ރާއްޖޭގެ ފަރުތަކަށް އައިސްފައިވާ ބަދަލުތަކާއި ދުޅަހެޔޮކަމުގެ މިންވަރު ދެނެގަތުމަށް ކުރިއަށްގެންދާ "50 ބެސްޓް ސައިޓް ރީފް ހެލްތްޗެކް ފޮޓޯޝޫޓް" މުބާރާތުގެ މެއިން ސްޕޮންސަރަކަށް ދިރާގު ހަމަޖައްސައިފިއެވެ.
މިއީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ކުރިއަށްގެންދާ މުބާރާތެކެވެ. މިކަމުގެ އެއްބަސްވުމުގައި ޓޫރިޒަމް މިނިސްޓްރީގެ ފަރާތުން ސޮއިކުރެއްވީ މިނިސްޓަރ ޑރ.ޢަބްދުﷲ މަޢުސޫމެވެ. ދިރާގުގެ ފަރާތުން ސޮއިކުރެއްވީ ސީއީއޯ އިސްމާޢީލް ރަޝީދެވެ.
މިމުބާރާތް ބޭއްވުމުގައި އެންމެބޮޑު އިސްކަމެއް ދެއްވާފައިވަނީ ރާއްޖޭގެ ފަރުތައް ހިމާޔަތްކުރުމަށް ބާރުއެޅުމެވެ. އަދި ރާއްޖޭގެ ފަރުތަކަށް އަންނަ ބަދަލުތައް ދެނެގަނެގަތުމާއި ފަރުތަކުގެ ދުޅަހެޔޮކަން ދެމެހެއްޓުމަށް އިތުރަށް ޞާރު އެޅުމަކީވެސް މުބާރަތުގެ މުހިންމު މަޤުސަދެކެވެ.
މި މުބާރާތް ކުރިއަށްގެންދަނީ އޯޝަން ޖިއޮގްރަފިކާއި، މޯލްޑިވްސް އެލަޔަންސް އޮފް ޑައިވް އޮޕަރޭޓަރސްއާ ގުޅިގެންނެވެ.
ޓޫރިޒަމް މިނިސްޓަރ ޑރ.ޢަބްދުﷲ މަޢުސޫމް ވިދާޅުވީ، މި ޙަރަކާތް އަހަރަކު އެއްފަހަރު ބޭއްވުމަށް ރާވާފައިވާކަމަށެވެ. އަދި މިމުބާރާތުން ލިބޭ މަޢުލޫމާތުގެ އަލީގައި ރާއްޖޭގެ ފަރުތައް އިތުރަށް ދިރުވުމަށް މަސައްކަތްތައް ކުރާނެކަމަށްވެސް މިނިސްޓަރ ވިދާޅުވިއެވެ.
މިމުބާރާތުގައި ބައިވެރިވުމަށް ޑައިވް ސެންޓަރުތަކުން ރީފް ހެލްތްޗެކް ސެންޓަރެއްގެ ގޮތުގައި ރަޖިސްޓްރީކުރުމަށް ޚާއްސަ ވެބްސައިޓް https://maldives50.site/ އިން ރަޖިސްޓްރީކުރުމުގެ ފުރުސަތު މިހާރު ވަނީ ހުޅުވާލާފައިކަމަށް މިނިސްޓަރ މަޢުލޫމާތުދެއްވައެވެ. މި މުބާރާތް ކުރިއަށްދާނީ މިމަހުގެ 21ވަނަ ދުވަހުއެވެ.
ފަތުރެވިކަމުގެ ރޮނގުގައި ރާއްޖެ ހޯދަމުން އަންނަ ކާމިޔާބުތަކުގައި ރާއްޖޭގެ ފަރުތަކުގެ ޤުދުރަތީ ރީތިކަން މުހިންމު ދައުރެއް އަދާކުރާކަން ފާހަގަކުރައްވައި މިނިސްޓރ ވިދާޅުވީ ފަރުތައް ޙިމާޔަތްކޮށް ބެލެހެއްޓުމަކީ މުހިންމުކަމެއްކަމަށެވެ. އަދި މިމުބާރާތަކީ ފޮޓޯގްރާފަރުންނަށްވެސް އެތަކެއް ފައިދާތަކެއް ކުރާނެ މުބާރާތެއްކަމަށް މިނިސްޓަރ ވިދާޅުވިއެވެ.
"އަންޑަރ ވޯޓަރ ފޮޓޯގްރާފީއަކީ ވަރަށް އަގުބޮޑު ކަމެއް. މީގެ ވަނައެއް ލިބުމަކީ އޯޝަންޖިއޯގްރަފިކްއާއި ބައިވެރިވެގެން އެބޭފުޅުންގެ ޕްލެޓްފޯމްގައި އިސްތިހާރުވެގެންދާއިރު ފޮޓޯގްރާފަރުންނަށް ވަރަށް ބޮޑު ކުރިއެރުމެއް ލިބިގެންދާނެކަމެއް." ޑރ.މައުޞޫމް ވިދާޅުވިއެވެ.
ރާއްޖޭގެ ޓޫރިޒަމްއަށް 50 އަހަރުފުރުމާއި ގުޅިގެން ޓޫރިޒަމް މިނިސްޓްރީން ދަނީ ތަފާތު ހަރަކާތްތައް ހިންގަމުންނެވެ. އެގޮތުން ޓޫރިޒަމް ކިޔަވާ ދަރިވަރުންނަށާއި މުދައްރިސުންނަށް އަމާޒުކޮށްގެން، ފަތުރުވެރިކަމުގެ ދާއިރާގައި ޚިދުމަތްކުރައްވާފައިވާ ފަރާތްތަކުގެ ތަޖުރިބާ ހިއްސާކުރުމަށް "ޓޫރިޒަމް އަޕްބީޓް ޝޯވ"ގެ ނަމުގައި ޕްރޮގްރާމެއް ކުރިއަށް ގެންދިއުމަށް ވަނީ ހަމަޖެހިފައެވެ.