ދެކުނުގެ އަތޮޅުތަކުގައި ހަރަކާތްތެރިވާ 31 ގޭންގެއްގައި 700 ގޭންގް ސްޓާރުންނާއި 100 ކުޑަކުދިން ތިބިކަމަށް ފުލުހުން ހާމަކޮށްފިއެވެ.
މިހާރު ކުރިއަށްދާ "ވިއަވަތި ރާއްޖެ" ކޮންފަރެންސްގައި ފުލުހުން ހުށަހެޅި ޕްރެޒެންޓޭޝަންގައި ވާގޮތުން ދެކުނުގެ އަތޮޅުތަކުގައި 31 ގޭންގު އެބައޮތެވެ. މީގެ ތެރެއިން 17 ގޭންގު ގުރޫޕް ހަރަކާތްތެރިވެއެވެ.
ލ. ގަމުގައި މިހާރު ކުރިއަށްދާ ވިއަވަތި ކޮންފަރެސްގެ ތެރެއިން ފުލުހުންގެ މުއައްސަސާއިން ހުށަހަޅައިދިން "އަމާން މުޖުތަމައު" ޕްރެޒެންޓޭޝަންގައި ވާގޮތުން ދެކުނުގެ އަތޮޅުތަކުގައި ހަރަކާތްތެރިވާ ގޭންގުތަކުގައި ސީދާ ދެކުނުގެ ރަށްތަކަށް ނިސްބަތްވާ 1506 މީހުން އެބަތިއްބެއެވެ. މީގެ ތެރެއިން 605 މީހުންނަކީ ދެކުނުގެ ރަށްރަށުގައި ދިރިއުޅޭ މީހުންނެވެ. އަދި 901 މީހުންނަކީ މާލޭގައި ދިރިއުޅޭ މީހުންނެވެ.
މިއިން ކޮންމެ ގޭންގެއްގައި ގޭންގްތަކުގެ އިސްމީހުން ނުވަތަ ގޭންގް ސްޓާރުންގެ ގޮތުގައި 700 މެމްބްރަރުން ތިބެއެވެ. އަދި 100 ކުޑަކުދިންވެސް ހަރަކާތްތެރިވާކަމަށް ފުލުހުން ވިދާޅުވެއެވެ.
ފުލުހުން ހާމަކުރައްވާ ގޮތުގައި 2007ވަނަ އަހަރުން ފެށިގެން ގޭންގު މާރާމާރިއާ ގުޅިގެން 32 މީހަކު މަރާލާފައިވެއެވެ. އޭގެ ތެރޭގައި ދެކުނަށް ނިސްބަތްވާ 6 މީހުން ހިމެނެއެވެ. މިފަދަ މާރާމަރީތަކާ ގުޅިގެން މީހުން މެރުމުގައި ހިމެނޭ މީހުންގެ ތެރެއިން 185 މީހުންނަކީ ދެކުނުގެ އަތޮޅުތަކަށް ނިސްބަތްވާ މީހުންނެވެ. އަދި މީގެ ތެރޭގައި 21 ކުޑަކުދިންވެސް މިފަދަ މައްސަލަތަކުގައި ހިމެނެއެވެ. އެ މީހުންގެ ތެރޭގައި ހިމެނެނީ އައްޑޫ ސިޓީއަށް ނިސްބަތްވާ 30 މީހަކާއި ފުވައްމުލަަކަށް ނިސްބަތްވާ 17 މީހަކާއި ގދ.އަތޮޅުގެ ރަށްތަކަށް ނިސްބަތްވާ 15 މީހަކާއި ގއ. އަތޮޅުގެ ރަށްތަކަށް ނިސްބަތްވާ 12 މީހަކާއި ލ. އަތޮޅުގެ ރަށްތަކަށް ނިސްބަތްވާ 15 މީހަކާއި ތ. އަތޮޅުގެ ރަށްތަކަށް ނިސްބަތްވާ 4 މީހެކެވެ.
ވަކިވަކި އަތޮޅަށް ބަލާއިރު ގޭންގުތަކަށް ނިސްބަތްވާ 250 މީހުންނަކީ އައްޑޫ ސިޓީގެ އެކި ރަށްތަކަށް ނިސްބަތްވާ މީހުންނެވެ. ގޭންގުތަކުގައި ފުވައްމުލަކު ސިޓީއަށް ނިސްބަތްވާ 160 މީހުން އެބަތިއްބެވެ. ހުވަދޫގެ ދެ އަތޮޅުގެ ތެރެއިން ގދ.ގެ 223 މީހުން ތިބިއިރި ގއ. ގެ 112 މީހުން ގޭންގުތަކުގައި އުޅެއެވެ.
މި އަތޮޅުތަކުގެ ތެރެއިން ގޭންގު ހަރަކާތް އެންމެ ކުޑައީ ދ.އަތޮޅުގައެވެ. އެ އަތޮޅުގައި ގޭންގު ހަރަކާތްތަކުގައި އުޅޭ ކަމަށް ރެކޯޑް ފޮތުގައި އޮތީ 15 މީހުންނެވެ. ތ.އަތޮޅުގެ އެކި ރަށްތަކަށް ނިސްބަތްވާ 103 ގޭންގް މީހުން ގޭންގުތަކާގުޅި ކުށަށް އަރައިގަތުމުގައި އުޅެއެވެ.
ގޭންގުތަކުން ހިއްގާ ކަންތައްތަކާ ގުޅިގެން ފާއިތުވި ދެ އަހަރުދުވަހުގެ 1180 މީހަކު ވަނީ ހައްޔަރުކޮށްފައެވެ. މީގެ ތެރޭގައި 5 ފަހަރަށްވުރެ ގިނަ ފަހަރު ހައްޔަރުކުރި މީހުންވެސް ހިމެނެއެވެ. މިގޮތުން 792 މީހަކު މިފަދަ މައްސަލަތަކާ ގުޅިގެން 1 ފަހަރު ހައްޔަރުކޮށްފައިވެއެވެ. އަދި 47 މީހަކު ވަނީ ފާއިތުވި ދެއހަރު ދުވަހުގެ ތެރޭގައި 5 ފަހަރަށްވުރެ ގިނަ ފަހަރު ހައްޔަރުކޮށްފައެވެ. މީގެ އިތުރުން 341 މީހުންނަކީ 2 ފަހަރާއި 4 ފަހަރު ހައްޔަރުކޮށްފައިވެއެވެ.
ފުލުހުން ހާމަކުރައްވާގޮތުގައި އެއް އަވަށުން އަނެއް އަވަށަށް ނުވަތަ އެއް ރަށުން އަނެއް ރަށާސް ގޮސް މާރާމާރި ހިންގުން މިހާރު އާއްމުވެފައިވާކަމަށެވެ. އަދި އަދި މިހާރު ތޫނު ހަތިޔާރު ބޭނުން ކުރުމާއި މަސްތުވާތަކެތީގެ ވިޔަފާރި ފުޅާކުރަމުން އަންނަކަމަށްވެސް ފުލުހުން ވިދަޅުވެއެވެ. މީގެ އިތުރުން މި ގޭންގުތަކުން މާލޭގައި ހަރަކާތްތެރިވާ ގުރޫޕްތަކާ ގުޅުން ބޭއްވުމާއި ސޯޝަލް މީޑިއާގައި ގޭންގުތައް ޕްރޮމޯޓް ކުރުމުގެ އިތުރަށް ސްޕޯޓްސް ކުލަބްތައް ރަޖިސްޓްރީ ކުރަމުން އަންނަކަމަށް ވަނީ ރިޕޯޓް ކުރެވިފައެވެ. މީގެ އިތުރަށް ގެންގުތަކަށް މީހުން ވެއްދުމުގެ މަސައްކަތްވެސް އަންނަނީ ކުރަމުންނެވެ. މި ނޫނަސް ގޭންގުތަކުން ސިޔާސީ ފަރާތްތަކަށާއި ޝަރުޢީ ދާއިރަށްއަށް ނުފޫޒް ފޯރުވަމުން އަންނަކަމަށް ފުލުހުން ހާމަކުރައްވައެވެ.