ރާއްޖޭގެ ގައުމީ ޔުނިވާސިޓީން ފޮތްތެރިކަން އިތުރުކުރުވުމަށް ތައާރަފު ކުރި ގުރާންޓުގެ ދަށުން ތައްޔާރުކުރި ދެ ފޮތް ނެރެ އެ ޔުނިވާސިޓީގެ ފޮތް މައުރަޒު ހުޅުވައިފިއެވެ.
އެމްއެންޔޫގެ އެ ގްރާންޓުގެ ދަށުން ނެރުނު އެ ދެ ފޮތަކީ ކުޑަކުދިންނަށް ޚާއްސަކޮށް، ތިމާވެށި ޙިމާޔަތްކުރުމުގެ މުހިންމުކަމަށް ބާރު އަޅާ ދެ ފޮތެވެ. އެއީ "ވެލާ ފިނޮޅު" އަދި "ދަރުމަވެރި ރުއް" ކިޔާ ދެފޮތެވެ. މި ދެ ފޮތަކީވެސް ޔުނިވަރސިޓީގެ ލެކްޗަރަރ ލީލާ އަހުމަދު ލިޔުއްވާފައިވާ ދެ ފޮތެވެ.
އެމްއެންޔޫގެ ބުކް ރައިޓިން ގްރާންޓަކީ ފޮތްތެރިކަން އިތުރު ކުރުމަށް ފެށި މަސައްކަތްތަކުގެ ތެރެއިން ދޫކުރަން ކަނޑައެޅި ގްރާންޓެކެވެ. އެ ގްރާންޓުގެ މަގުސަދަކީ، ފޮތް ލިޔެ ޗާޕުނުކުރެވި ތިބި ލިޔުންތެރިންނަށް އެ ފުރުސަތު ދިނުމެވެ. އެމްއެންޔޫއިން ބުނީ އެ ގްރާންޓަށް މި ދިޔަ އަަހަރު 30 ޕްރޮޕޯސަލް ލިބުނުކަމަށެވެ. އަދި އެ ޕްރޮޕޯސަލްތައް މުރާޖައާ ކުރުމަށް ފަހު 14 ހުށަޙެޅުމަކަށް އެއް މިލިއަނާ ގާތް ކުރާވަރުގެ ގްރާންޓު ދީފައިވާ ކަމަށް އެމްއެންޔޫއިން ބުނެއެވެ.
އެ ދެ ފޮތް ނެރެދެއްވީ ޔުނިވަރސިޓީގައި އޮތް ރަސްމިއްޔާތެއްގައި ރަައްޔިތުންގެ މަޖިލީހުގެ ރައީސް ރައީސް މުޙައްމަދު ނަޝީދެވެ. ފޮތް ނެރެދެއްވުމަށް ފަހު ނަޝީދު ވަނީ ކިޔުންތެރިކަމަކީ މިހާރު ނެތެމުންދާ އާދައެއް ކަމަށާއި އެ އާދަ ކުޑަކުދިންގެ ކިބައިގައި އަށަގެންނުވޭނީ ބޮޑެތި މީހުން ވެސް އެ އާދަ ދިރުވައިގެން ކަން ފާހަގަކުރައްވާފައެވެ. އެމްއެންޔޫ އިން ފޮތްތެރިކަން ފުޅާ ކުރުމަށް ފަށާފައިވާ މަސައްކަތްތަކުގެ ސަބަބުން ލިޔުންތެރިކަމާއި ފޮތްތެރިކަން ފުޅާވެ، ކުރީގައި ނެތް ގިނަ ފުރުސަތުތަކެއް ލިބޭނެ ކަމަށް ނަޝީދު ވިދާޅުވިއެވެ.
"އެމްއެންޔޫއިން ފޮތުގެ މަސައްކަތް މިވަގުތު ހިންގާކަމީ ގައުމު ބިނާކުރުމަށް ވަރަށް މުހިންމު ކަމެއް. އަދި ރާއްޖެއަކީ ފޮތުގެ މާބޮޑު ސަގާފަތެއް އޮތް ގައުމެއް ނޫން. ފޮތް ކިޔުމާއި، ފޮތް ލިޔުމާއި، ފޮތް ވިއްކުން މަނާ ދުވަސްވަރެއްވެސް ހިނގާދިޔަ" ރައީސް ނަޝީދު ވިދާޅުވިއެވެ.
ލިޔުންތެރިޔާ ލީލާ ވިދާޅުވީ، އެ ފޮތް ލިޔުއްވުމުގެ ހިޔާލު އައީ ކޮވިޑުގައި ލޮކްޑައުންގެ ދުވަސްވަރު ގޭގައި ކުޑަކުއްޖަކާއެކު ހުންނެވި ދުވަސްވަރު ކަމަށެވެ. އަދި އެ ދެ ފޮތް ލިޔުއްވުމުގައި ތިމާވެއްޓަށް އަޅައިލައްވަން ބާރު އަޅަން ބޭނުންވި ކަމަށާއި އުއްމީދަކީ ފޮތުން ކުދިންނަށް ފިލާވަޅުތަކެއް ދަސްވެ، ރަނގަޅު އިބުރަތެއް ލިބުނުކަމަށް ވިދާޅުވިއެވެ.
ފޮތްތެރިކަން ތަރައްގީކޮށް، ކުރިއެރުވުމަށް ކުރަމުންދާ މަސައްކަތްތަކުގެ ތެރެއިން މިއަދު ވަނީ އެމްއެންޔޫގެ ފޮތް މައުރަޒު ވެސް ހުޅުވާފައެވެ. މި މައުރަޒުގައި 22 ފަރާތަކުން ބައިވެރިވެ، 1،400އަށްވުރެ ގިނަ ފޮތް ހުށަހަޅާފައިވެއެވެ. އަދި މީގެ ތެރޭގައި އެކި އުމުރުފުރާތަކާ ގުޅޭ ފޮތްތައް ވަނީ ހިމަނާފައެވެ. މި މައުރުޒް ކުރިއަށް ގެންދިޔުމަށ ްހަމަޖެހިފައިވަނީ އަންނަ ބްރާސްފަތި ދުވަހާ ހަމަޔަށް ކޮންމެ ދުވަހެއްގެ ހެނދުނު 10އިން ރޭގަނޑު 10 އަށެވެ.