ސޫރިޔާގެ އުތުރުގައިވާ ތަލް އަބްޔަދުގައި ދިން ޑްރޯން ހަމަލާތަކެއްގައި އައި.އެސް. ޖަމާޢަތަށް ނިސްބަތްވާ އިސް ހަނގުރާމަވެރިއަކު މަރައިލައިފިއެވެ. މި ކަން ހާމަކޮށްފައި ވަނީ ސޫރިޔާގެ މަސްރަޙު ދިރާސާ ކުރާ ޖަމުޢިއްޔާއެއް ކަމުގައިވާ ސީރިޔަން އޮބްޒަވޭޓަރީ ފޯރ ހިޔުމަން ރައިޓްސްއިންނެވެ.
ޑްރޯން ހަމަލާތަކުގެ ފަހަތުގައި ވަނީ ކޮން ފަރާތެއް ކަން އަދި ސާފެއް ނޫނެވެ. ނަމަވެސް، އެމެރިކާއިން ވަނީ ސޫރިޔާގައި ހަރަކާތްތެރިވާ އައި.އެސް. ޖަމާޢަތުގެ ހަނގުރާމަވެރިންގެ އަމާޒުތަކަކަށް ޑްރޯން ހަމަލާތަކެއް ދީފައިވާ ކަމުގައި ބުނެފައެވެ.
ޑްރޯން ހަމަލާތައް އަމާޒުކޮށްފައިވާ މީހާ މަރައިލާފައި ވަނީ ސައިކަލެއްގައި ދުއްވާފައި ދިޔަ ވަގުތުގައި ކަމަށް އެ ޖަމާޢަތުން ބުނެއެވެ. ހަމަލާތަކުގެ މަންޒަރު ފެނުނު މީހަކު ބުނެފައި ވަނީ، ހަމަލާތަކުގައި މަރައިލާފައި ވަނީ އުމުރުން 35 އަހަރުގެ ޢައްމާރް އަލް-ޔަހުޔާ ކަމުގައެވެ. އެއީ، ސޫރިޔާގެ ރައްޔިތެކެވެ. އަދި، އައި.އެސް. ޖަމާޢަތުގެ އިސް މެންބަރެކެވެ.
ސޫރިޔާގެ އިރުއުތުރުގައި ޤާއިމުވެފައި ތިބޭ އެމެރިކާ ސިފައިންގެ މަރުކަޒުން ބުނީ، އެ ޤައުމުގެ އުތުރުގައިވާ ސަރަޙައްދުތަކުގައި ހަރަކާތްތެރިވާ އައި.އެސް. ޖަމާޢަތުގެ ހަނގުރާމަވެރިންނަށް އަމާޒުކޮށް ޑްރޯން ހަމަލާތަކެއް ދީފައިވާ ކަމުގައެވެ. އަދި، މި ހަމަލާތަކުގައި އެ ޖަމާޢަތަށް ނިސްބަތްވާ އިސް ދެ މީހަކު މަރައިލާފައިވާ ކަމުގައި ވެސް އެ މަރުކަޒުން ބުނެއެވެ.
އެމެރިކާ ސިފައިން ސޫރިޔާއަށް އަރާފައި ވަނީ 2014 ވަނަ އަހަރު އައި.އެސް. ޖަމާޢަތާ ހަނގުރާމަ ކުރުމަށް އެކުލަވައިލި ބައިނަލްއަޤުވާމީ ފައުޖުގެ މެންބަރެއްގެ ގޮތުގައެވެ. ސޫރިޔާގެ ސަރަޙައްދުތައް ހިފާފައިވާ އައި.އެސް. ހަނގުރާމަވެރިން ބަލިކޮށް، ފަހަތަށް ޖައްސާފައި ވަނީ 2019 ވަނަ އަހަރުގެ މާރިޗު މަހުގެ ތެރޭގައެވެ.
އެ ޖަމާޢަތުގެ ބަކީ ތިބި ހަނގުރާމަވެރިން ވަނީ ސޫރިޔާގެ ސަހަރާތަކުގެ ސަރަޙައްދުތަކުގައި ފިލާފައެވެ. ނަމަވެސް، އައި.އެސް.ގެ ހަނގުރާމަވެރިން ދަނީ ދޭތެރެދޭތެރެއިން ސޫރިޔާގެ ސިފައިންނާއި ކުރުދީ ހަނގުރާމަވެރިންނާ ދެކޮޅަށް ހަމަލާތައް ދެމުންނެވެ. މީގެ އިތުރުން، އިރާޤުގެ ސަރަޙައްދުތަކުގައި ވެސް އައި.އެސް. ޖަމާޢަތުން ދަނީ ހަނގުރާމަވެރި ހަރަކާތްތައް ހިންގަމުންނެވެ.
އައި.އެސް. ޖަމާޢަތުގެ އެންމެ އިސް ފަސް ލީޑަރުންގެ ތެރޭގައި ހިމެނޭ މީހަކު މަރައިލާފައިވާ ކަން އެމެރިކާއިން ވަނީ ޖުލައި މަހުގެ ތެރޭގައި ހާމަކޮށްފައެވެ. އެއީ، ސޫރިޔާގައި ހަރަކާތްތެރިވާ އެ ޖަމާޢަތުގެ އެންމެ އިސް ލީޑަރު ކަމުގައި އެމެރިކާއިން ބުނެއެވެ.
އަދި، އޭގެ ފަސް މަސް ކުރިން އެމެރިކާއިން ވަނީ ޑްރޯން ހަމަލާތަކެއް ދީ، އައި.އެސް. ޖަމާޢަތުގެ އެންމެ އިސް ލީޑަރު ކަމުގައި ބެލެވޭ އަބޫ އިބްރާހީމް އަލް-ޤުރައިޝީ ވެސް މަރައިލާފައެވެ. އަލް-ޤުރައިޝީ މަރުވީ، އޭނާ ހައްޔަރު ކުރުމަށް ހިންގި އޮޕަރޭޝަނެއްގެ ތެރެއިން، އޭނާ އަމިއްލައަށް ބޮމެއް ގޮއްވައިލުމުގެ ސަބަބުންނެވެ. މި ހާދިސާގައި އޭނާގެ އަނބިމީހާއާއި ދެ ދަރިން ވެސް މަރުވިއެވެ.