ކުރިއަށްއޮތް ރިޔާސީ އިންތިހާބުގައި އެމްޑީޕީން ވާދަކުރާނެ ކެނޑިޑޭޓެއް ކަނޑައެޅުމަށް ބާއްވާ ޕްރައިމަރީއާ ގުޅޭ އިސްލާހެއް އަސާސީ ގަވާއިދަށް ގެނައުމަށް ކޮންގްރެސްއަށް ހުށަހަޅާފައިނުވާކަމަށް އެމްޑީޕީން ބުނެފިއެވެ.
އެމްޑީޕީގެ ޕްރައިމަރީ ބޭއްވުމަށް ހަމަޖެހިފައި ވަނީ މިމަހުގެ 19 ވަނަ ދުވަހު ސޯޝަލް ސެންޓަރުގައެވެ.
މިމަހުގެ 19 ގައި ސޯޝަލް ސެންޓަރުގައި ބާއްވާ އެމްޑީޕީގެ ކޮންގްރެސްގައި ކުރިއަށްދާނެ ކަންކަމުގެ ތެރޭގައި އެމްޑީޕީގެ އަސާސީ ގަވާއިދަށް އިސްލާހު ހުށަހަޅަން ބޭނުންވާ ފަރާތްތަކަށް އެ ފުރުސަތު ދިނުން ހިމެނެއެވެ. އަދި ކުރިއަށް އޮތް ތަނުގައި އެމްޑީޕީން ހަރަކާތްތެރިވާނެ ގޮތުގެ ހުށަހެޅުންތައް ހުށަހެޅުންވެސް ކޮންގްރެސްގައި ކުރިއަށްދާނެއެވެ.
އެމްޑީޕީގެ ކޮންގްރެސްއާ ގުޅޭގޮތުން މައުލޫމާތު ދެއްވަމުން ކޮންގްރެސް ކޮމިޓީގެ މުޤައްރިރު އަދި އެޕާޓީގެ ޗެއާޕާސަންގެ ނައިބު އިދާރީ އިބްރާހީމް ވަހީދު ވިދާޅުވީ ކޮންގްރެސްއަށް، ރިޔާސީ ޓިކެޓް ދިނުމާ ބެހޭ އެއްވެސް އިސްލާހެއް ހުށަހަޅާފައި ނުވާ ކަމަށެވެ. އަދި މިފަހަރުގެ ކޮންގްރެސްއަށް އެފަދަ ކަމެއް ހުށަހެޅުމުގެ ފުރުސަތުވެސް މިހާރު ނެތް ކަމަށް އޭނާ ވިދާޅުވިއެވެ.
"އަަޅުގަނޑަށް ހީވާ ގޮތުން ހުރިހާ ބޭފުޅުން ވެސް އަސާސީ ގަވައިދާ ބެހޭ ގޮތުން ކޮންސާނަކަށް ވަނީ ރިޔާސީ ޓިކެޓް. އެކަހަލަ އެއްވެސް ކަމެއް ނެތް އެނގޭތޯ. އެއްވެސް ބޭފުޅަކު އިސްލާހެއް ހުށަހަޅާފައެއް ނެތް އެގޮތަކަށް،" އިބްރާހިމް ރަޝީދު ވިދާޅުވިއެވެ.
އިބްރާހިމް ރަޝީދު ވިދާޅުވީ ކޮންގްރެސްއަށް ހުށަހެޅުމަށްޓަކައި އަސާސީ ގަވާއިދަށް މައިގަނޑު ގޮތެއްގައި ހުށަހަޅާފައި ހުރީ ޕާޓީ ހިންގަން ފަސޭހަކުރުމަށްޓަކައި ގެންނަ އިސްލާހުތަކެއް ކަަމަށެވެ. އަދި އަސާސީ ގަވައިދުގައި އޮޅުން އަރާ ގޮތަށް ހުރި ބައެއް ކަންތައްތައް ރަނގަޅުކުރަންވެސް އިސްލާހުތައް ހުރިކަން އޭނާ ފާހަގަކުރެއްވިއެވެ.