އިސްރާއީލުން ފަލަސްތީނަށް ދެމުންދާ ހަމަލާތައް ދިވެހި ސަރުކާރުން ކުށްވެރިކޮށްފިއެވެ.
ދިވެހި ސަރުކާރުން ނެރުނު ބަޔާނެއްގައި ވިދާޅުވީ އިސްރާއީލުން ވެރިވެގެން އުޅޭ ފަލަސްތީނުގެ ގާޒާއަށް އިސްރާއިލުން ހަމަލާދީ، ކުށެއް ނެތް އާއްމުންގެ ބަޔަކު ޝަހީދުކޮށްލި އަނިޔާވެރި އަމަލު ކުށްވެރިކުރާކަމަށެވެ. އަދި މި ހަމަލާތަކުގައި ޝަހީދުވި ފަލަސްތީނުގެ ރައްޔިތުންގެ އާއިލާތަކަށް އިހްލާސްތެރިކަމާއެކު ތައުޒިޔާ ވިދާޅުވާކަމަށް ދިވެހި ސަރުކާރުގެ ބަޔާނުގައިވެއެވެ.
ދިވެހި ސަރުކާރުގެ ބަޔާނުގައި ފަލަސްތީނުގެ ހަތިޔާރެއް ނެތް އަންހެނުންނާއި ކުޑަކުދިންނާއި ދެކޮޅަށް ހާލަތާއި ނުބައްދަލު ބާރުގެ ބޭނުންކޮށްގެން ހިނގާ އަމަލުތަކާއިމެދު ވަރަށް ބޮޑަށް ކަންބޮޑުވާކަމަށެވެ. އަދި އިސްރާއިލުން ފަލަސްތީނުގެ ބިންތަކަށް ވެރިވެގެން އުޅެނީ ބައިނަލްއަޤްވާމީ މުއާހަދާތަކާއި ޤާނޫނުތަކާއި ހިލާފަށްކަމަށް ދިވެހި ސަރުކާރުން ބުނާ ބުނުން ވަނީ މި ބަޔާނުގައި ތަކުރާރުކުރައްވާފައެވެ.
ސަރުކާރުގެ ބަޔާނުގައި ވިދާޅުވީ އިސްރާއީލާއި ފަލަސްތީނުގެ މައްސަލައަށް ސުލްހަވެރި ހައްލެއް ލިބިގެންދާނީ ފަލަސްތީނުގެ މިނިވަން ދައުލަތެއް ޤާއިމްކުރެވިގެންކަަމަށެވެ. އަދި ރާއްޖެއިން އަބަދުވެސް އޮންނާނީ ފަލަސްތީނުގެ ރައްޔިތުންނާއެކުކަމުގެ ޔަގީންކަން ދިވެހި ސަރުކާރުން ނެރުނު ބަޔާނުގައި ދެއްވާފައިވެއެވެ.
ޔަހޫދީ އިސްރާޢީލުން ޣައްޒާއަށް ބޮން އަޅައި، މިދިޔަ ދެ ދުވަހުގެ ތެރޭގައި މުސްލިމުންގެ 24 މީހުން ވަނީ ޝަހީދު ކޮށްލާފައެވެ. ޔަހޫދީންގެ ވަރުގަދަ ވައިގެ ހަމަލާތަކުގައި ޝަހީދުވެފައިވާ މީހުންގެ ތެރޭގައި 6 ކުޑަކުދިން ވެސް ހިމެނެއެވެ. އަދި، މި އުދުވާންތަކުގައި 203 އަށްވުރެ ގިނަ މީހުން ވަނީ ޒަޚަމް ކޮށްލާފައެވެ.