ފްލޯޓިން ސިޓީގެ ގެތަކެއް އާއްމުންނަށް ދައްކާލުން ލަސްވަމުންދަނީ މޫސުމުގެ ސަބަބުން: ކޮންސަލްޓަންޓް

ފްލޯޓިން ސިޓީގެ ނަމޫނާ ގެތަކެއް އާއްމުންނަށް ދައްކާލުމުގެ މަސައްކަތް ލަސްވަމުންދަނީ މޫސުން އޮންނަ ގޮތުގެ ސަބަބުންކަމަށް މިޕްރޮޖެކްޓުގެ ދިވެހި ކޮންސަލްޓަންޓު ވިދާޅުވެއްޖެއެވެ.

ފްލޯޓން ސިޓީގެ ނަމޫނާ ގެތައް މިދޔަ މަހުގެ ފަހުކޮޅު އާއްމުންނަށް ދައްކާލާނެ ކަމަށް ބުނެފައިވީ ނަމަވެސް މި މަސައްކަތް ލަސްވެގެން ދިޔައީ ވައި ބާރުވުުމުގެ ސަބަބުން ގެތައް ދެންދިޔުމުގައި ދަތިވެފައިވުމުންކަމަށް ކޮންސަލްޓަންޓު މައުލޫމާތުދެއެވެ.

ނަމޫނާ އެއްގެގޮތުގައި ފުރަތަމަ ދައްކާލުމަށް ހަމަޖެހިފައިވަނީ ފްލޯޓިން ސިޓީގެ މަގެކެވެ. އެ މަގުގެ ދެ ފަރާތުގައި ގެތައް ހުންނާނެ ކަމަށާއި، މަގުގައި ގަސްތައްވެސް ހުންނާނެކަމަށް ރިޔާޒް ވިދާޅުވިއެވެ. މިއާއެކު ފްލޯޓިންގ ސިޓީ ނިމިގެންދާއިރު ހުންނާނެ ގޮތް ސިފަވެގެންދާނެއެވެ.

ފްލޯޓިން ސިޓީ ތަރައްޤީކުރަމުންދަނީ މާލެ އަތޮޅު އާރަށް ކައިރީ އޮންނަ ފަޅެއްގައެވެ. މާލެއިން ފްލޯޓިންގ ސިޓީއަށް ލޯންޗުގައި 10 މިނެޓުން ދެވޭނެއެވެ.

ޕީއެސްއެމް ނިއުސްއާއި ވާހަަކަދައްކަވަމުން، ފްލޯޓިން ސިޓީ މަޝްރޫޢުގެ ދިވެހި ކޮންސަލްޓަންޓް އިބްރާހީމް ރިޔާޒް ވިދާޅުވީ ވިއްސާރައާއި ވައި ބާރުވުމުގެ ސަަބަބުން އާއްމުންނަށް އެތަން ދައްކާލުމުގެ މަސައްކަތް ލަސްވެފައިވާ ކަމަށެވެ. ރިޔާޒް ވިދާޅުވީ ގެތައް އިމާރާތްކޮށްފައިވަނީ ފްލޯޓިން ސިޓީ ތަރައްޤީކުރާ ސަރަޙައްދާ 45 މިނެޓު ދުރުގައި އޮންނަ ރަށެއްގެ ފަޅުތެރޭގައި ކަމަށެވެ. އެހެންކަމުން އެތަނުން ގެތައް ފްލޯޓިން ސިޓީއަށް ގެންދިޔުމަށް ކުރަން ޖެހޭ ދަތުރުގައި ގިނަ ކަންތައްތަކަށް ބަލަން ޖެހޭ ކަމަށް އޭނާ ވިދާޅުވިއެވެ.

" ވައިގެ ސްޕީޑު ހުންނަން ޖެހެނީ 30 ނޯޓްސްއަށްވުރެ ދަށުގައި، އޭރުން ވޫމް ކުރެވޭނީ، ރިކޮމެންޑޭޝަން ލިބިފަ އިނީ އެގޮތަށް، ސަލާމަތީ ސަބަބުތަކަށްޓަކައި،" ރިޔާޒް ވިދާޅުވިއެވެ.

ރިޔާޒް ވިދާޅުވީ މިހާރު މައުލޫމާތުތައް ލިބޭ ގޮތުގައި ވައި މަޑުވެ، އަންނަ ހަފްތާތެރޭ ގެތައް ފްލޯޓިން ސިޓީ ތަރައްޤީކުރާ ފަޅަށް ގެންދިޔުމުގެ މަސައްކަތްކުރެވޭނެ ކަމަށާއި، ގެތައް އެތަނަށް ގެންދާތާ 3 ދުވަސްތެރޭ އެތަން އާއްމުންނަށް ދައްކާލުމުގެ މަސައްކަތް ފަށާނެ ކަމަށެވެ.

ރާއްޖޭގައި ފްލޯޓިން ސިޓީ ތަރައްޤީކުރުމުގެ މަސައްކަތް ކުރިއަށްގެންދަނީ ނެދަލެންޑްސްގެ ޑަޗް ޑޮކްލޭންޑު ކުންފުނިންނެވެ. މިދިޔަ ފެބްރުއަރީމަހުގެތެރޭ ފްލޯޓިންގ ސިޓީގެ ފުރަތަމަ ގެތައް އިމާރާތްކުރުމުގެ މަސައްކަތް ވަނީ ބައިސަން މޯލްޑިވްސް އާއި ހަވާލުކޮށްފައެވެ. އަދި މިދިޔަ ފެބްރުއަރީމަސް ތެރޭވަނީ ނަމޫނާ ގެތައް އިމާރާތްކުރުމުގެ މަސައްކަތް ނިމިފައެވެ.

ރިޔާޒް ވިދާޅުވީ ގެތައް ފްލޯޓިން ސިޓީ ތަރައްޤީކުރާ ފަޅަށް ގެނައުމަށްފަހު ނަގިލިތަކެއް ބޭނުންކޮށްގެން ސްޓޭބަލް ކުރެވޭނެ ކަމަށެވެ. އަދި އެތަނުގައި ގެތައް އިންސްޓޯލްކުރުމަށްފަހު މޫސުން ގޯސްވި ނަމަވެސް ގެތައް އޭގެ އަސަރެއް ނުކުރާނެ ކަމަށްވެސް ރިޔާޒް ވިދާޅުވިއެވެ.

ފްލޯޓިން ސިޓީ ތަރައްޤީކުރަނީ 20000 މީހުންގެ އާބާދީއަކަށް އަމާޒްކޮށެވެ. ފްލޯޓިންގ ސިޓީ އަޅާއިރު މުޅިންވެސް ތިމާވެއްޓާއި ރަހުމަތްތެރި ގޮތްތަކެއް ބޭނުން ކުރެވޭނެއެވެ. އަދި މިއީ ރާއްޖޭގައި ހިންގާ މިފަދަ ފުރަތަމަ މަޝްރޫއެވެ. މިއީ ރާއްޖޭގެ ގެދޮރު އިމާރާތް ކުރުމުގެ ދާއިރާ ބަދަލު ކޮށްލުމުގެ މަޤްސަދުގައި ކުރިއަށްގެންދާ ބިޔަ މަޝްރޫއެކެވެ.