ކުޑަކުދިންނާ ގުޅުންހުރި ޚަބަރާއި މަޢުލޫމާތު ފެތުރުމާއި
އެކުދިންގެ ކަންކަން ބަލަހައްޓަންޖެހޭ ފަރާތްތަކުން ރައްކާތެރިވާންވީ ކަންކަމުގެ
މަޢުލޫމާތު މޯލްޑިވްސް މީޑިއާ ކައުންސިލުން ދެހާހަށްވުރެ ގިނަ ފަރާތަށް ދެއްވައިފިއެވެ.
މިކަން ކުރެއްވީ، ޔުނިސެފްގެ އެހީގައި މީޑިއާ ކައުންސިލުން ހިންގަވާ
ޕްރޮގްރާމެއްގެ ދަށުންނެވެ.
މީޑިއާގައި ޙަރަކާތްތެރިވާ
ފަރާތްތަކާއި ކުޑަކުދިންނަށް ޒިންމާވާންޖެހޭ ފަރާތްތަކުން ތަބާވާންޖެހޭ ހަމަތަކާއި
އަޚުލާޤީ މިންގަޑުތައް އެކަށައަޅައި، މީޑިއާގެ ފެންވަރު މަތިކޮށް ހިފެހެއްޓުމަކީ،
މޯލްޑިވްސް މީޑިއާ ކައުންސިލްގެ މަސްއޫލިއްޔަތުތަކުގެ ތެރެއިން މުހިންމު
އެއްކަމެވެ. ހަމަ އެހެންމެ ޚަބަރާއި މަޢުލޫމާތު ފެތުރުމުގައި ކުޑަކުދިންގެ
ވިސްނުމަށް ނުވަތަ އަޚުލާޤަށް ނޭދެވޭ އަސަރެއް ފޯރާފަދަ ކޮންޓެންޓް ހުރެގެން ނުވާނެކަމަށް
ކުޑަކުދިންގެ ޙައްޤުތައް ރައްކާތެރިކުރުމާބެހޭ ޤާނޫނު ބުނެއެވެ.
މޯލްޑިވްސް މީޑިއާ
ކައުންސިލުން މިހާރު ކުރިޔަށް ގެންދަވާ އެއް ޕްރޮގްރާމަކީ، ޚަބަރާއި މަޢުލޫމާތު
ހާމަކުރުމުގެ އުޞޫލުތަކާއި ކުޑަކުދިންގެ ޙައްޤުތަކާއި ބެހޭގޮތުން އެފަދަ
ކަންކަމުގައި މުހިންމު ދައުރު އަދާކުރާ ފަރާތްތަކަށް މަޢުލޫމާތު ދެއްވުމުގެ
ޕްރޮގްރާމެކެވެ. މި ޕްރޮގްރާމް ހިންގަވަނީ ޔުނިސެފްގެ އެހީގައެވެ. މި ޕްރޮގްރާމްގެ
ދަށުން ޚަބަރާއި މަޢުލޫމާތު ހާމަކުރުމުގެ އުޞޫލުތަކާއި ކުޑަކުދިންގެ ޙައްޤުތަކާ
ބެހޭގޮތުން ދެއްވާ މަޢުލޫމާތުގެ އިތުރަށް އެކައުންސިލުގެ ދައުރާއި
މަސައްކަތްތަކުގެ މަޢުލޫމާތުވެސް ދެއްވަމުން ގެންދަވައެވެ.
މީޑިއާ ކައުންސިލްގެ ރައީސް
މުޙައްމަދު އާސިފް ވިދާޅުވީ މި ޕްރޮގްރާމްގެ ބޭނުމަކީ، ކުޑަކުދިންގެ ޙިމާޔަތާއި
ރައްކާތެރިކަމުގައި މީޑިއާގެ ދައުރަކީ ޒިންމާދާރު ދައުރަކަށް ހެއްދެވުމާއި ކުޑަކުދިންނަށް
ޒިންމާވުމުގައި އެންމެ އިސް ދައުރެއް އަދާކުރާ ފަރާތްތަކުގެ ކިބައިގައި ކަމާބެހޭ
މަޢުލޫމާތު އިތުރުކުރެއްވުންކަމަށެވެ.
މީގެ އިތުރަށް ސްކޫލްތަކުގައި
މީޑިޔާ ކްލަބް އުފެއްދުމާއި ގުޅޭގޮތުންވެސް ވާހަކަދައްކާފައިވާކަމަށް އާސިފް
ވިދާޅުވިއެވެ. މޯލްޑިވްސް މީޑިއާ
ކައުންސިލުން ހާމަކުރައްވާ ގޮތުގައި، އެ ކައުންސިލުން މިހާތަނަށް މި ޕްރޮގްރާމްގެ
ދަށުން 8 އަތޮޅެއްގެ 16 ރަށެއްގައި ވަނީ މަޢުލޫމާތު ދެއްވާފައެވެ. އަދި މިރަށްރަށުން 1,100 އަށްވުރެ ގިނަ ދަރިވަރުންނަށް މަޢުލޫމާތުދެއްވާފައިވެއެވެ.
އަދި ޓީޗަރުންނާއި ބެލެނިވެރިންނާއި
ކައުސިލަރުންނާއި ސިވިލް ސަރވަންޓުން ހިމެނޭގޮތުން ގާތްގަނޑަކަށް 900 ފަރާތަށް ވަނީ މި މަޢުލޫމާތު ދެއްވާފައެވެ. މިޕްރޮގްރާމްގެ ދަށުން
މިހާތަނަށް މަޢުލޫމާތު ދިން ރަށްރަށަކީ، ކ. ހިންމަފުށި، ހދ. ކުޅުދުއްފުށި،
ލ.އަތޮޅުން ފުނަދުއާއި ގަން، ގދ. މަޑަވެލި، ގދ. ތިނަދޫ، ދ. ކުޑަހުވަދޫއެވެ. ގއ.ވިލިނގިލި، ސ. ހިތަދޫ، މަރަދޫ، ހުޅޫދޫ، ފ. ނިލަންދޫ، މަގޫދޫ އަދި ދަރަނބޫދޫ
އެވެ.
އެންމެފަހުން މި ޕްރޮގްރާމްގެ
ހިންގެވީ ފ. އަތޮޅުގައެވެ. އެއީ މި ފެބުރުއަރީ މަހުގެ ތެރޭގައެވެ. މިދިޔަ އަހަރު ފެށި މި ޕްރޮގްރާމްގެ ދަށުން މާލެ އާއި އަތޮޅުތެރޭގައި
މަޢުލޫމާތު ދިނުމުގެ ސެޝަންތައް ކުރިއަށް ގެންދިޔުމަށް ވަނީ ހަމަޖެހިފައެވެ.