މިފްކޯގެ އުފެއްދުންތައް ހުޅުމާލޭ ފޭސް 2އިން ލިބޭނެ އިންތިޒާމް ހަމަޖެއްސުމަށް އެސަރަހައްދުގައި މިފްކޯގެ މަސްފިހާރައެއް ހުޅުވައިފިއެވެ. މިފްކޯއިން ބުނީ ފޭސް 2ގައި މަސްފިހާރައެއް ހުޅުވީ ބޮޑުއާބާދީއެއް އޮންނަ މިސަރަހައްދުގައި ދިރިއުޅޭ ފަރާތްތަކަށް އެންމެ ހެޔޮއަގުގައި، ލުއިފަސޭހަކަމާއެކު މިފްކޯގެ އުފެއްދުންތައް ފޯރުކޮށްދިނުމަށްކަމަށެވެ.
ހުޅުމާލޭ ފޭސް 2 މިފްކޯގެ މަސްފިހާރަ ހުޅުވައިދެއްވީ ހުޅުމާލެ ދާއިރާގެ މެމްބަރު އަލީ ނިޔާޒް އާއި މިފްކޯގެ ޗެއަރމަން ހުސެން އަމްރުއެވެ. މި ފިހާރަ ހުންނާނީ ހިޔާ ފުލެޓް ޓަވަރ 2ގެ ގްރައުންޑް ފްލޯގައެވެ.
މި ފިހާރަ ހުޅުވައިދެއްވުމަށްފަހު މިފްކޯގެ ޗެއަރމަން ހުސައިން އަމްރު ވިދާޅުވީ، މިފްކޯއަކީ އަބަދުވެސް ރައްޔިތުންނާއި ގާތުން މަސައްކަތްކުރާ ކުންފުންޏެއްކަމަށެވެ. އެގޮތުން މި ހުޅުވުނު މަސްފިހާރައަކީވެސް މީގެ ހެއްކެއްކަމަށް އަމްރު ވިދާޅުވިއެވެ.
"އަޅުގަނޑުމެން މިފްކޯއިން ހުޅުމާލެ ފޭސް 2ގައި މަސްފިހާރައެއް މިހުޅުވީ ހުޅުމާލެ ފޭސް 2ގައި އުޅޭ ރައްޔިތުންނަށް މިފްކޯގެ ޕްރޮޑަކްޓްސް ލިބޭނެގޮތް ހަމަޖެއްސުމަށްޓަކައެވެ. މިފްކޯއަކީ ރައްޔިތުންނާއި ވަރަށް ގާތުން މަސްއަކަތްކުރަމުންދާ ކުންފުންޏަކަށްވެފައި މިފިހާރަވެގެންދާނީ މިފްކޯގެ ޚިދުމަތްތަކަށް ލިބުނު އިތުރުކުރިއެރުމަކަށެވެ." މިފްކޯގެ ޗެއާމަން ހުސެން އަމްރު ވިދާޅުވިއެވެ.
މިފްކޯގެ ސީއީއޯ އިސްމާއިލް ފައުޒީ ވިދާޅުވީ، މިފްކޯގެ އާ އުފެއްދުންތައް މިހާރުވެސް މާކެޓަށް އަންނަން އެބަހުރިކަމަށެވެ. ކައިރި މުސްތަގްބަލެއްގައި ޕްރޮޑަކްޓު ޑިވެލޮޕްމަންޓް ނިމި، މި އުފެއްދުންތައްވެސް މާކެޓަށް ނެރެވިގެންދާނެކަން އޭނާ ފާހަގަކުރެއްވިއެވެ.
އާންމުންގެ އިތުބާރު ހޯދާފައިވާ މިފްކޯގެ ހުރިހާ އުފެއްދުމެއް މެދުކެނޑުމެއްނެތި ލިބެން ހުންނަ މިފިހާރަ ހުޅުވުމުގެ ރަސްމިއްޔާތުގައި މިފްކޯގެ ފަރާތުން ކުންފުނީގެ އުފެއްދުންތައް ރަހަބަލާލުމުގެ ފުރުސަތު އާންމުންނަށް ވަނީ ހުޅުވާލާފައެވެ. އެގޮތުން ކަސްޓަމަރުންގެ އެންމެ ބޮޑު ތަރުހީބު ލިބިފައިވާ އުފެއްދުންތަކާއި އަލަށް ތައާރަފް ކޮށްފައިވާ ތެޔޮއުކާލަން ނުޖެހޭ "ޑްރެއިންޑް ކަނޑުމަސް ޗަންކްސް" މަސްދަޅު ބޭނުންކޮށްގެން ތައްޔާރުކޮށްފައިވާ ތަކެތީގެ ރަހަ ބަލާލުމުގެ ފުރުސަތު އާންމުންނަށް ވަނީ ދީފައެވެ.
މިފިހާރަ ހުޅުވާފައި ހުންނާނީ މިފްކޯގެ އެހެން ފިހާރަތައްވެސް ހުޅުވާފައި ހުންނަ ވަގުތު ކަމަށްވާ ހެނދުނު 8:30 ން ރޭގަނޑު 10:00 އަށެވެ. މިއީ މާލެ ސަރަހައްދުގައި މިފްކޯއިން ހުޅުވި 4 ވަނަ ފިހާރައެވެ.
މިފްކޯ މަސްފިހާރައިން ލިބެންހުންނަ އުފެއްދުންތަކުގެ ތެރޭގައި ފަސްމީރު ބްރޭންޑުގެ ދަޅުމަސް، ގަނޑުކުރި އަދި ހިކިމަހުގެ ބާވަތްތަކާއި ވަގުތުން ތައްޔާރުކޮށްލެވޭ މަހުގެ އުފެއްދުންތައް ހިމެނެއެވެ.