ސިންގަޕޫރުގައި ކުރިއަށްދާ ނަޓާސް ހޮލިޑޭސް ފެއަރގައި ރާއްޖެއިން ބައިވެރިވެއްޖެއެވެ.
'އޯލް ތިންގްސް މޯލްޑިވްސް'ގެ ނަމުގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ / ވިޒިޓް މޯލްޑިވްސް) އާއި އިންޑަސްޓްރީ ޕާޓްނަރުން އެކުގައި ރާއްޖޭގެ ފަތުރުވެރިކަމުގެ ޕްރޮޑަކްޓްތަކާއި ތަފާތު ތަޖުރިބާތައް މިފެއަރގެ ތެރެއިން ދަނީ އިޝްތިހާރުކުރަމުންނެވެ.
އޯގަސްޓް މަހުގެ 12 - 14 އަށް ސިންގަޕޫރު އެކްސްޕޯ ހޯލްގައި ކުރިއަށްދާ މި ފެއަރގައި ހިންގާ ހަރަކާތްތައް އަމާޒުކޮށްފައިވަނީ ދެކުނުއިރުމަތީ އޭޝިއާ މާކެޓު، ހާއްސަކޮށް ސިންގަޕޫރުގައި ރާއްޖޭގެ ބްރޭންޑް އިތުރަށް ޕްރޮމޯޓުކުރުމަށެވެ.
1987 ވަނަ އަހަރު ފެށިގެން ބާއްވަމުންދާ ނަޓާސް ޓްރެވަލް ފެއަރއަކީ ފަތުރުވެރިކަމުގެ އެކި މަންޒިލްތަކުގެ ޕްރޮޑަކްޓްތަކާއި ދަތުރުފަތުރުގެ ޑީލްތައް މާކެޓުކުރުމަށް ފުރުސަތު ދިނުމަށް އަހަރަކު ދެ ފަހަރު ބާއްވާ ފެއަރއެކެވެ. މިދިޔަ އަހަރުތަކުގައި ނާޓާސްއިން ފެެއާއަށް ވަނީ ޖުމްލަ 2.4 މިލިއަނަށްވުރެ ގިނަ މީހުން ޒިޔާރަކޮށްފައެވެ. މިއީ ސިންގަޕޫރުގެ ރައްޔިތުންގެ މެދުގައި އެންމެ މަގުބޫލު އެއް ޓްރެވަލް ފެއަރއެވެ. މި ފެއަރއަކީ މެމްބަރު މަންޒިލްތަކާއި އުފެއްދުންތަކާއި ޓްރެންޑްތައް މާކެޓްކުރުމަށް ގިނަ ފުރުސަތުތައް އޮތް ހަރަކާތެކެވެ.
އެވަރެޖްކޮށް 100،000 އަށް ވުރެ ގިނަ މީހުން ޒިޔާރަތްކުރާ މި ފެއަރގައި އައުޓްބައުންޑް ޓްރެވަލް އޭޖެންޓުންނާއި ގައުމީ ފަތުރުވެރިކަމުގެ ޖަމިއްޔާތަކާއި އެއަރލައިންތަކާއި ހޮޓަލްތަކުގެ އިތުރުން ދަތުރުފަތުރާ ގުޅުން ހުރި އެހެނިހެން ހިދުމަތްތައް ފޯރުކޮށްދޭ ފަރާތްތަކަށް އެއްތަނަކުން ބައްދަލުކުރުމުގެ ފުރުސަތު ލިބެއެވެ.
އެމްއެމްޕީއާރުސީ އާއެކު މި ފެއަރގައި ރާއްޖޭގެ 12 ކުންފުންޏަކުން 23 ފަރާތެއް ބައިވެރިވަމުން އެބަދެއެވެ. ފެއާގެ ޒަރިއްޔާއިން ރާއްޖެ އަކީ ދެކުނުއިރުމަތީ އޭޝިއާގެ، ހާއްސަކޮށް ސިންގަޕޫރުގެ ފަތުރުވެރިންނަށް ފަސޭހައިން ދަތުރުކުރެވޭ، ކައަރި މަންޒިލެއް ކަމަށާއި، ސަގާފީ އެކިއެކި ކަންކަމުގެ އެއްގޮތްކަމުގެ ސަބަބުން ރާއްޖެ މިއީ މި މާކެޓުގެ ފަތުރުވެރިން ދަތުރުކުރުމަށް އެންމެ އެކަށީގެންވާ މަންޒިލްގެ ގޮތުގައި މާކެޓް ކުރާނެ ކަމަށް އެމްއެމްޕީއާރުސީން ހާމަކުރެއެވެ.
މި ފެއަރއާ ދިމާކޮށް ސިންގަޕޫރުގައި ރާއްޖެ އިޝްތިހާރުކުރުމަށް އައުޓްޑޯ އެޑްވަޓައިޒިންގ ކެމްޕޭނެއް ވެސް އެމްއެމްޕީއާރުސީއިން ދަނީ ހިންގަމުންނެވެ. މި ކެމްޕެއިންގެ ދަށުން ސިންގަޕޫރުގެ ފާހަގަކޮށްލެވޭ ސަރަޙައްދުތަކުގައި ޑެސްޓިނޭޝަން ވީޑިއޯ ދައްކާ އިޝްތިހާރު ކުރަމުންދެއެވެ. މިގޮތުން އެޗްޑީބީ ހަބް، ޖޫރޮންގް ޕޮއިންޓް، އަދި ބެޑޮކް ޓައުން ސްކުއަރ ފަދަ ތަންތަނުގައި ރާއްޖޭގެ ޑެސްޓިނޭޝަން ވީޑިއޯ ދައްކަމުންދެއެވެ.
ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީ އިން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާޓްނަރުންނާއެކު 22 މާކެޓެއްގައި 260 ހަރަކާތް ވަނީ ހިންގާފައެވެ. މީގެތެރޭގައި ފެއަރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، އެކި ޤައުމުތަކުގައި ރޯޑްޝޯތައް ވެސް ވަނީ ބާއްވާފައެވެ.