މާލެއިން ފުރައިގެން އއ.މާޅޮހަށް ދަތުރުކުރި ލޯންޗެއް ބަންޑުންޖަހާލައި އޭގެއިން ދަތުރުކުރި މީހަކު ގެއްލިހެން ފުލުހުން ހޯދަން ފަށައިފިއެވެ.
ފުލުހުން ވިދާޅުވީ އިއްޔެ 13:00 ހާއިރު މާލެއިން ފުރައިގެން އުކުޅަހަށް ދަތުރުކުރި ލޯންޗެއްގެ ޚަބަރެއް ނުވެގެން ފުލުހުންނަށް ރިޕޯޓުކޮށްފައިވާކަމަށެވެ. ލޯންޗުފުރީ މާލެ، ކުރީގެ ކުނިކޮށްޓާ ދިމާއިން ކަމަށާއި، އެ ލޯންޗުން ދަތުރުކުރީ ދިވެހި ދެ ފިރިހެނުންކަމަށް މައުލޫމާތު ލިބިފައިވާކަމަށް ފުލުހުން ވިދާޅުވިއެވެ.
އެ ލޯންޗު ބަންޑުންޖަހާލާފައި އޮއްވައި ފެނިފައިވަނީ އއ. މާޅޮސް ކައިރިންކަމަށާއި، އެ ލޯންޗުން ދަތުރުކުރި އެކަކު ފެރިދޫ ފުއްޓަރާ ދިމާއިން ފެނިފައިކަމަށް ފުލުހުން ވިދާޅުވިއެވެ. އަދި އެމީހާއަށް ފެރިދޫ ސިއްހީ މަރުކަޒުގައި ފަރުވާދެމުން ކަމަށާއި، ދެ ވަނަ މީހާ ހޯދުމުގެ މަސައްކަތް ކުރަމުންދާކަމަށްވެސް ފުލުހުން ވިދާޅުވިއެވެ.
ފުލުހުން ވިދާޅުވީ ލޯންޗު ގެއްލުނުކަން ފުލުހުންނަށް ރިޕޯޓްކޮށްފައިވަނީ މިމަހުގެ 6 ވަނަދުވަހުގެ 13:00 ހާއިރުކަމަށެވެ. އަދި ލޯންޗުން ދަތުރުކުރި އެކަކު، މިމަހުގެ 5 ވަނަ ދުވަހުގެ 13:00 ހާއިރުން ފެށިގެން ޚަބަރެއްނުވެ ގެއްލިފައިވާ ކަމަށް އޭނާގެ އާއިލާއިން ފުލުހުންނަށް ރިޕޯޓުކޮށްފައިވަނީ އޮކްޓޯބަރ 6 ވަނަ ދުވަހުގެ 20:50 ހާއިރުކަމަށްވެސް ފުލުހުން ވިދާޅުވިއެވެ.
ފުލުހުން ވަނީ ގެއްލުނު މީހާ ފެނިއްޖެނަމަ ނުވަތަ އެމީހާއާ ގުޅޭ އެއްވެސް މައުލޫމާތެއް ލިބިފައިވާނަމާ 119 ނުވަތަ 3322111 އަށް ހިއްސާކޮށްދެއްވުމަށް އެދިވަޑައިގެންފައެވެ.