އަނިޔާވެރިގޮތަކަށް ހ.ޝީރީންވިލާގައި މަރާލާފައި އޮތްވާ ރޭ ފެނުނު ޝިއާއު މުހައްމަދު ސައީދުގެ މަރުގެ ތުހުމަތު ކުރެވޭ އަލީ ޝާހިލް ހައްޔަރުކުރިއިރު ހުރީ މަސްތުގެ ހާލަތުގައިކަމަށް ފުލުހުން ވިދާޅުވެއްޖެއެވެ.
ފުލުހުން މިކަން ހާމަކޮށްފައިވަނީ ޝިއާއު މުހައްމަދު ސައީދުގެ މަރާއި ގުޅިގެން ނޫސްވެރިންނަށް މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ.
ނޫސްވެރިންނަށް މައުލޫމާތު ދެއްވަމުން ފުލުހުންގެ މޭޖަރ ކްރައިމް އިންވެސްޓިގޭޝަންގެ ހެޑް، ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ހ. ޝީރީންވިލާގައި މީހަކު މަރާލާފައި އޮތްކަމުގެ މައުލޫމާތު އާއްމު މީހެއްގެ ފަރާތުން ފުލުހުންނަށް ރިޕޯޓްކޮށްފައިވަނީ ރޭ 11:28 ހާއިރުކަމަށެވެ. އަދި އެތަނަށް ފުރަތަމަދިޔަ ފުލުހުންގެ ޓީމުން ހެކި ރައްކާތެރިކޮށް، ވަގުތުން ތަހުޤީޤް ފެށިކަމަށް ޝިފާއު ވިދާޅުވިއެވެ.
ޝިފާއު ވިދާޅުވީ މަރާލާފައި އޮތް މީހާ ފެނުނު އެޕާޓްމަންޓުން 22 އަހަރުގެ ދިވެހި ފިރިހެނެއް ހައްޔަރުކުރިކަމަށާއި، ހައްޔަރުކުރީ ފ.ނިލަންދޫ ފިނިފެންމާގޭ އަލީ ޝާހިލްކަމަށެވެ. އަދި އަންހެން ކުއްޖާ އަނިޔާވެރި ގޮތަކަށް މަރާލާފައިވާއިރު، އަންހެން ކުއްޖާގެ އާއިލާގެ އެދުމަކަށް އޭނާއަށް ލިބިފައިވާ އަނިޔާތަކުގެ ތަފްސީލް ހާމަ ނުކުރަން ފުލުހުން ނިންމާފައިވާކަމަށްވެސް ޝިފާއު ވިދާޅުވިއެވެ.
ޝިފާއު ވިދާޅުވީ އަންހެން ކުއްޖާ މަރާލަން ބޭނުންކުރިކަމަށް ބެލެވޭ ހަތިޔާރުތަކެއް ހޯދާފައިވާކަމަށާއި، އަދި އަންހެން ކުއްޖާގެ ހަށިގަނޑުގެ ޕޯސްޓްމޯޓަމެއް ހެދުމަށް ނިންމާފައިވާކަމަށެވެ. މީގެއިތުރުން ކުށުގެ ތުހުމަތުކުރެވޭ ފަރާތް ކޯޓަށް ހާޒިރުކޮށް ޝަރީއަތް ނިމެންދެން ބަންދުކޮށްފައިވާއިރު، މިހާތަނަށް އައިއިރު އޭނާ ކުށަށް އިިއުތިރާފްވެފައި ނުވާކަން ފުލުހުން ފާހަގަކުރެއެވެ. ފުލުހުން ވިދާޅުވީ މިމައްސަލައިގެ ތުހުމަތުގައި ޝާހިލް ހައްޔަރުކުރިއިރުވެސް އޭނާ ހުރީ މަސްތުގެ ހާލަތުގައިކަމަށާއި، އަދި މިމައްސަލައިގައި އޭނާ ނޫން އިތުރު މީހަކަށް ތުުހުމަތު ނުކުރެވޭކަމަށެވެ.
ފުލުުހުން ވިދާޅުވީ މިހާތަނަށް އައިރު ބައެއް މީޑިއާތަކުން އަންހެން ކުއްޖާގެ މަރާއި ގުޅިގެން ހަޤީޤަތާއި ހިލާފު ވާހަކަތައްވެސް ފަތުރަމުންދާކަމަށެވެ. އެގޮތުން އެ ދެ މީހުން ކައިވެނިކޮށްގެން އުޅޭކަމަށް ބުނާ ވާހަކައަކީވެސް ހަގީޤަތާއި ހިލާފު ވާހަކަތަކަކަށްވާއިރު، ކުށުގެ ތުހުމަތު ކުރެވޭ މީހާގެ ކުށު ރެކޯޑް އޮންނަކަމަށް ބުނާ ވާހަކަވެސް ފުލުހުން ދޮގުކުރެއެވެ.