އައްޑޫ އިކުއިޓޯރިއަލް ހޮސްޕިޓަލް އޭއީއެޗްގައި ފުރަތަމަ ފަހަރަށް ލޮލުގެ ފުސް ކެހުމުގެ އޮޕަރޭޝަނެއް ކާމިޔާބުކަމާއެކު ކޮށްފިއެވެ.
މިއީ ލޮލުގެ މިފަދަ ބޮޑު އޮޕަރޭޝަނެއް އެ ހޮސްޕިޓަލްގައި ކުރިއަށްގެންދިޔަ ފުރަތަމަ ފަހަރެވެ. އޮޕަރޭޝަން ކޮށްފައިވަނީ ލޯ ފުސްވެ ލޮލުގެ ފެނުމަށް އަސަރުކޮށްފައިވާ އުމުރުން 88 އަހަރުގެ މީހެއްގެއެވެ.
މި އޮޕަރޭޝަން ކުރުމުގައި ހަރަކާތްތެރިވީ އޭއީއެޗްގައި މަސައްކަތް ކުރާ ޓީމެއް ކަމަށާއި، މިޓީމުގައި ހިމެނޭ ލޮލުގެ ޑޮކްޓަރަކީ މިފަދަ އެތައް ސާޖަރީއެއް ކާމިޔާބުކަމާއެކު ކޮށްފައިވާ ޓީމެކެވެ. ޓީމްގައި އިސްކޮށް މަސައްކަތްކޮށްފައވަނީ އެސޯސިއޭޓް ޕްރޮފެސަރ ޑރ.ޕޫޖާ އެވެ.
ލޮލަށް ފުސް އެރުން (ކެޓަރެކްޓް) އަކީ އާއްމުކޮށް އުމުރުން ދުވަސް ވެފައިވާ މީހުންނަށް ދިމާވާ މައްސަލައެކެވެ. ލޮލުގެ ލެންސަށް ފުސް އެރުމުން އޮޕަރޭޝަންކޮށް އާ ލެންސެއް ނުލައްވާނަމަ ބަލިމީހާގެ ލޮލުގެ ފެނުން މަޑުމަޑުން ގެއްލި ލޯ އަނދިރިވެއެވެ. ގާތްގަޑަކަށް 20 މިނިޓުގެ މިއޮޕަރޭޝަންވަނީ ކާމިޔާބު ކަމަށާއި، ބަލިމީހާގެ ހާލުވެސް ރަނގަޅު ކަމަށް އެހޮސްޕިޓަލުން މަޢުލޫމާތުދެއެވެ.
އާ ޚިދުމަތްތަކާއެކު އައްޑޫ އިކުއިޓޯރިއަލް ހޮސްޕިޓަލްގެ ޚިދުމަތުގެ ފެންވަރު ރަނގަޅުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.
އޭއީއެޗްގައި މީގެކުރިންވެސް ވަނީ މިފަދަ ބޮޑެތި އޮޕަރޭޝަންތަކެއް ކޮށްފައެވެ. އެގޮތުން ކަކުލު ހުޅު ބަދަލުކުރުމުގެ އޮޕަރޭޝަންތަކާއި ނާރުގެ އޮޕަރޭޝަނެއްވެސް ކޮށްފައިވެއެވެ. އަދި އުކުޅުވަޅާއި މައިބަދައިގެ އޮޕަރޭޝަނެއްވެސް ކާމިޔާބުކަމާއެކު ކޮށްފައިވެއެވެ.
ކާޑިއޯ އާއި، ސީޓީ ސްކޭންގެ އިތުރަށް ޚާއްސަ ބަލިތަކާއި ގުޅޭ ޑޮކްޓަރުންގެ ގިނަ ޚިދުމަތް މިހާރު އެހޮސްޕިޓަލުން އަންނަނީ ދެމުންނެވެ. އަދި ލެބޯޓްރީ ޚިދުމަތާއި ޕަބްލިކް ހެލްތުގެ ޚިދުމަތުގެ އިތުރުން އެކްސްރޭއާއި ސްކޭންކުރުމުގެ ޚިދުމަތް ވެސް މިހާރު އެ ހޮސްޕިޓަލުން ލިބެއެވެ.
އައްޑޫ އިކުއިޓޯރިއަލް ހޮސްޕިޓަލްގެ ޚިދުމަތް ފަށާފައިވަނީ 2020ވަނަ އަހަރުގެ ޖެނުއަރީ މަހުގެ 15ވަނަ ދުވަހުއެވެ.