މުޅި ރާއްޖެއަށް އަމާޒުކޮށްގެން ދެމެހެއްޓެނިވި ވިޔަފާރިއެެއް ފެށުމަށް ބޭނުންވާ ތަމްރީން ފޯރުކޮށްދިނުމަށް އިކޮނޮމިކް މިނިސްޓްރީން ހިންގާ ޕްރޮގްރާމް މިއަދު ލ. އަތޮޅުގެ 3 ސަރަހައްދެއްގައި ފަށައިފިއެވެ.
އަންހެން ވިޔަފާރިވެރިނަށް ޙާއްސަކޮށްގެން، ވިމެންއިން ސަސްޓެއިނަބަލް އެންޓަރޕްރެނިއަރޝިޕް (ވައިޒް) ގެ ނަމުގައި ކުރިއަށް ގެންދާ މިތަމްރީން ޕްރޮގްރާމްގައި ލ. އަތޮޅު ފޮނަދޫ، މާމެންދޫ، ހިތަދޫ، ކުނަހަންދޫ، މާވަށު، ގަން، މާބައިދޫ، މުންޑޫ، އިސްދޫ، ކަލައިދޫ އަދި ދަނބިދޫއިން ޖުމްލަ 168 ފަރާތަކުން ބައިވެރިވެފައިވެއެވެ.
އިކޮނޮމިކް މިނިސްޓްރީން ހާމަކުރާގޮތުގައި މި ޕްރޮގްރާމުގެ މަޤްޞަދަކީ ވިޔަފާރިއެއް ފެށުމަށް ޤަސްދުކުރާ އަންހެނުންނަށާއި މިހާރުވެސް ވިޔަފާރި ކުރަމުންދާ ފަރާތްތަކަށް ބޭނުންވާ ފަންނީ ތަމްރީނު ދިނުމާއި، ސަރުކާރު ފަރާތުން އާއްމުންނަށާއި އަދި ވިޔަފާރިކުރާ ފަރާތްތަކަށް ލިބެންހުރި ފުރުސަތުތަކުގެ މަޢުލޫމާތު ފޯރުކޮށްދިނުމެވެ.
މި ޕްރޮގްރާމްގައި ނޭޝަނަލް ސްކިލްސް ޑިވެލޮޕްމަންޓް އޮތޯރިޓީން ފާސްކޮށްފައިވާ ނޭޝަނަލް ސެޓްފިކެޓް 3 އިން އެންޓަރޕްރެނިއަރޝިޕް ސްޓޭންޑާރޑްއަށް ކިޔަވާދެވެނެއެވެ. އަދި ޕްރޮގްރާމު ނިންމާ ބައިވެރިންނަށް ސެޓެފިކެޓްވެސް ލިބިގެންދާނެކަމަށް މިނިސްޓްރީން ވިދާޅުވެއެވެ.
މިފަދަ ޕްރޮގްރާމެއް ހިންގުމުގެ މައިގަނޑު މަޤްޞަދަކީ ކޯވިޑާއި ގުޅިގެން ރާއްޖޭގެ ވަޒީފާގެ ބާޒާރުގައި ހަރަކާތްތެރިވަމުންދާ މީހުންނަށް ކުރިމަތިވި ދަތިތަކުން އަރައިގަތުމަށް އެހީވުންކަމަށް އިކޮނޮމިކް މިނިސްޓްރީން ވިދާޅުވެއެވެ. އެގޮތުން އެފަރާތްތަކަށް މާލީ އެހީ ނުވަތަ ސެލްފް އެމްޕްލޮއިޑް ގްރާންޓް ޕްރޮގްރާމްއަށް އެދުމުގެ ފުރުސަތުވެސް ހިމެނިފައިވާނެކަމަށް މިނިސްޓްރީން ވިދާޅުވެއެވެ.
މިޕްގްރާންޓް ޕްރޮގްރާމްގެ ދަށުން ދިނުމަށް ހަމަޖެހިފައިވާ އެހީގެ 40 އިންސައްތަ ހާއްސަކުރެވިފައިވަނީ އަމިއްލަ މަސައްކަތް ކުރާ އަންހެނުންނަށެވެ. ޕްރޮގްރާމްތަކަށް ކުރިމަތިލުމުގެ ފުރުޞަތު މިހާރު ވަނީ ޖޮބް ސެންޓަރ ޕޯޓަލް މެދުވެރިކޮށް ހުޅުވާލެވިފައެވެ.