ސޯޝަލް މީޑިއާގައި ލީކުވި ބަދުއަހުލާގީ އަމަލުތައް ހިންގާ ވީޑިއޯތަކުގެ މައްސަލައިގައި ހައްޔަރުކުރި 3 މީހެއްގެ މައްޗަށް ދައުވާކުރުމަށް ޕްރޮސެކިއުޓާ ޖެނެރަލް (ޕީޖީ)ގެ މަޝްވަރާއަށް ފުލުހުން ހުށަހަޅައިފިއެވެ.
މި މައްސަލައިގައި ހައްޔަރުކުރި މީހުންގެ ތެރެއިން ޕީޖީގެ މަޝްވަރާއަށް ފޮނުވާފައިވަނީ ބަންގްލަދޭޝްގެ އަލަމްގީރުއާއި ގާނޫނީ ވަކީލު ނާޒިމް އަބްދުއްސައްތާރާއި ފުލުހުންގެ ޑްރަގް އެންފޯސްމަންޓް ޑިޕާޓްމަންޓުގައި މަސައްކަތްކުރާ އަބްދުއްރަހްމާން ރަފީއުގެ މައްސަލަކަމަށް ޕީޖީ އޮފީހުން ވިދާޅުވިއެވެ.
ޕީޖީ އޮފީހުން ވިދާޅުވީ ފުލުހުން ފޮނުވާފައިވާ މައްސަލަތައް ދިރާސާކުރުމަށްފަހު ދައުވާކުރުމާމެދު ގޮތެއް ނިންމާނެކަމަށެވެ.
ބަދުއަހުލާގީ ވީޑިއޯތަކުގެ މައްސަލައިގައި މަޖިލީހުގެ ކުރީގެ މެމްބަރު މުހައްމަދު ނަޝީދުއާއި ނޫސްވެރިޔަކުވެސް ހައްޔަރުކުރިއެވެ. ނަމަވެސް އެމީހުންގެ މައްސަލަ ޕީޖީއަށް ފޮނުވާފައެއް ނުވެއެވެ.
މިމައްސަލައިގައި ބަޔަކު ހައްޔަރުކޮށްފައިވާއިރު، ބައެއް ވިއްސަކަށް މީހުންގެ ޕާސްޕޯޓް ވަނީ ހިފަހައްޓާފައެވެ. އަދި މިމައްސަލައިގައި ޝާމިލުވާކަމަށް ތުހުމަތުކުރެވިގެން ތަހުޤީޤްކުރަމުންދާ ބައެއް މީހުން ވަނީ އެ މީހުން މަސައްކަތްކުރާ އިދާރާތަކުން ސަސްޕެންޑްވެސްކޮށްފައެވެ.