އިނގިރޭސި ވިލާތުގެ ރާނީ އެލިޒަބަތު ދެވަނައިގެ ހަށިކޮޅު ސްކޮޓްލެންޑުގެ ވެރިރަށް އެޑިންބަރގްއަށް ގެންދެވިފައި ވަނީ ސެޕްޓެންބަރު 11ވަނަ ދުވަހުއެވެ. ރާނީގެ ހަށިކޮޅު ގެންގޮސްފައި ވަނީ ސްކޮޓްލެންޑުގައި ހުންނަ އެ ކަމަނާގެ ގަނޑުވަރު ކަމުގައިވާ ހޮލީރޫޑް ހައުސްއަށެވެ. އަދި، ސެޕްޓެންބަރު 12ވަނަ ދުވަހު އެޑިންބަރގްގެ ރައްޔިތުންނަށް ރާނީގެ ހަށިކޮޅަށް އެންމެ ފަހުގެ އިޙުތިރާމު އަދާކުރުމުގެ ފުރުޞަތު ވަނީ ލިބިފައެވެ.
ރާނީގެ ހަށިކޮޅު އެޑިންބަރގްގެ ސެއިންޓް ޖައިލްސް ކެތީޑްރަލްއަށް ގެންގޮސްފައި ވަނީ ބެރުދުންމާރި ތާޅަފިލީގައި ރަސްމީ ޢިއްޒަތުގައެވެ. މި ރަސްމިއްޔާތުގައި ރަސްގެފާނު ޗާލްސް ތިންވަނައާއި، ރާނީގެ އެހެން ދަރިކަލުން ކަމުގައިވާ ޕްރިންސަސް އޭން، ޕްރިންސް އެންޑްރޫ އަދި ޕްރިންސް އެޑްވަރޑް ބައިވެރިވެ ވަޑައިގެންނެވިއެވެ.
ސެއިންޓް ޖައިލްސް ކެތީޑްރަލްއަށް ރާނީގެ ހަށިކޮޅު ގެންދިޔަ ވަގުތު، އެޑިންބަރގްގެ އެތައް ހާސް ރައްޔިތުންނެއް ވަނީ އެ ކަމަނާގެ ހަށިކޮޅަށް އެންމެ ފަހުގެ އިޙުތިރާމު އަދާ ކުރުމަށް މަގުތަކަށް އެއްވެފައެވެ. ސެއިންޓް ޖައިލްސް ކެތީޑްރަލްގައި ރާނީގެ ހަށިކޮޅު ސެޕްޓެންބަރު 13 އާ ހަމައަށް ބާއްވާނެއެވެ. އަދި، އެ ކަމަނާއަށް އިޙުތިރާމު އަދާކުރުމުގެ ފުރުޞަތު ޢާންމުކޮށް ހުޅުވައިލާފައި އޮންނާނެއެވެ.
ސެއިންޓް ޖައިލްސް ކެތީޑްރަލްއަށް ރާނީގެ ހަށިކޮޅު ގެއްދިޔުމަށް ބޭއްވި ރަސްމިއްޔާތުގައި ބައިވެރިވެ ވަޑައިގަތުމަށް ފަހު، ރަސްގެފާނު ޗާލްސް ރަސްމީ ދަތުރުފުޅެއް ފައްޓަވާނެއެވެ. މި ދަތުރުފުޅުގައި ސްކޮޓްލެންޑުގެ އިތުރުން ވޭލްސްއާއި ނޮދަން އަޔަލެންޑަށް ރަސްގެފާނު ވަޑައިގަންނަވާނެއެވެ. މިއީ، ތަޚުތައް އިސްވެ ވަޑައިގަތުމަށް ފަހު ރަސްގެފާނު ޗާލްސް ކުރައްވާ ރަސްމީ ފުރަތަމަ ދަތުރުފުޅެވެ.
ސެޕްޓެންބަރު 13ވަނަ ދުވަހު ރާނީގެ ހަށިކޮޅު ލަންޑަނުގެ ބަކިންގްހެމް ގަނޑުވަރަށް ގެންދެވޭނެއެވެ. އަދި، އޭގެ އެއް ދުވަސް ފަހުން، ސެޕްޓެންބަރު 14ވަނަ ދުވަހު އިނގިރޭސި ވިލާތުގެ ޤާނޫނު ހަދާ މަޖިލީހުގެ ވެސްޓްމިންސްޓަރ ހޯލަށް ގެންދެވޭނެއެވެ. އަދި، ރާނީގެ ހަށިކޮޅަށް އިޙުތިރާމު އަދާ ކުރުމުގެ ފުރުޞަތު ސެޕްޓެންބަރު 19 އާ ހަމައަށް ޢާންމުކޮށް ހުޅުވައިލެވިފައި އޮންނާނެއެވެ.
ރަސްމީ ޢިއްޒަތުގައި ރާނީ ފަސްދާނުލުމަށް ހަމަޖެހިފައި ވަނީ ސެޕްޓެންބަރު 19ގައެވެ. ޖަނާޒާ ބޭއްވުމަށް ހަމަޖެހިފައި ވަނީ ވެސްޓްމިންސްޓަރ އެބީގައެވެ. މި ޖަނާޒާގައި ދުނިޔޭގެ އެކި ކަންކޮޅުތަކުން ޤައުމުތަކުގެ އިސްވެރިން ބައިވެރިވެ ވަޑައިގަންނަވާނެއެވެ. އަދި، ޓީވީގެ ޒަރީއާއިން ޖަނާޒާ ވަގުތުން ދުރަށް ފޮނުވާނެއެވެ.
ރާނީގެ ހަށިކޮޅު ފަސްދާނުލުމުގެ ރަސްމިއްޔާތު ކުރިއަށް ދާނީ ރާނީގެ ބައްޕާފުޅު ރަސްގެފާނު ޖޯޖް ހަވަނައިގެ ހަނދާނުގައި ބިނާކޮށްފައިވާ ފައްޅީގައެވެ. އެ ތަނުގައި ބާއްވާ ރަސްމިއްޔާތުގައި ބައިވެރިވެ ވަޑައިގަންނަވާނީ ޝާހީ ޢާއިލާގެ މެންބަރުން އެކަންޏެވެ.
70 އަހަރުގެ ދިގު ރަނިކަމެއް ކުރެއްވި ރާނީ އެލިޒަބަތު ދެވަނަ އަވަހާރަވީ ސެޕްޓެންބަރު 8ވަނަ ދުވަހުއެވެ. އުމުރުފުޅުން 96 އަހަރުގައެވެ. ރާނީ އަވަހާރަވުމުން، ރަސްކަން ލިބިވަޑައިގަނެފައި ވަނީ ދޮށީ ދަރިކަލުން އަދި ވަލީއަޙުދު ޗާލްސްއަށެވެ. ޗާލްސްއަކީ އިނގިރޭސި ވިލާތާއި ކޮމަންވެލްތުގެ ރަސްގެފާނު ކަން ރަސްމީކޮށް ކަނޑައަޅައި، އެކްސެޝަން ކައުންސިލުން އެ ކަން ރަސްމީކޮށް އަންގައި، އިޢުލާނު ކޮށްފައި ވަނީ ސެޕްޓެންބަރު 10ވަނަ ދުވަހުއެވެ.
އެލިޒަބަތު އެލެގްޒެންޑްރާ މޭރީ ވިންޑްސަރ އުފަންވެ ވަޑައިގަތީ 1926 ވަނަ އަހަރުގެ އޭޕްރިލް މަހުގެ 21ވަނަ ދުވަހުއެވެ. ރާނީ އެލިޒަބަތުގެ ރަނިކަމަށް 70 އަހަރު ފުރުން ފާހަގަކޮށްފައި ވަނީ 2022ވަނަ އަހަރުއެވެ. އެ ކަމަނާގެ ރަނިކަމަކީ، ފަހުގެ ތާރީޚެއްގައި ދުނިޔެ ދުށް، އެންމެ ދިގު ރަނިކަމެވެ. ރާނީއަކީ، ދިވެހި ދަޢުލަތުގެ އެންމެ މަތިވެރި ޢިއްޒަތް ކަމުގައިވާ ނިޝާން ޣާޒީގެ ޢިއްޒަތުގެ ވެރިކަމުގެ ލަޤަބް އަރުވައިފައިވާ ބޭފުޅެކެވެ.