މިދިޔަ މަސްތަކުގެ ތެރޭގައި އެފްއޭއެމް ހައުސް ގިނަ ބަޔަކު ބޭނުންކޮށްފައިވާ ކަމަށާއި ސްޓެލްކޯއިން އެ އިދާރާއާ ދޭތެރޭ އެޅި ފިޔަވަޅަކީ ޒިންމާދާރުކަން ކުޑަ އަމަލެއް ކަމަށް އެފްއޭއެމުން ބުނެފިއެވެ.
ކަރަންޓު ބިލަށް ނުދައްކާ އޮތް ޖުމްލަ 6.5 މިލިއަން ރުފިޔާއާއި ގުޅިގެން ސްޓެލްކޯ އިން ވަނީ އާދީއްތަ ދުވަހު އެ އިދާރާއިން ކަރަންޓު ކަނޑާލާފައެވެ. ސްޓެލްކޯއިން ބުނީ 2019 ވަނަ އަހަރުގެ ސެޕްޓެމްބަރު މަހުން ފެށިގެން މިދިޔަ ސެޕްޓެމްބަރު މަހާ ހަމައަށް އެފްއޭއެމުން ކަރަންޓް ބިލް ދައްކާފައި ނުވާ ކަމަށެވެ.
ސްޓެލްކޯ އިން ބުނީ އެ ކުންފުންޏަށް ނުދައްކާ ހުރި ފައިސާ ދެއްކުމަށް އެފްއޭއެމަށް އެކި ފަހަރު މަތިން އަންގާފައިވާ ކަމަށާއި މިގޮތަށް ނިންމީ އެފްއޭއެމުގެ ފަރާތުން މިކަމަށް ފުރިހަމަ އެއްބާރުލުން ނުލިބުމުން ކަމަށެވެ.
މިކަމާ ގުޅިގެން އެފްއޭއެމުން ނެރުނު ނޫސްބަޔާނެއްގައި ބުނެފައިވަނީ ކޮވިޑްގެ ތެރޭގައި 2020 ވަނަ އަހަރު ކޮވިޑް ފެސިލިޓީއެއްގެ ގޮތުގައި ވަނީ މި އިމާރާތް ބޭނުންކޮށްފައިވާ ކަމަށެވެ. އަދި މި ނޫނަސް އެކި ބޭނުންތަކަށް އެތަން ދޫކޮށްފައިވާނެ ކަމަށާއި ސްކައުޓް އެސޯސިއޭޝަންގެ އިދާރާ ހިންގުމަށް މިހާރުވެސް އިމާރާތް ބޭނުންކުރަމުންދާ ކަމަށް ވަނީ ބުނެފައެވެ. އެހެންކަމުން އެ ހުރިހާ ބިލްތަކަށް ވާ ފައިސާގެ އަދަދަށް އެ އިދާރާއިން އެކަނި ޒިންމާ ނަގަން ނުޖެހޭނެ ކަމަށް އެފްއޭއެމުން ބުނެއެވެ.
އެފްއޭއެމުން ބުނީ ސްޓެލްކޯގެ އިހުމާލުން 2019 ވަނަ އަހަރާ ހަމައަށް 1.9 މިލިއަން ރުފިޔާ ކަރަންޓުގެ ހަރަދަށް ބިލް ކޮށްފައިވަނީ ނުބައިކޮށް ކަމަށް އެއްބަސްވެފައިވީ ނަމަވެސް، މިއަދާ ހަމަޔަށްވެސް އެ މައްސަލަ ހައްލުކުރަން ސްޓެލްކޯއިން މަސައްކަތް ނުކުރާ ކަމަށެވެ.
ހާލަތު
ޢެފް.އޭއެމް ބެލުމުގެ ދަށުގައި ހުންނަ ތަންތަން ބޭނުންކުރާމީހުން އަތުން ކަރަންޓަށް، ފެނަށް ނުވަތް އެހެން ކަމަކަށްވިޔަސް ފައިސާ ނެގުމާއި ހޯދުން އެއީ އެފްއޭއެމްގެ ޒިންމާއެއް.