1.6 މިލިއަން ފަތުރުވެރިންގެ އަމާޒު ކުރިއަށް އޮތް 3 މަސް ދުވަސްތެރޭ ހާސިލްކުރެވޭނެ: މިނިސްޓްރީ

1.6 މިލިއަން ފަތުރުވެރިންގެ އަމާޒު ކުރިއަށް އޮތް 3 މަސް ދުވަހުގެ ތެރޭގައި ހާސިލްކުރެވޭނެ ލަފާކުރެވޭކަމަށް މިނިސްޓްރީ އޮފް ޓޫރިޒަމްއިން ވިދާޅުވެއްޖެއެވެ.

މިއަހަރުގެ ކުރީކޮޅު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ މިއަހަރު ރާއްޖެއިން 1.6 މިލިއަން ފަތުރުވެރިންނަށް މަރުޙަބާ ކިއުމަށް ލަނޑުދަނޑި ކަނޑައަޅާފައިވާކަން އިއުލާން ކުރައްވާފައެވެ. މި އަމާޒު ހާސިލް ކުރުމަށް ސަރުކާރުންނާއި ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުން ގެންދަނީ ގިނަ މަސައްކަތްތަކެއް ކުރަމުންނެވެ.

މިއަހަރު ރާއްޖެއަށް އައި 1 މިލިއަންވަނަ ފަތުރުވެރިޔާއަށް މަރުހަބާ ކިޔުމަށް ވެލާނާ އިންޓަރނޭޝަނަލް އެއަރޕޯޓުގައި ބޭއްވި ހަރަކާތުގެ ތެރެއިން ނޫސްވެރިންނާ ވާހަކަދައްކަވަމުން މިނިސްޓަރ އޮފް ސްޓޭޓް ފޮރ ޓޫރިޒަމް ޑރ. އަޙްމަދު ޞާލިޙު ވިދާޅުވީ، 1.6 މިލިއަން ފަތުރުވެރިންގެ އަމާޒު މިއަހަރުގެ އޮކްޓޫބަރު ނޫނީ ނޮވެމްބަރުމަހު ހާސިލްކުރެވޭނެ ކަމަށެވެ.

"1.6 މިލިއަން ފަތުރުވެރިންގެ އަމާޒު ހާސިލްކުރެވޭނެ، މިއަހަރުގެ އޮކްޓޫބަރު ނޫނީ ނޮވެމްބަރު ހިސާބު މި އަމާޒު ހާސިލްކުރެވޭ ކަމުގެ އުއްމީދު ބޮޑު،" ޞާލިހު ވިދާޅުވިއެވެ.

ރާއްޖެއަށް އަހަރުގެ މިހާތަނަށް 1 މިލިއަން ފަތުރުވެރިން ޒިޔާރަތްކޮށްފައިވާއިރު، ރާއްޖެއިން ހިފާފާފައިވާ 1.6 މިލިއަން ފަތުރުވެރިންގެ އަމާޒު ހާސިލްކުރުމަށް ދެން ބޭނުންވަނީ 6 ލައްކަ ފަތުރުވެެެރިންނެވެ.