ބިއޯންޑް އެއަރލައިންއާއެކު ރާއްޖޭގެ ލަގްޝަރީ ޓްރެވަލް ސެގްމަންޓަށް އިތުރު ކުރިއެރުންތަކެއް ލިބޭނެ: މައުސޫމް
ބިއޯންޑް އެއަރލައިންގެ ސަބަބުން ރާއްޖެއާއި ދުނިޔޭގެ އެކި ހިސާބުތަކާއި ގުޅާލެވި، ފަތުރުވެރިކަމުގެ ދާއިރާއަށް އިތުރު ކުރިއެރުންތައް ލިބިގެންދާނެ ކަމަށް މިނިސްޓަރ އޮފް ޓޫރިޒަމް ޑރ. އަބްދުﷲ މައުސޫމް ވިދާޅުވެއްޖެއެވެ.
ޔޫއޭއީގެ އިންވެސްޓްމަންޓް ފާމެއް ކަމަށްވާ އަރަބެސްކް އާއި ގުޅިގެން ސިމްޑީން ވަނީ ބިއޯންޑް އޮޕަރޭޝަންސް ޕްރައިވެޓް ލިމިޓެޑްގެ ނަމުގައި ކުންފުންޏެއް ހަދާފައެވެ. ބިއޯންޑް ކުންފުނިން ވަނީ މި އެއަރލައިން ފެށުމަށް ކުރަމުންދާ މަސައްކަތްތަކާ ގުޅޭގޮތުން ޓޫރިޒަމް މިނިސްޓަރާއި ބައްދަލުކޮށްފައެވެ.
މިބައްދަލުވުމުގައި މިނިސްޓަރ މައުސޫމްގެ އިތުރުން އެކުންފުނީގެ ސީއީއޯ ޓެރޯ ޓަސްކިލާވަނީ ބައިވެރިވެވަޑައިގެންފައެވެ.
މި ބައްދަލުވުމުގައި ޓޫރިޒަމް މިނިސްޓަރ ޑރ. އަބްދުﷲ މައުސޫމް ވަނީ ބިއޯންޑް އެއަރލައިންއާއެކު ރާއްޖޭގެ ލަގްޝަރީ ޓްރެވަލް ސެގްމަންޓަށް އިތުރު ކުރިއެރުންތަކެއް ލިބިގެންދާނެކަން ފާހަގަކުރައްވާފައެވެ. އަދި އިތުރު މަންޒިލްތަކާއި ރާއްޖެއާއި ގުޅާލެވި ރާއްޖޭގެ ފަތުރުވެރިކަމަށްވެސް މިކަމުގެ ސަބަބުން ބޮޑު ކުރިއެރުމެއް ލިބިދާނެ ކަމަށްވެސް މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ މި އެއަރލައިންއަކާއެކު ގިނަ އަދަދެއްގެ ވަޒީފާގެ ފުރުސަތުތައް ހުޅުވިގެންދާނެކަމަށެވެ. އަދި ރާއްޖޭގެ ވިޔަފާރިތަކަށާއި އަމިއްލަ ފަރާތްތަކަށް ޔޫރަޕާއި، އޭޝިއާ، އޮސްޓްރޭލިއާ އަދި އެފްރިކާގެ ހިސާބުތަކަށް ސީދާ ދަތުރުތައް ކުރުމުގެ މަގު ފަހިވެގެންދާނެ ކަމަށްވެސް މިނިސްޓަރ ވިދާޅުވިއެވެ.
މިބައްދަލުވުމުގައި ކުންފުނީގެ ސީއީއޯ ޓެރޯ ޓަސްކިލާ ވިދާޅުވީ ދުނިޔޭގެ ފަތުރުވެރިކަމުގައި ރާއްޖެއަކީ އެންމެ ކުރީ ސަފުގައި ގުނާލެވޭ ޤައުމަކަށްވާއިރު، ރާއްޖޭގައި އެއަރލައިނެއްގެ ޙިދުމަތް ފެށުމަކީ ލިބޭ އުފަލެއް ކަމަށެވެ. އަދި ވަރަށް އަވަހަށް އެ އެއަރލައިންގެ މަންޒިލްތައް ހާމަކުރާނެ ކަމަށްވެސް ޓެރޯ ވިދާޅުވިއެވެ.
ބިއޯންޑް އެއަރލައިންގެ އޮޕަރޭޝަންތައް ފެށުމަށް ޓައިމްލައިން އެއްކޮށް އަދި ހަމަނުޖެހުނުނަމަވެސް، އަންނަ އަހަރު ކުރީކޮޅު ދަތުރުތައް ފެށޭ ވަރު ވާނެ ކަމަށް ވަނީ ލަފާކޮށްފައެވެ. ބިއޯންޑް އެއަރލައިނުން މީގެކުރިން ވަނީ ދުނިޔޭގެ 60 މަންޒިލަކަށް ދަތުރުކުރުމަށް އަމާޒުހިފާފައިވާކަން ހާމަކޮށްފައެވެ.