ރަޝިއާ ޔުކްރެއިން ހަނގުރާމައިގެ ސަބަބުން ކޮންމެހެން ބޭނުންވާ ޒަރޫރީ ބޭނުންތައް ފުއްދުމަށްޓަކައި ސަޕްލިމެންޓްރީ ބަޖެޓްގެ ގޮތުގައި 530 މިލިއަން އެމެރިކާ ޑޮލަރުގެ އެހީ ޔުކްރެއިންއަށް ދޭން ނިންމާފައިވާކަމަށް ވޯލްޑް ބޭންކުން އިއުލާނުކޮށްފިއެވެ.
އިންޓަނޭޝަނަލް ބޭންކް ފޯ ރިކޮންސްޓްރަކްޝަން އެންޑް ޑިވެލޮޕްމަންޓުގެ އާ ލޯނެއްގެ ގޮތުގައި 500 މިލިއަން އެމެރިކާ ޑޮލަރު ދީފައިވަނީ އިނގިރޭސިވިލާތުންނެވެ. އަދި ބާކީ 30 މިލިއަން އެމެރިކާ ޑޮލަރުގެ އެހީ ދީފައިވަނީ ޑެންމާކުންކަމަށް ވޯލްޑް ބޭންކުން ނެރުނު ބަޔާނެއްގައި ބުނެފައިވެއެވެ.
ހަނގުރާމައިގެ ސަބަބުން ޔުކްރެއިންއަށް ލިބޭ ގެއްލުންތައް އަދިވެސް އަންނަނީ އިތުރުވަމުންކަމަށް ޔޫރަޕާއި މެދުތެރޭ އޭޝިއާގެ ސަރަހައްދީ ނައިބު ރައީސް އަނާ ބްޖެރްޑޭގެ ބަޔާނުގައިވެއެވެ. އަދި ޔޫކްރެއިން އަލުން އާރާސްތުކުރަން ވަރަށް ގިނަ ދުވަސް ނަގާނެ ކަމަށާއި އެކަން ކުރުމަށް ގައުމުތަކުގެ އެއްބާރުލުން ދޭން ޖެހޭ ކަމަށްވެސް އޭނާ ވިދާޅުވިއެވެ.
ވޯލްޑް ބޭންކުން ލަފާކުރާ ގޮތުގައި ކުރިއަށް އޮތް ތިން އަހަރު ޔޫކްރޭނު އަލުން އާރާސްތު ކުރުމަށް 100 ބިލިއަން އެމެރިކާ ޑޮލަރު ޚަރަދުވާނެއެވެ. އަދި ހަނގުރާމަ ކުރިއަށްދާ ވަރަކަށް ޚަރަދު އިތުރުވާނެ ކަމަށްވެސް ބްޖެރްޑޭ ވިދާޅުވިއެވެ.
އެ ބޭންކުން ބުނިގޮތުގައި ޔޫކްރޭނަށް ކުއްލި ހާލަތުގައި ދޭންޖެހޭ ފައިސާގެ ގޮތުގައި ގާތްގަނޑަކަށް 13 ބިލިއަން އެމެރިކާ ޑޮލަރު މިހާރުވެސް ކަނައަޅާފައިވާ ކަމަށާއި އޭގެ ތެރެއިން 11 ބިލިއަން އެމެރިކާ ޑޮލަރު މިހާރު ދޫކޮށްފައިވާ ކަމަށެވެ. އަދި ހުކުރު ދުވަހު އެމެރިކާގެ ކޮންގްރެސްއިން ވަނީ ޔޫކްރޭނަށް 12.3 ބިލިއަން އެމެރިކާ ޑޮލަރުގެ އާ އެހީގެ ޕެކޭޖެއް ފާސްކޮށްފައެވެ. އޭގެތެރޭގައި 3.7 ބިލިއަން އެމެރިކާ ޑޮލަރުގެ އަސްކަރީ ސާމާނު ހިމެނެއެވެ.