ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ކުރިއަށްގެންދާ މައިލޯ ޓީ20 ޕްރިމިއާ ކްރިކެޓް ލީގުގައި އައިޒީ އަތުން މާލޭ ސްޕޯޓްސް ކުލަބު މޮޅުވިއިރު، ނިއު ސްޓާ ބަލިކޮށް ވެސްޓް ސްޕޯޓްސް ކުލަބުން ފުރަތަމަ މޮޅު ހޯދައިފިއެވެ.
ހޮނިހިރު ދުވަހުގެ ހެނދުނު ކުޅިވަރު އެކުވެނީ އެއް ނަންބަރު ދަނޑުގައި ކުޅުނު ފުރަތަމަ މެޗު އައިޒީއާ ވާދަކޮށް މާލޭ ސްޕޯޓްސްއިން ކާމިޔާބުކުރީ 74 ލަނޑުންނެވެ.
މި މެޗުގެ ގުރު ދިމާވުމުން މާލޭ ސްޕޯޓްސް އެންމެ ފުރަތަމަ ކުޅެން އަރައި 20 އޯވަރު ހަމަވިއިރު ފަސް ކުޅުންތެރިން ނުބައިވެގެން ވަނީ 177 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 48 ބޯޅައިން 56 ލަނޑު ހެދި އަބްދުﷲ ޝާހިދާއި 30 ބޯޅައިން 55 ލަނޑު އެއްކުރި ފާއިޒް އަޙްމަދެވެ. ޖަވާބުގައި އައިޒީ ކުޅެން އަރައި 20 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދިފައިވަނީ 103 ލަނޑެވެ. އެ ޓީމުން އެންމެ ރަނގަޅަށް ކުޅުނީ 42 ބޯޅައިން 43 ލަނޑު ހެދި އިރަންދަ ބަންޑާރައެވެ.
މި މޮޅާއެކު މާލޭ ސްޕޯޓްސް އޮތީ ތާވަލުގެ ތިންވަނައިގައި ކުޅުނު އަށް މެޗުން ލިބުނު 18 ޕޮއިންޓާއެކުއެވެ. ތާވަލުގެ އެއްވަނައިގައި އޮތް މާލޭ ވެޓެރަންސް އާއި ދެވަނައިގައި އޮތް މިލާން ކްރިކެޓް އެކެޑަމީއަށްވެސް ލިބިފައިވަނީ 18 ޕޮއިންޓެވެ. މީގެ ތެރެއިން މާލޭ ވެޓެރަންސްއިންވެސް އަށް މެޗު ކުޅެފައިވާއިރު، މިލާން ކްރިކެޓް އެކެޑަމީން މިހާތަނަށް ކުޅެފައިވަނީ ހަ މެޗެވެ.
މީގެ އިތުރުން މި މުބާރާތުގައި ބުރާސްފަތި ދުވަހު ކުޅުނު ދެވަނަ މެޗުން ވެސްޓް ސްޕޯޓްސް މޮޅުވީ ނިއު ސްޓާ އަތުން ހަ ވިކެޓުންނެވެ.
މި މެޗުގެ ގުރު ދިމާވުމުން ނިއު ސްޓާ އެންމެ ފުރަތަމަ ކުޅެން އަރައި 20 އޯވަރު ހަމަވިއިރު ހަ ކުޅުންތެރިން ނުބައިވެގެން ހެދިފައިވަނީ 149 ލަނޑެވެ. އެ ޓީމުން އެންމެ ރަނގަޅަށް ކުޅުނީ 35 ބޯޅައިން 40 ލަނޑު ހެދި އާނަންދު އާއި 25 ބޯޅައިން 35 ލަނޑު އެއްކުރި ޝަފީގެވެ. ޖަވާބުގައި ވެސްޓް ސްޕޯޓްސް ކުޅެން އަރައި 18 ވަނަ އޯވަރުގައި ދެ ކުޅުންތެރިން ނުބައިވެގެން ވަނީ 152 ލަނޑު ހަދައި މެޗު ކާމިޔާބުކުރިއެވެ. އެ ޓީމުން އެންމެ ރަނގަޅަށް ކުޅުނީނުބައިނުވެ 41 ބޯޅައިން 55 ލަނޑު ހެދި ދިނޭޝް އާއި 33 ބޯޅައިން 40 ލަނޑު އެއްކުރި ކަސުންއެވެ.
މިއީ މި ފަހަރުގެ މުބާރާތުގައި ވެސްޓް ސްޕޯޓްސްއިން ހޯދި ފުރަތަމަ މޮޅެވެ. އެއާއެކުވެސް އެ ޓީމު އޮތީ ތާވަލުގެ ފުލުގައި ކުޅުނު ނުވަ މެޗުން ލިބުނު ތިން ޕޮއިންޓާއެކުއެވެ. އަދި މި މެޗާއެކު ވެސްޓް ސްޕޯޓްސްއަށް ވަނީ މި ފަހަރުގެ މުބާރާތް ނިމިފައެވެ.
މި މުބާރާތުގައި ހުކުރު ދުވަހުވެސް ދެ މެޗެއް ކުޅޭއިރު، މުބާރާތުގެ ޗެމްޕިއަންކަން ލިބޭނީ ލީގު ބުރަށްފަހު އެއްވަނައިގައި އޮންނަ ޓީމަކަށެވެ. އަދި މި މުބާރާތުން އެންމެ ގަދަ ހަތަރު ޓީމު ޓީ20 ޕްރެޒިޑެންޓްސް ކަޕަށް ކޮލިފައިވާނެއެވެ.