ޔޫކްރެއިނުގެ ދެކުނުގައިވާ ޒަޕޮރީޜިޔާގައި ހުންނަ ނިއުކްލިޔަރ ހަކަތަ އުފައްދާ ޕްލާންޓަށް ރަޝިޔާގެ ފައުޖުތަކުން އިތުރު ކޮރެޓް ހަމަލާތަކެއްދީފިއެވެ. ޔޫކްރެއިނުން ބުނީ، މި ހަމަލާތަކުގައި އެކަކު ޒަޚަމްވެފައިވާ ކަމުގައެވެ. އަދި، އެ ތަނުގައި ނިއުކްލިޔަރ ރޭޑިއޭޝަން ބޭރުވާ މިންވަރު ދެނެގަތުމަށް ބޭނުން ކުރާ އާލާތްތަކަށް ގެއްލުންވެފައިވާ ކަމުގައެވެ.
އޮގަސްޓު 5 ވަނަ ދުވަހު ވެސް އެ ނިއުކްލިޔަރ ޕްލާންޓަށް ވަރުގަދަ ހަމަލާތަކެއް ދީފައިވެއެވެ. އެ ހަމަލާތަކުގައި، އެ ތަނުގައި ބޭނުންކުރާ "ހައި-ވޯލްޓޭޖް" ކޭބަލްތަކަކަށް ގެއްލުންވެ، އެއް ރިއެކްޓަރު ނިންވައިލާން ޖެހުނެވެ. އަދި، އިތުރު ރިއެކްޓަރަކުން ކަރަންޓު ކެނޑުނު ކަމުގައި ވެސް ޔޫކްރެއިނުން ބުނެފައިވެއެވެ.
އެއާ ޖެހިގެން އައި ދުވަހު ރަޝިޔާގެ ފައުޖުތަކުން ދިން ރޮކެޓް ހަމަލާތައް އަމާޒުވެފައި ވަނީ، އެ ޕްލާންޓުގެ "ޑްރައި ސްޓޯރޭޖް ފެސިލިޓީ"އަށް ކަމުގައި ޔޫކްރެއިނުން ބުނެއެވެ. އަދި، އެ ތަނުގައި 174 ކޮންޓެއިނަރު ފުރެންދެން، ބޭނުންކޮށްފައިވާ "ނިއުކްލިޔަރ ފިޔުލް" ހުރި ކަމުގައި ވެސް ޔޫކްރެއިނުން ބުނެއެވެ. ރަޝިޔާއިން ބުނަނީ، އެ ޕްލާންޓަށް ހަމަލާ ދީފައި ވަނީ ޔޫކްރެއިނުގެ ސިފައިން ކަމުގައެވެ.
ޒަޕޮރީޜިޔާއަށް ދީފައިވާ ހަމަލާތަކާ ގުޅިގެން ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވަނީ، ރަޝިޔާގެ އަމަލުތައް ކުށްވެރި ކުރައްވާފައެވެ. މި ހަމަލާތަކަކީ "ނިއުކްލިޔަރ ޓެރެރިޒަމް"ގެ ގޮތުގައި އޭނާ ވަނީ ސިފަ ކުރައްވާފައެވެ. އަދި، ރަޝިޔާގެ އަމަލުތައް ހުއްޓުވުމަށް ފިޔަވަޅުތަކެއް އެޅުމަށް އޭނާ ވަނީ ބައިނަލްއަޤްވާމީ މުޖުމަތަޢަށް ގޮވައިލައްވާފައެވެ.
ވިލާތުގެ ކައުންސިލުގެ ރައީސް ޗާލްސް މިޝެލްއަށް ފޯނުން ގުޅުއްވައި ވާހަކަފުޅު ދައްކަވަމުން ޒެލެންސްކީ ވިދާޅުވީ ޒަޕޮރީޜިޔާ ޕްލާންޓަށް ރަޝިޔާއިން ދެމުންދާ ހަމަލާތަކާ ގުޅިގެން އެ ޤައުމުގެ ނިއުކްލިޔަރ ހަތަކަ އުފެއްދުމުގެ ސިނާޢަތާ ދެކޮޅަށް ދަތިކުރުމުގެ ހަރުކަށި ފިޔަވަޅުތަކެއް އަޅަން ޖެހޭ ކަމުގައެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ ފެބުރުއަރީ 24 ވަނަ ދުވަހުއެވެ. އަދި، ޖެހިގެން އައި މާރިޗު މަހުގެ ތެރޭގައި ރަޝިޔާގެ ފައުޖުތަކުން ވަނީ ޒަޕޮރީޜިޔާގެ ނިއުކްލިޔަރ ޕްލާންޓު ވެސް ހިފާފައެވެ. އެއީ، ވިލާތުގެ ޤައުމުތަކުގެ ހުރި އެންމެ ބޮޑު ނިއުކްލިޔަރ ހަކަތަ އުފައްދާ ޕްލާންޓެވެ.
އެ ތަނަށް ހަމަލާދެމުންދާތީ އެޓޮމިކް ހަކަތައާ ބެހޭ ބައިނަލްއަޤްވާމީ އޭޖެންސީ (އައި.އޭ.އީ.އޭ)އިން ވަނީ ކަންބޮޑުވުން ފާޅުކޮށްފައެވެ. އެ ޖަމުޢިއްޔާގެ ޑިރެކްޓަރ ޖެނެރަލް ރަފަޔަލް މަރިއޯނާ ގްރޮޓްސީ ވިދާޅުވީ، މި ހަމަލާތަކާ ގުޅިގެން ޔޫކްރެއިނުގައި ނިއުކްލިޔަރ ކާރިސާއެއް ހިނގުމުގެ ބިރު އިތުރުވަމުންދާ ކަމުގައެވެ.