން ފަރުބަދަ ގޮވައި، ދިޔާ އަލިފާން ފޭބުމުގެ ސަބަބުން 215 މީހުން މަރުވިއެވެ. އަދި، އެ ސަރަޙައްދުގައި އޮންނަ އަވަށެއް ކަމުގައިވާ ސާން މިގޭލް ލޮސް ލޮތޭސްއަށް ބޮޑެތި ގެއްލުންތަކެއް ލިބުނެވެ. އެ ހާދިސާގައި 200އަށްވުރެ ގިނަ މީހުން ގެއްލުނެވެ.
ގުއަޓެމާލާގައި ފުއެގޯގެ އިތުރުން ހަރަކާތްތެރި އިތުރު ދެ އަލިފާން ފަރުބަދަ އޮވެއެވެ. އެއީ، ހުޅަނގުގައި އޮންނަ ސެންޓިއާހުއީޓޯއާއި ދެކުނުގައި އޮންނަ ޕަކާޔާއެވެ. މީގެ އިތުރުން، އެ ޤައުމުގައި އޮންނަ އަސަތެނާންގޯ އަލިފާން ފަރުބަދައަކީ ހަރަކާތްތެރި ފަރުދަބައެއް ނޫނެވެ. މެދުތެރޭ އެމެރިކާގެ ޤައުމުގައި 100އަށްވުރެ ގިނަ އަލިފާން ފަރުބަދަ އޮވެއެވެ.