ރަޝިޔާ ސިފައިން ޔޫކްރެއިނުގެ ސަރަޙައްދުތަކަށް އަރައި ފަށާފައިވާ ހަނގުރާމައިގައި ހިންގާފައިވާ އިންސާނިއްޔަތާ ޚިލާފު 26,000 އަށްވުރެ ގިނަ ހަނގުރާމައިގެ ކުށްތައް ތަހުޤީޤު ކުރަމުންދާ ކަމުގައި ޔޫކްރެއިނުން ބުނެފިއެވެ. މި ކުށްތައް ތަހުޤީޤު ކުރުމުގައި އިސްކޮށް ހަރަކާތްތެރިވާ އެ ޤައުމުގެ ޕްރޮސިކިއުޓަރ ޖެނެރަލްގެ އިސް އޮފިޝަލެއް ކަމުގައިވާ ޔޫރީ ބިލޫސޮފް ވިދާޅުވީ، ހަނގުރާމައިގެ ކުށް ހިންގިކަމުގެ ކުށް ސާބިތުވެ، ރަޝިޔާ ސިފައިންގެ 135 މީހެއްގެ މައްޗަށް މިހާރު ހުކުމް އިއްވާފައިވާ ކަމުގައެވެ.
ހުކުމް އިއްވާފައިވާ މީހުންގެ ތެރެއިން ޔޫކްރެއިން ސިފައިންނަށް މިހާތަނަށް ހައްޔަރު ކުރެވިފައި ވަނީ އެންމެ 15 މީހުންނެވެ. އަނެއް 120 މީހުން ހައްޔަރެއް ނުކުރެވެއެވެ. އިތުރު 13 މީހެއްގެ މައްސަލަ ޝަރިއަތަށް ހުށަހަޅާފައިވާ ކަމަށާއި، އިތުރު ހަތް މީހެއްގެ މައްޗަށް ހުކުމް ކޮށްފައިވާ ކަމުގައި ވެސް ބިލޫސޮފް ވިދާޅުވިއެވެ.
ރަޝިޔާއިން ޔޫކްރެއިނުގައި ހިންގަމުންދާ ހަނގުރާމައިގައި އިންސާނިއްޔަތާ ޚިލާފު އެތަކެއް ޖަރީމާއެއް ހިންގަމުންދާ ކަމުގައި ޔޫކްރެއިނުން ތުހުމަތު ކުރެއެވެ. އަދި، ރަޝިޔާ ސިފައިން ދަނީ، ޢާންމުން ދިރިއުޅޭ ގެތަކާއި ޢިމާރާތްތައް ނުރައްކާތެރި ހަމަލާތަކެއް ދެމުންނެވެ. މި ހަމަލާތަކުގައި ޢާންމުންގެ ގިނަ އަދަދެއްގެ ބަޔަކު މަރައިލާފައި ވާއިރު، މަރުވި މީހުންގެ ފުރިހަމަ އަދަދު ސާފުކޮށް ބުނެދޭން ޔޫކްރެއިނުގެ ސަރުކާރަށް ވެސް ވަނީ ހަނގުރާމަ ހިނގަމުންދާތީ ދަތިވެފައެވެ.
ހަނގުރާމައިގެ ކުށްތައް ހިންގިކަމުގެ ދައުވާ ސާބިތުވެ، ޔޫކްރެއިނުން ރަޝިޔާ ސިފައިންގެ މައްޗަށް އެންމެ ފުރަތަމަ ފަހަރަށް ހުކުމް އިއްވާފައި ވަނީ މޭ މަހުގެ ތެރޭގައެވެ. ހުކުމް އިއްވާފައި ވަނީ 21 އަހަރުގެ ރަޝިޔާ ސިފައިންގެ މީހެއްގެ މައްޗަށެވެ. އޭނާގެ މައްޗަށް އުމުރު ދުވަހުގެ ޖަލު ހުކުމެއް އިއްވާފައި ވަނީ ޔޫކްރެއިނުގެ ކުށެއް ނެތް ޢާންމު ރައްޔިތެއް މަރައިލުމުގެ ކުށުގައެވެ.
"ރަޝިޔާ ސިފައިންގެ ދަށް ރޭންކުތަކުގެ މީހުންގެ މައްޗަށް ދައުވާ ކުރަނީ ކީއްވެތޯ އަހަރުމެންނާ ސުވާލު ކުރެވޭ. އެ މީހުން ނޫންތޯ މި ޤައުމަށް އަރައި ހަނގުރާމަ ކުރަމުން އެ ދަނީ? މި ޤައުމުގެ ފަސްގަނޑުގައި ތިބީ އެ މީހުން. ރަޝިޔާގެ އިސް ޖެނެރަލުން ވެސް މި ޤައުމަށް އަރައި ހަނގުރާމައިގެ ކުށްތައް ކުރުމުން، އެ މީހުން ވެސް ހައްޔަރުކޮށް، ޝަރިއަތް ހިންގާނަން. ހައްޤު އަދަބު ދޭނަން،" ބިލޫސޮފް ވިދާޅުވިއެވެ.
ރަޝިޔާއިން ޔޫކްރެއިނަށް އަރައި ހިންގަމުންދާ ހަނގުރާމައާ ގުޅިގެން މިހާރު އެންމެ ހަރުކޮށް އިވޭ އެއް ބަހަކީ "ނިއުކްލިޔަރ ޓެރެރިޒަމް،" މި ބަހެވެ. ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވީ، ޔޫކްރެއިނާ ދެކޮޅަށް ރަޝިޔާގެ ރައީސް ވްލަޑިމިއަރ ޕުޓިން ނިއުކްލިޔަރ ޓެރެރިޒަމްގެ އަމަލުތައް ހިންގަމުންދާ ކަމުގައެވެ.
އޭނާ، މިހެން ވިދާޅުވެފައި ވަނީ، ޔޫކްރެއިނުގެ ދެކުނުގައިވާ ޒަޕޮރީޜިޔާގައި ހުންނަ ނިއުކްލިޔަރ ހަކަތަ އުފައްދާ ޕްލާންޓަށް ދެ ފަހަރެއްގެ މަތިން ރަޝިޔާ ސިފައިން ހަމަލާ ދިނުމާ ގުޅިގެންނެވެ. އެއީ މުޅި ވިލާތުގައި ހުންނަ އެންމެ ބޮޑު ނިއުކްލިޔަރ ހަކަތަ އުފައްދާ ޕްލާންޓެވެ. އެ ތަނަށް ދިން ހަމަލާތަކާ ގުޅިގެން ނިއުކްލިޔަރ ކާރިސާއެއް ފެށިދާނެ ކަމުގެ ބިރު މިހާރު ވަނީ އިތުރުވާން ފަށާފައެވެ.
ރަޝިޔާ ސިފައިން ދިން ކަމަށް ޔޫކްރެއިނުން ބުނާ ހަމަލާތަކުގައި ނިއުކްލިޔަރ ރޭޑިއޭޝަން ލީކުވާ މިންވަރު ދެނެގަތުމަށް އެ ޕްލާންޓުގައި ބޭނުން ކުރާ ތިން ސެންސަރ ހަލާކުވެފައިވާ ކަމަށް ޔޫކްރެއިނުން ބުނެއެވެ. އަދި، ހަމަލާތަކުގައި އެ ޕްލާންޓުގައި މަސައްކަތް ކުރާ މުވައްޒަފަކު ޒަޚަމްވި ކަމުގައި ވެސް އެ ޤައުމުން ބުނެއެވެ.