ހުޅުމާލޭގައި މަރުވެފައި އޮއްވާ ފެނުނު ހ.ބޮނޑިކަނދޮޅުގޭ މުޙައްމަދު އަޒްހާންގެ ކަށު ނަމާދު މާދަމާ ބޭއްވުމަށް ހަމަޖައްސައިފިއެވެ.
މިދިޔަމަހުގެ 18 ވަނަ ދުވަހުން ފެށިގެން ގެއްލިގެން ހޯދަމުންދިޔަ ހ.ބޮނޑިކަނދޮޅުގޭ މުޙައްމަދު އަޒްހާންގެ ހަށިގަނޑު ފެނުނީ މިމަހުގެ 2 ވަނަ ދުވަހުގެ އިރުއޮއްސެން އުޅެނިކޮށް ހުޅުމާލޭގެ ފުރަތަމަ ފިޔަވަހީގެ ނިރޮޅުމަގުގައި ހުރި ވެޔޮތަކެއްގެ ތެރެއިންނެވެ. އަދި އެ ހަށިގަނޑު ޕޯސްޓްމޯޓަމް ހެދުމަށް އިންޑިއާއަށް ފޮނުވީ މިމަހުގެ 8 ވަނަ ދުވަހެވެ.
ފުލުހުން ވިދާލުވީ ފެނުނީ އަޒްހާންގެ ހަށިގަނޑުކަމަށް ޔަޤީންވެފައިވާތީ އެކަން އާއިލާއަށް އަންގާފައިވާކަމަށެވެ.
އަޒްހާންގެ އާއިލާއިން ވަނީ އަޒްހާންގެ މައްޗަށް ކުރެވޭ ކަށުނަމާދު ހުކުރު ނަމާދަށްފަހު އާސަހަރާ މިސްކިތުގައި ބޭއްވުމަށް ނިންމާފައެވެ.
އަޒްހާންގެ މަރާއި ގުޅޭގޮތުން ފުލުހުން ނެރުނު ބަޔާނެއްގައި ބުނީ އޭނާ މަރާލާފައިވާކަމަށް ބެލެވޭ އެއްވެސް ހެއްކެއް ނުވަތަ ގަރީނާއެއް މިމައްސަލައިގެ ތަހްގީގަށް މިހާތަނަށް ލިބިފައިނުވާކަމަށެވެ.