އުތުރު ޕްރޮވިންސްގައި ފެރީގެ ޚިދުމަތް ދިނުމަށް ދީބާޖާ އިންޓަރނޭޝަނަލް ކުންފުންޏާއާއެކު ސަރުކާރުން ވެފައިވާ އެއްބަސްވުން ބާތިލުކުރި މައްސަލައިގައި ލިބުނު ގެއްލުމުގެ ބަދަލު ހޯދަން ސުޕްރީމް ކޯޓަށް ހުށައެޅި އިސްތިއުނާފް މައްސަލައިގެ ހުކުމް އިއްވަން ތާވަލުކޮށްފިއެވެ.
ސުޕްރީމް ކޯޓަށް ހުށަހަޅާފައިވާ މިމައްސަލައިގެ އަޑުއެހުންތައް ވަނީ މިދިޔަ އަހަރުގެ ނޮވެމްބަރުމަހު ނިންމާލާފައެވެ. އަދި މާދަމާ ހެނދުނު 11:00 ޖަހާއިރު މިމައްސަލައިގައި ހުކުމް އިއްވުމަށް ބާއްވާ ޝަރީއަތުގެ މަޖިލިސް ވަނީ ތާވަލުކޮށްފައެވެ.
އުތުރު ޕްރޮވިންސްގައި ފެރީގެ ޚިދުމަތް ދިނުމަށް ދީބާޖާއާއެކު ކުރީގެ ރައީސް މުޙައްމަދު ނަޝީދުގެ ސަރުކާރުން ހެދި އެއްބަސްވުން އުވާލީ ކުރީގެ ރައީސް ޑރ.މުޙައްމަދު ވަހީދުގެ ވެރިކަމުގައެވެ. އަދި އެކަމުގެ ބަދަލެއްގެ ގޮތުގައި 348 މިލިއަން ރުފިޔާ ދައްކަން ދައުލަތުގެ މައްޗަށް 2014 ގައި ސިވިލް ކޯޓުން ވަނީ ހުކުމްކޮށްފައެވެ. 348 މިލިއަން ރުފިޔާގެ ބަދަލުދޭން ސިވިލް ކޯޓުން ހުކުމްކޮށްފައިވަނިކޮށް، 2018 ވަނަ އަހަރު ހައިކޯޓުން ވަނީ އެ ހުކުމް ބާތިލުކޮށްފައެެވެ.
ނަމަވެސް ހައިކޯޓުން އެ ހުކުމް ބާތިލުކުރީ އިޖުރައާތްތަކާއި ހިލާފަށްކަމަށް ބުނެ 2019 ވަނަ އަހަރު ސުޕްރީމް ކޯޓުން ވަނީ ހައިކޯޓުގެ ހުކުމް ބާތިލުކޮށްފައެވެ.
ސުޕްރީމް ކޯޓުގެ އެ ނިންމުން ރިވިއުކުރަން ދައުލަތުން މިދިޔަ އަހަރު އެދުމުން ސުޕްރީމް ކޯޓުން ވަނީ ކުރީގެ ނިންމުން ބާތިލުކޮށް، ބަދަލުދޭން ނުޖެހޭކަމަށް ހައިކޯޓުން ނިންމި ހުކުމް އަލުން އިސްތިއުނާފް ކުރުމުގެ ފުރުސަތު ދީބާޖާއަށް އޮންނާނެ ކަމަށް ކަނޑައަޅާފައެވެ. އެއާއެކު ދީބާޖާއިން ވަނީ އެ މައްސަލަ މިދިޔަ އަހަރު ސުޕްރީމް ކޯޓުގައި އިސްތިއުނާފްކޮށްފައެވެ. އަދި އެ މައްސަލައިގެ އަޑުއެހުންތައް ނިންމައި، މާދަމާ ހުކުމް އިއްވުމަށް މިހާރު ވަނީ ތާވަލުކޮށްފައެވެ.