އަމީނީ މަގު ތަރައްޤީކުރުމުގެ މަސައްކަތުގައި ސަރުކާރާއި ސިޓީ ކައުންސިލް އޮތީ އެކުގައި - އަކްރަމް ކަމާލުއްދީން
މާލޭގެ އަމީނީ މަގު ތަރައްޤީކުރުމުގެ މަޝްރޫޢުގައި ސަރުކާރާއި މާލެ ސިޓީ ކައުންސިލާ ތިބީ އެކުއެކީގައި އެއް އަޒުމެއްގައިކަމަށް މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފާރާސްޓްރަކްޗަރގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވެއްޖެއެވެ.
މާލޭގެ އަމީނީ މަގު ޒަމާނީ ފެންވަރަށް ތަރައްޤީކުރުމުގެ ޢަމަލީ މަސައްކަތް ފެށުމުގެ ރަސްމިއްޔާތުގައި ވާހަކަދައްކަވަމުން، އަކްރަމް ކަމާލުއްދީން ވިދާޅުވީ ޚިޔާލު ތަފާތުވުންތަކާއެކުވެސް، ރައްޔިތުންގެ ލާބައާއި މަންފާ ހުރި މަސައްކަތްތަކުގައި އެކުއެކީ މަސައްކަރް ކުރުން ވަރަށް މުހިންމުކަމަށެވެ.
މި ޕްރޮޖެކްޓް ވަކި މަޝްރޫޢުއެއްގެ ގޮތުގައި ޕްލޭނިން މިނިސްޓްރީއިން ރޯޑް ޑިވެލޮޕްމަންޓް ކޯޕަރޭޝަނާ ހަވާލުކުރުމުން، މާލެ ސިޓީ ކައުންސިލުންވަނީ އެކަމާ ދެބަސްވުންތަކެއް ފާޅުކޮށްފައެވެ. މިއީ ކުރިން ފެށި މާލޭގެ ސްޓްރީޓް ސްކޭޕިން މަޝްރޫޢުގައި ސިޓީ ކައުންސިލުން ހިމަނާ، އާރްޑީސީއާ ހަވާލުކުރި މަސައްކަތެއްކަމަށް ބުނަމުންނެވެ.
ނަމަވެސް މި މަޝްރޫޢުގެ މަސައްކަތަކީ މާލޭގެ ސްޓްރީޓް ސްކޭޕިންގެ 13 ސެގްމަންޓް، އާރްޑީސީއާއި ހަވާލުކުރި އިރު ހިމެނި މަސައްކަތެއް ނޫންކަމަށް އާރްޑީސީން އަދި ޕްލޭނިން މިނިސްޓްރީއިންވެސް ވަނީ ޔަގީންކޮށްދީފައެވެ.
އަމީނީ މަގުގެ މަސައްކަތަކީ ސީދާ ޕްލޭނިން މިނިސްޓްރީއިން ރޯޑް ޑިވެލޮޕްމަންޓް ކޯޕަރޭޝަނާ މުޅިން އަލަށް ހަވާލުކުރި މަޝްރޫޢުއެކެވެ. އަކްރަމް ވިދާޅުވީ މި ދެބަސްވުންތައް ފިލާ، މިހާރު ސަރުކާރާ އެއް މިސްރާބެއްގައި ކައުންސިލާއެކު މަސައްކަތް ކުރަމުންދާކަމަށެވެ.
"މިއީ ގިނަ ބަހުސްތަކެއް ދިޔަ މަސައްކަތެއް. މިއަދު މިތިބީ ސިޓީ ކައުންސިލާ އެކީގައި، އެއް އަޒުމެއްގައި މާލޭގެ ތަރައްޤީގެ މި މުހިންމު މަޝްރޫޢު ކުރިއަށް ގެންދިއުމުގެ އަޒުމުގަ." އަކްރަމް ކަމާލުއްދީން ވިދާޅުވިއެވެ.
މާލެ ސިޓީ ކައުންސިލްގެ މޭޔަރ ޑރ.މުޙައްމަދު މުއިއްޒުވެސް ވަނީ މި މަޝްރޫޢުގައި ކައުންސިލްގެ ފުރިހަމަ އެއްބާރުލުން ދެއްވާނެކަމަށް ވިދާޅުވެފައެވެ.
އަދި މި މަޝްރޫޢުއަކީ މާލޭގެ ރައްޔިތުން އެތަށް ޒަމާންތަކަށް ބޭނުންވެ ތިބި ކަމަކަށްވާތީ، މަސައްކަތް ފުރިހަމަވުމުގެ ބޭނުން ބޮޑުކަމަށެވެ.
އަމީނީ މަގުގެ މަސައްކަތް އާރްޑީސީއާ ހަވާލުކޮށްފައިވަނީ ރާތުއަޅާ، 7 މަސް ދުވަހުން ނިންމުމަށެވެ.