ރޭ މާލޭގައި ހިނގި ނުރައްކާތެރި އަލުފާނުގެ ހާދިސާގައި މަރުވި މީހުންގެ އަދަދު 10 އަރައިފިއެވެ. ރޭ ދަންވަރު 00:30 ކަންހާއިރު އަލިފާނުގެ ހާދިސާ ހިނގާފައިވަނީ މާފަންނު އިސްކަންދަރު މަގާއި ކޯރުކެނޑި މަގު ގުޅޭ ހިސާނުގައި ހުންނަ މ. ސެންރޯސް ކިޔާ ގެއެއްގެ އެންމެ ތިރީގައި ހުރި ގަރާޖެއްގައެވެ.
މި ގަރާޖުގައި ރޯވި އަލިފާންގަނޑު ކޮންޓްރޯލްކުރެވުނީ ގާތްގަޑަކަށް ގަޑިއިރެއްހާއިރު ފަހުންނެވެ.
މި ހާދިސާގައި މަރުވި މީހުންގެ އަދަދު 10 އަރާފައިވާއިރު އެކަކަށް އައިޖީއެމްއެޗްގައި އަންނަނީ ފަރުވާދެމުންނެވެ. އެމީހާގެ ހާލު ވަރަށް ސީރިއަސްކަމަށް އައިޖީއެމްއެޗާއި ހަވާލާ ދެއްވާ ފުލުހުން ވިދާޅުވެއެވެ. މިހާތަނަށް އެނގިފައިވާ ގޮތުގައި މި ހާދިސާގައި މަރުވެފައިވަނީ ހުސް ބިދޭސީންނެވެ.
އަލިފާން ނިންވުމުގައި މަސައްކަތް ކުރަމުންދިޔަ ފަޔަރ ފައިޓަރުންނަށް އެގޭގެ ތެރެއިން މަރުވެފައިވާ 8 މީހެއްގެ ހަށިގަނޑު ފެނިފައިވާކަމަށް އެމްއެންޑީއެފުން ވިދާޅުވިއެވެ. އަދި މީގެ ކުޑައިރުކޮޅެއް ކުރިން އިތުރު މީހެއްގެ ހަށިގަނޑުގެ ފެނިފައިވާކަމަށާއި އިތުރު މީހަކުވޭތޯ އަދިވެސް ބަލަމުން އަންނަކަމަށް އެމްއެމްޑީއެފުން ވިދާޅުވެއެވެ. މި އެންމެންގެ ހަށިގަނޑުތައް މި ވަގުތު ބާއްވާފައި އޮތީ ގަލޮޅު ސަހަރާހައި ހުންނަ މޯޗަރީގައެވެ.
އަލިފާން ރޯވި އިމާރާތުން 14 މީހަކު ސަލާމަތްކޮށްގެން ނެރުނުކަމަށް ފުލުހުން ވިދާޅުވެއެވެ.
މ. ސެންރޯސް ތިރީގައި ހުންނަ ގަރާޖުގައޮ ރޯވި އަލިފާންގަންޑު ބޮޑުވެ އެގޭގެ އެހެން ފަންގިފިލާތަކަށްވެސް ވަނީ ފެތުރިފައެވެ. އަދި އެ ސަރަހައްދުގެ ގޭތަކުން މީހުން ހުސްކުރަންވސް ޖެހުނެވެ. މީގެއިތުރުން އެގެއާއި ޖެހިގެން ހުރި ގުދަނަކާއި ފިހާރައަކަށްވެސް ބޮޑެތި ގެއްލުންތަކެއް ވަނީ ލިބިފައެވެ.
އަލިފާން ރޯވީ ވެހިކަލް މަރާމަތުކުރާ ގަރާޖެއްގައެވެ. އެ ސަރަހައްދުގައި އަދިވެސް ސިފައިންގެ ފަޔަރ ފައިޓަރުން ދަނީ ހަރަކާތްތެރިވަމުންނެވެ.