ޔޫކްރެއިނުގެ އިރުދެކުނުގައިވާ ރަޕޮރީޜިޔާގައި ހުންނަ ނިއުކްލިޔަރ ހަކަތަ އުފައްދާ ޕްލާންޓު ހުންނަ ސަރަޙައްދުގައި ހަމަލާ ބަދަލުކުރުން ހުއްޓައިލާ، އެއީ ހަތިޔާރު ގެންގުޅުން މަނާ ސަރަޙައްދެއްގެ ގޮތުގައި ކަނޑައަޅަން ރަޝިޔާއާއި ޔޫކްރެއިނުން ބޭނުންވާ ކަމުގައި އެޓޮމިކް ހަކަތައާ ބެހޭ ބައިނަލްއަޤްވާމީ އިދާރާ (އައި.އޭ.އީ.އޭ)އިން ބުނެފިއެވެ.
ހަނގުރާމައިގެ ތެރެއިން އެ ޕްލާންޓަށް ދޭ ހަމަލާއަކާ ގުޅިގެން ރޭޑިއޭޝަން ލީކުވެ، އެ ތަނުގައި ނިއުކްލިޔަރ ކާރިސާއެއް ހިނގައިފާނެ ކަމުގެ ބިރު ވަނީ އިތުރުވެފައެވެ. އަދި، މި ކަމާ ގުޅިގެން އެ ޕްލާންޓުގެ މަސައްކަތްތައް ވަނީ ހުއްޓައިލާފައެވެ.
ހަނގުރާމައިގައި ރަޝިޔާއާއި ޔޫކްރެއިނުގެ ފައުޖުތަކުގެ ދެމެދުގައި ބަދަލު ކުރަމުންދާ ހަމަލާތަކުގައި ޒަޕޮރީޜިޔާ ޕްލާންޓަށް ވެސް ވަނީ އެތަކެއް ފަހަރެއްގެ މަތިން ވަނީ ނުރައްކާތެރި ހަމަލާތަކެއް އަމާޒުކޮށްފައެވެ. ނަމަވެސް، ދެ ޤައުމު ކުރެ އެއް ޤައުމަކުން ވެސް ހަމަލާތަކުގެ ޒިންމާ އުފުލާފައެއް ނުވެއެވެ. އިލްޒާމު އަޅުވައި އިނގިލި ދިއްކުރަނީ އަނެއް ޤައުމަށެވެ.
ޒަޕޮރީޜިޔާއަކީ ހަތިޔާރު ގެންގުޅުން މަނާ ސަރަޙައްދެއްގެ ގޮތުގައި ކަނޑައެޅުމަށް ހުށަހަޅާފައި ވަނީ އައި.އޭ.އީ.އޭ.އިންނެވެ. "މި ގޮތަށް އަމަލު ކުރަން ދެ ޤައުމުން ވެސް ބޭނުންވޭ. އަދި، ދެ ޤައުމުން ވެސް ދަނީ މިކަމުގައި އައި.އޭ.އީ.އޭ.އަށް އެއްބާރުލުން ދެމުން. އަދި، މި ކަން ހާސިލު ކުރެވޭނެ ގޮތްތަކެއް ހޯދުމުގައި އެހީތެރިވަމުން،" އައި.އޭ.އީ.އޭ.ގެ ޑިރެކްޓަރ ޖެނެރަލް ރަފަޔަލް ގްރޮޓްސީ ވިދާޅުވިއެވެ.
ހަތިޔާރު ގެންގުޅުމާއި ހަމަލާ ދިނުން މަނާ ކުރާނެ ސަރަޙައްދަކީ ކޮބައިކަން ކަނޑައެޅުމާއި، މި ކަމުގައި އައި.އޭ.އީ.އޭ.ގެ ދައުރަކީ ކޮބައިކަން ކަނޑައެޅުމަށް މިހާރު މަޝްވަރާ ކުރަމުންދާ ކަމުގައި ގްރޮޓްސީ ވިދާޅުވިއެވެ. އައި.އޭ.އީ.އޭ.ގެ ދެ އޮފިޝަލަކު މިހާރު ވެސް ތިބީ ޒަޕޮރީޜިޔާ ޕްލާންޓުގައެވެ. ބޭނުމަކީ، އެއްވެސް ފަރާތަކުން އެ ތަނަށް ހަމަލާއެއް ދިނުން ހުއްޓުވުމެވެ.
ރަޝިޔާއިން ޔޫކްރެއިނަށް އަރައި ހަނގުރާމަ ފަށާފައި ވަނީ ފެބުރުވަރީ 24 ގައެވެ. އަދި، އެ ޤައުމުގެ ދެކުނާއި އިރުމަތީގެ ބައެއް ސަރަޙައްދުތައް ވަނީ ރަޝިޔާ ސިފައިންގެ ކޮންޓްރޯލުގެ ދަށަށް ގެންގޮސްފައެވެ. މީގެ ތެރޭގައި ޒަޕޮރީޜިޔާ ވެސް ހިމެނެއެވެ.
ނަމަވެސް، ޔޫކްރެއިނުން ދަނީ، ރަޝިޔާއިން ހިފާފައިވާ ސަރަޙައްދުތައް މިނިވަން ކުރުމަށް ފަށާފައިވާ ކެމްޕޭނުގެ ދަށުން ބޮޑެތި ކުރިއެރުންތަކެއް ހޯދަމުންނެވެ. އެ ޤައުމުގެ އިރުމަތީގައިވާ ޚާރްކިވްގެ ގިނަ ރަށްތަކަކާއި އަވަށްތަކެއް މިނިވަން ކޮށްފައިވާ ކަމުގައި ޔޫކްރެއިނުން ބުނެއެވެ. ޚާރްވިކްއަކީ ޔޫކްރެއިނުގެ ދެވަނައަށް އެންމެ ބޮޑު ސިޓީއެވެ.
ފާއިތުވި 24 ގަޑިއިރުގެ ތެރޭގައި ވެސް ޚާރްކިވްގެ 20 ރަށެއް މިނިވަން ކޮށްފައިވާ ކަމުގައި ޔޫކްރެއިނުން ބުނެއެވެ. މި ކެމްޕޭނާ ގުޅިގެން ރަޝިޔާއިން ވަނީ ދިފާޢީ ކަންކަން ވަރުގަދަކޮށް، އެ ސަރަޙައްދުތަކަށް އިތުރު ސިފައިން ފޮނުވުމުގެ މަސައްކަތް ފަށާފައެވެ. ޚާރްކިވްއަށް ރަޝިޔާ ސިފައިން ވަނީ ހަމަލާދޭން ވެސް ފަށާފައެވެ.
ރަޝިޔާގެ ހަމަލާތަކުގައި ޚާރްކިވްގެ ބައެއް ހިސާބުތަކުން ކަރަންޓާއި ފެނުގެ ޚިދުމަތް ވަނީ ކެނޑިފައެވެ. އަދި، ޢާންމުން ދިއިރުޅޭ ޢިމާރާތަކަށް އެރި ހަމަލާތަކެއްގައި އެކަކު މަރުވިއެވެ. ޚާރްކިވްގެ ގަވަރުނަރު އޮލޭ ސިނެހުބޮފް ވިދާޅުވީ، ރަޝިޔާގެ ހަމަލާތަކުގައި 37 އަހަރުގެ މީހަކު މަރުވި ކަމަށާއި، އިތުރު ހަ މީހަކު ޒަޚަމުވި ކަމުގައެވެ. މީގެ ތެރޭގައި 18 އަހަރުން ދަށުގެ ކުއްޖަކު ވެސް ހިމެނޭ ކަމުގައި އޭނާ ވިދާޅުވިއެވެ.