ނޭޝަނަލް އެޕްރެންޓިސްޓިޕް ޕްރޮގްރާމްގައި ބައިވެރިވާ ކުދިންގެ ޢަދަދު އިތުރުވަމުންދާކަމަށް މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޙްލޫފް ވިދާޅުވެއްޖެއެވެ.
މިނިސްޓަރ މަހްލޫފް މިހެން ވިދާޅުވީ އެމްޕީއެލްގެ އެޕރެންޓިސްޝިޕް ޕްރޮގްރާމްގައި ބައިވެރިވި ދަރިވަރުންނަށް ސެޓްފިކެޓް ދިނުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
އެމްޕީއެލްގެ އެޕރެންޓިސްޝިޕް ޕްރޮގްރާމްގައި ބައިވެރިވި ދަރިވަރުންނަށް ސެޓްފިކެޓް ދިނުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ވިދާޅުވީ ޕްރޮގްރާމް 2020 ވަނަ އަހަރު ފެށިއިރާއި މިހާރާ އަޅާ ބަލާއިރު ބައިވެރިވާ ކުދިންގެ ޢަދަދު ކޮންމެ ފަހަރަކުވެސް އިތުރުވަމުންދާކަމަށެވެ.
ހަމައެއާއެކު ބައިވެރިވާ ދަރިވަރުންގެ ތެރެއިން ކުންފުނިތަކުގެ ދާއިމީ ވަޒީފާއަށް ވަންނަ ކުދިންގެ ނިސްބަތްވެސް އިތުރުވަމުންދާކަން މިނިސްޓަރވަނީ ފާހަގަކުރައްވާފައެވެ. މީގެއިތުރުން އެހެން ކުންފުނިތަކާއި ޚިލާފަށް އެމްޕީއެލްގެ އެޕްރެންޓިސްޝިޕް ޕްރޮގްރާމް މާލެއިން ބޭރަށް އަތޮޅުތެރެއަށް ފުޅާކޮށްފައިވާކަން ފާހަގަކުރައްވާ މިނިސްޓަރ ވިދާޅުވީ އެއީ ޕްރޮގްރާމް އެހެން ޙަރުފަތަކަށް ގެންދެވުނުކަމެއްކަމަށެވެ.
"އެމްޕީއެލްގެ ޕްރޮގްރާމްގައި ބައިވެރިވި 20 ކުދިންގެ ތެރެއިން 18 ކުއްޖަކަށް ވަޒީފާވަނީ ހަމަޖެހިފައި. އެޗްޑީސީގެ ޕްރޮގްރާމަށް ވަތް ގާތްގަނޑަކަށް 60 ކުދިންގެ ތެރެއިން ޕްރޮގްރާމް ނިންމި 36 ކުދިންގެ ތެރެއިން 30 ކުއްޖަކަށް ވަޒީފާވަނީ ހަމަޖެހިފައި. މިނިސްޓަރ ވިދާޅުވިއެވެ.
އެމްޕީއެލްގެ އެޕްރެންޓިސްޝިޕް ޕްރޮގްރާމާއި ގުޅޭގޮތުން އެކުންފުނީގެ ސީއީއޯ ޝާހިދު ޢަލީ ވިދާޅުވީ އެކުންފުނީގެ އަމާޒު ހުރީ ޤައުމީ ޚިދުމަތެއްގެ ގޮތުގައި ދެކިގެން ވަޒީފާއަށް ޝައުގުވެރިވާ ޒުވާނުންތަކެއް ބިނާކުރުންކަމަށެވެ. އަދި މިކަމުގައި ކުންފުނިން ކުރަމުންދާ މަސައްކަތް ކާމިޔާބުކުރުމަށް މިލިބޭ ފުރުސަތުގެ ބޭނުން ހިފުމަކީ މުހިއްމުކަމެއްކަމުގައި ޝާހިދު ވަނީ ވިދާޅުވެފައެވެ.
ނޭޝަނަލް އެޕްރެންޓިސްޝިޕް ޕްރޮގްރާމްގެ ދަށުން 2020 ވަނަ އަހަރުން ފެށިގެން އެމްޕީއެލްއާއި އެހެނިހެން ކުންފުނިތަކުގެ ދަށުން އަންނަނީ ޒުވާނުން ތަމްރީން ކުރަމުންނެވެ. އެމްޕީއެލްގެ ޕްރޮގްރާމްގައި ބައިވެރިންނަށް ކާޕެންޓްރީއާއި، ހެވީ ވެހިކަލްތަކާއި، ޓަގް ބޯޓު އޮޕަރޭޝަން އިންޖިނިއަރިންގއާއި ވެލްޑިންގއާއި ހެލްތް އެންޑް ސޭފްޓީއާއި އެޑްމިނިސްޓްރޭޝަން ދާއިރާއިން 20 ކުއްޖަކު ތަމްރީންކޮށްފައެވެ. 2020 ވަނަ އަހަރުން ފެށިގެން މިހާތަނަށް 100 އަށްވުރެ ގިނަ ދަރިވަރުން އެމްޕީއެލްއިން ތަމްރީންކޮށްފައިވާކަމަށް އެކުންފުނިންގ ހާމަކުރެއެވެ.