ސަލާމަތާއި ރައްކާތެރިކަމަށް ބުރޫއަރާ ފަދަ ކަމެއް ފާހަގަކުރެވިއްޖެނަމަ ތަހުޤީގުކުރާނެ: އައިލެންޑް އޭވިއޭޝަން
ފަސިންޖަރުންނާއި ކުރޫއިންގެ ސަލާމަތާއި ރައްކާތެރިކަމަށް ބުރޫއަރާ ފަދަ އެއްވެސް ކަމެއް ފާހަގަކުރެވިއްޖެ ޙާލަތެއްގައި އެކަމެއް ތަހުޤީގުކުރާނެކަމަށް ޤައުމީ އެއަރލައިން، މޯލްޑިވިއަން ހިންގާ އައިލެންޑް އޭވިއޭޝަން ސަރވިސް ލިމިޓެޑުން ބުނެފިއެވެ.
އައިލެންޑް އޭވިއޭޝަނުން މިހެން ބުނެފައި މިވަނީ މޯލްޑިވިއަންގެ ސީ ޕްލޭން ފްލައިޓެއްގެ ދަތުރުމަތިން ބޯޓުގެ ކެޕްޓަން އެއް އިންޖީނު ނިއްވާލިކަމަށް ބުނެ ވާހަކަތަކެއް ދެކެވެމުންދާ ދަނޑިވަޅެއްގައެވެ.
އައިލެންޑް އޭވިއޭޝަނުން މިއަދު ނެރުނު ބަޔާނެއްގައި ބުނީ މޯލްޑިވިއަންގެ ބޯޓުތަކުން ދަތުރު ކުރައްވާ ފަސިންޖަރުންނާއި ކުރޫއިންގެ ސަލާމަތާއި ރައްކާތެރިކަމަށް އެ ކުންފުނިން އަބަދުވެސް ވަރަށް ބޮޑު އިސްކަމެއްދެއްވާކަމަށެވެ.
އައިލެންޑް އޭވިއޭޝަނުން ބުނީ އެކުންފުންޏަކީ ދިވެހިރާއްޖޭގެ ސިވިލް އޭވިއޭޝަން އޮތޯރިޓީގެ ޤަވާއިދުތަކާއި އެއްގޮތަށް ހިންގަމުންދާ ކުންފުންޏެއްކަމަށެވެ. އަދި ފަސިންޖަރުންނާއި ކުރޫއިންގެ ސަލާމަތާއި ރައްކާތެރިކަމަށް ބުރޫއަރާ ފަދަ އެއްވެސްކަމެއް ފާހަގަކުރެވިއްޖެ ޙާލަތެއްގައި އެކަމެއް ތަހުޤީގުކޮށް، ރައްކާތެރިކަން ކަށަވަރު ކުރުމަށްޓަކައި އަޅަންޖެހޭ ހުރިހާ ފިޔަވަޅެއް އަޅާކަމުގެ ފުރިހަމަ ޔަޤީންކަން ދެއްވާކަމަށް އައިލެންޑް އޭވިއޭޝަންގެ ބަޔާނުގައިވެއެވެ. އަދި މިފަދަ ކަންތައްތަކަކީ ދިވެހިރާއްޖޭގެ ސިވިލް އޭވިއޭޝަން އޮތޯރިޓީއިންވެސް ވަރަށް ގާތުން ބަލަމުންދާ ކަންތައްތަކެއްކަން އައިލެންޑް އޭވިއޭޝަން ފާހަގަކޮށްފައިވެއެވެ.