އިޤްތިސާދީގޮތުން އަންހެނުން ބާރުވެރިކުރުވުމަށް ސަރުކާރުން ގިނަ މަސައްކަތްތަކެއްކުރައްވަމުން ގެންދަވާ ކަމަށް އިކޮނޮމިކް މިނިސްޓަރ ފައްޔާޟު އިސްމާޢީލް ވިދާޅުވެއްޖެއެވެ.
ވިއަވަތި ރާއްޖެ ކޮންފަރެންސްގައި "މިންތީގެ ހަމަހަމަކަން"މި މައުޟޫއަށް ބޭއްވި ސެޝަންގައި ވާހަކަފުޅުދައްކަވަމުން އިކޮނޮމިކް މިނިސްޓަރ ފައްޔާޟު އިސްމާޢީލް ވިދާޅުވީ، އިޤްތިސާދީގޮތުން އަންހެނުން ބާރުވެރިކުރުވުމަށް، ރަށްރަށުގައި އަންހެނުންނަށް ވިޔަފާރީގެ ދާއިރާއިން ހުރި ފުރުސަތުތަކުގެ މައުލޫމާތުތައް ހޯދުމުންދާ ކަމަށެވެ. އެގޮތުން އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކާ ގުޅިގެން މަޢުލޫމާތުތައް ހޯދުމަށްފަހު، އަންނަ މަހުގެތެރޭގައި ރަށްރަށުގައި ޚާއްސަ ޕްރޮގްރާމްތަކެއް ކުރިއަށްގެންދިޔުމަށް ރާވާފައިވާކަމަށް މިނިސްޓަރ ފައްޔާޟު ވިދާޅުވިއެވެ.
"ހުރިހާ ރީޖަންތަކެއްގައި، އެބަ ފަށަން ޕްރޮގްރާމްތަކެއް، ކޮންމެ ރަށެއްގައި، ޑަބްލިއުޑީސީއާއި ކައުންސިލްތަކާ ގުޅިގެން، އަންހެނުންނަށް ހުރި ފުރުސަތުތައް ބަލައި އެކަމުގައި ފެށުނީއްސުރެ ކާމިޔާބުވަންދެން ސަރުކާރުގެ ރޯލަކީ ކޮބައިތޯ ބަލައިގެން އެކަން ކުރުމަށް، އެގޮތަށް އެ މަސައްކަތް ނުކޮށް، އަވަސް ގޮތަކަށް، އިޤްތިސާދީ ބާރުވެރިކަން އަންހެނުންނަށް ލިބުމުގައި ބޮޑެތި ގޮންޖެހުންތަކެއް ހުންނާނެ." މިނިސްޓަރ ފައްޔާޟު ވިދާޅުވިއެވެ.
އަންހެނުން ބާރުވެރިކުރުމަށް ސަރުކާރުންވަނީ ސިޔާސަތުތަކަށާއި، ގަވާއިދުތަކަށް ބަދަލުތައް ގެނެސްފައެވެ. މިކަންތައްތަކާއެކުވެސް އިޤްތިސާދީ ބާރުވެރިކަމުގައި ޙާލަތު ދަށްކަމަށް މިނިސްޓަރ ފައްޔާޟު ފާހަގަކުރެއްވިއެވެ.
އަންހެނުންނަށް އިޤްތިސާދީގޮތުން ފުރުސަތުތައް އިތުރުކޮށްދިނުމަށް، ކުރައްވަމުންދާ މަސައްކަތްތަކުގެ އިތުރު ތަފްސީލްތައް ދެއްވަމުން މިނިސްޓަރ ފައްޔާޟު ވިދާޅުވީ، އެސްޑީއެފްސީ މެދުވެރިކޮށް އަންހެނުން ހިނގާ ވިޔަފާރިތަކަށް 280 މިލިއަން ރުފިޔާ ދޫކޮށްފައިވާ ކަމަށެވެ.
"ބީސީސީން ހިންގާ ޕްރޮގްރާމްތަކުގެތެރެއިން، އަންހެން ބޭފުޅުންނަށް ވަރަށްގިނަ ޕްރޮގްރާމްތަކެއް ހިނގިއްޖެ، އެސްޑީއެފްސީ 280 މިލިއަން ރުފިޔާގެ ލޯނު ދޫކޮށްފި އަންހެން ބޭފުޅުންނަށް ނުވަތަ އަންހެން ބޭފުޅުން ހިއްސާވާ ވިޔަފާރިތަކަށް، އޮތެންޓިކް މޯލްޑިވްސް ފިހާރަތަކުންވެސް އަންހެނުންގެ އުފެއްދުންތައް ބާޒާރަށް ގެންދެވިއްޖެ،" ފައްޔާޟު ވިދާޅުވިއެވެ.
މިނިސްޓަރ ވިދާޅުވީ ސަރުކާރުން ރަށްރަށުގައި ކުރިއަށްގެންދާ ޢުމްރާނީ ތަރައްޤީގެ މަޝްރޫޢުތަކާ އެކުވެސް ވިޔަފާރިގެ ފުރުސަތުތައް ފަހިވެގެންދާ ކަމަށެވެ. އަދި އާރުޓީއެލް ފެރީ ނިޒާމާއެކުވެސް ރަށްރަށުގެ އިޤްތިސާދުތަކަށް ބޮޑެތި ކުރިއެރުންތަކެއް ލިބިގެންދާނެކަން މިނިސްޓަރ ފައްޔާޟު ފާހަގަކުރެއްވިއެވެ.