ބައިނަލްއަޤްވާމީ ފަންޑެއްކަމަށްވާ "ގްލޯބަލް ޕަރޓްނަރޝިޕް ފޯރ އެޑިއުކޭޝަން" ޖީޕީއީގައި، އޭޝިއާ އަދި ޕެސިފިކްގެ މެންބަރު ޤައުމުތައް ތަމްސީލްކުރާ ބޯޑު މެންބަރަކަށް ރާއްޖޭގެ އެޑިއުކޭޝަން މިނިސްޓަރ ޑރ.އައިޝަތު އަލީ ހަމަޖައްސަވައިފިއެވެ.
ޖީޕީއީއަކީ މަދުން އާމްދަނީ ލިބޭ ޤައުމުތަކުގެ ތަޢުލީމީ ކަންކަން ކުރިއެރުވުމަށް މާލީ އެހީތެރިކަން ފޯރުކޮށްދޭ ފަންޑެކެވެ. މިއީ ބައިނަލްއަޤްވާމީގޮތުން ހިންގާ މިފަދަ އެންމެ ބޮޑު ފަންޑެވެ. ޖީޕީއީގެ ދަށުން، ދުނިޔޭގެ 70އަށްވުރެ ގިނަ ޤައުމުތަކުގެ، ތަޢުލީމީ ފެންވަރު ރަނގަޅުކުރުމަށް އަންނަނީ އެހީތެރިކަން ފޯރުކޮށްދެމުންނެވެ.
ޖީޕީއީގެ ބޯޑަށް މެންބަރުން އައްޔަންކުރުމަށް ހުޅުވާލި ފުރުޞަތުގައި، ނަން ހުށައެޅި ފަރާތްތަކުގެ ތެރެއިން ރާއްޖޭގެ އެޑިއުކޭޝަން މިނިސްޓަރ ޑރ.އައިޝަތު އަލީ، މި ފަންޑްގެ ބޯޑު މެންބަރަކަށް ހޮވިފައިވަނީ މެންބަރު ހުރިހާ ޤައުމެއްގެ ތާއީދާއެކުއެވެ. ބޯޑު މެންބަރެއްގެ ހައިސިއްޔަތުން، ޖީޕީއީގެ ޕޮލިސީތަކާއި ނިންމުންތައް ނިންމުމާއި އުސޫލުތައް ކަނޑައެޅުމުގައި މިނިސްޓަރ އާއިޝަތު އަލީ މަސައްކަތް ކުރައްވާނެއެވެ.
މި ފަންޑުގެ އެންމެ ބޮޑު މަޤުޞަދަކީ ހެޔޮއެދޭ ފަރާތްތަކާއި، ޖަމިއްޔާތަކާއި ބޮޑެތި އަމިއްލަ ވިޔަފާރިތަކާއި ބޭންކްތައް އަދި ގިނައިން އާމްދަނީ ލިބޭ ޤައުމުތަކުގެ މާލީ އެހީ ހޯދުމެވެ. އަދި އެ ފައިސާ، މަދުން އާމްދަނީ ލިބޭ ޤައުމުތަކުގެ ތަޢުލީމީ ކަންކަން ކުރުމަށް ހޭދަކުރުމެވެ.
އަދި މި ފަންޑަކީ، ދުނިޔޭގެ ޤައުމުތަކުގައި ތަޢުލީމުދިނުމަށް ހުރި ހުރަސްތައް ނަތާލުމަށް ވަކާލާތުކުރާ ބައެކެވެ.