އިތިއޯޕިޔާގެ ޓިގްރޭގައި ކުރަމުންދާ ދާޚިލީ ހަނގުރާމައަށް ނިމުމެއް ގެންނަން ދެ ފަރާތުން އެއްބަސްވެއްޖެއެވެ. މި ކަން އިޢުލާނު ކޮށްފައި ވަނީ މިހާރު ދެކުނު އެފްރިކާގައި ކުރިއަށްދާ ސުލްޙައިގެ މަޝްވަރާތަކުގައެވެ. ހަމަލާތައް ބަދަލުކުރުން ހުއްޓައިލަން ދެ ފަރާތުން އެއްބަސްވެފައި މި ވަނީ ހަނގުރާމަ ފެށިތާ ގާތްގަނޑަކަށް ދެ އަހަރު ފަހުންނެވެ.
މި ހަނގުރާމައިގެ ސަބަބުން އިތިއޯޕިޔާގައި އެތަކެއް ހާސް ބަޔަކު ވަނީ މަރުވެފައެވެ. އަދި، އެތަކެއް މިލިޔަން ރައްޔިތުންނެއް ހާލުގައި ޖެހި، އެ ޤައުމަށް އިންސާނީ މުސީބާތަކާ ކުރިމަތިވެފައެވެ. އިތިއޯޕިޔާގެ ސަރުކާރު ފައުޖުތަކާއި ޓިގްރޭގެ ހަނގުރާމަވެރިން ސުލްޙަކުރުވަން އެއްބަސްވެފައި މި ވަނީ އެފްރިކާގެ އިއްތިހާދު (އޭ.ޔޫ)އިން މެދުވެރިއެއްގެ ދައުރު އަދާ ކޮށްގެންނެވެ.
"މިއީ އިތިއޯޕިޔާއަށް އައު ފެށުމެއް. މި އެއްބަސްވުމުގެ ދަށުން މުޅި އެފްރިކާ ބައްރަށް ވެސް ހަމަޖެހުން ލިބިގެން ދާނެ. ދެ ފަރާތުން ވަނީ ހަމަލާ ބަދަލުކުރުން. ހުއްޓައިލާ، ހަތިޔާރު ބަހައްޓަން އެއްބަސްވެފައި،" މަޝްވަރާތަކުގައި އިސް ދައުރެއް އަދާ ކުރެއްވި އޭ.ޔޫ.ގެ އިސްވެރިއެއް ކަމުގައިވާ ނައިޖީރިޔާގެ ކުރީގެ ރައީސް އޮލުސެގުން އޮބަސަންޖޯ ވިދާޅުވިއެވެ.
އިތިއޯޕިޔާގައި އަމަން ޤާއިމުކޮށް، ޢާންމު ޚިދުމަތްތައް އަލުން ފަށައި، ހާލުގައި ޖެހިފައިވާ އެތަކެއް މިލިޔަން ރައްޔިތުންނަކަށް އިންސާނީ އެހީތެރިކަން ފޯރުކޮށްދޭން ވެސް ދެ ފަރާތުން ވަނީ ގުޅިގެން މަސައްކަތް ކުރަން އެއްބަސްވެފައެވެ. ނަމަވެސް، މިއީ ސުލްޙައަށް މަސައްކަތް ކުރުމުގެ ފެށުން ކަމަށާއި، މި އެއްބަސްވުން ތަންފީޒު ކުރެވޭނީ ދެ ފަރާތުގެ އެއްބާރުލުމާ އެކުގައި ކަމަށް އޮބަސަންޖޯ ވިދާޅުވިއެވެ.
އިތިއޯޕިޔާގެ ބޮޑުވަޒީރު އަބީ އަޙުމަދުގެ ސަރުކާރާއި ޓިގްރޭގެ މިނިވަން ކަމަށް ހަނގުރާމަ ކުރަމުންދާ ޓިގްރޭ ޕީޕަލްސް ލިބެރޭޝަން ފްރޮންޓް (ޓީ.ޕީ.އެފް.އެލް)އާ ދެމެދު ސުލްޙަ ޤާއިމު ކުރަން އެއްބަސްވެފައި މި ވަނީ ޓިގްރޭގެ މަސްރަޙު ހޫނުވެފައިވާ ދަނޑިވަޅެއްގައެވެ. އަދި، ހަމަލާތައް ބަދަލު ކުރުން ހުއްޓައިލުމަށް ހަދާފައިވާ ވަގުތީ އެއްބަސްވުމަކާ ދެ ފަރާތުން ވެސް ޚިލާފުވެފައިވާ ދަނޑިވަޅެއްގައެވެ.
ޓީ.ޕީ.އެފް.އެލް.އިން ވަނީ ސުލްޙަ ޤާއިމު ކުރަން ހަދާފައިވާ އެއްބަސްވުމަށް މަރުޙަބާ ކިޔާފައެވެ. އަދި، ދެ ފަރާތުގެ މެދުގައި ސުލްޙަ ޤާއިމުކޮށް، ޓިގްރޭގެ ރައްޔިތުންގެ ކެކުޅުންތަކަށް ނިމުމެއް ގެންނަން ތައްޔާރަށް ތިބި ކަމުގައި އެ ޖަމާޢަތުން ބުނެއެވެ.
ޓިގްރޭގައި ހަނގުރާމަ ފަށާފައި ވަނީ 2020ވަނަ އަހަރުގެ ނޮވެންބަރު މަހުގެ 4ވަނަ ދުވަހުއެވެ. ހަނގުރާމަ ފެށުނީ އަބީ އަޙުމަދުގެ ފައުޖުތަކުން ޓިގްރޭއަށް ހަމަލާދިނުމާ އެކުއެވެ. ޓިގްރޭއަށް ސަރުކާރުގެ ފައުޖުތަކުން އަރާފައި ވަނީ، އަސްކަރީ މަރުކަޒުތަކަކަށް ޓީ.ޕީ.އެފް.އެލް.އިން ހަމަލާދީފައިވާ ކަމަށް ތުހުމަތުކޮށެވެ.
މަސްރަޙު އިތުރަށް ހޫނުވެފައި ވަނީ އަވަށްޓެރި އެރިޓްރިޔާގެ ފައުޖުތަކުން އިތިއޯޕިޔާގެ ފައުޖުތަކާ ގުޅި ހަނގުރާމައިގައި ބައިވެރިވުމާ ގުޅިގެންނެވެ. މި ހަނގުރާމައިގައި މިހާތަނަށް ބައި މިލިޔަނެއްހާ މީހުން މަރުވެފައިވާ ކަމަށާއި، ދެ މިލިޔަނެއްހާ މީހުން ގެދޮރު ގެއްލި ރެފިޔުޖީންނަށް ވެފައިވާ ކަމުގައި އ.ދ.އިން ބުނެއެވެ.