ކުޑަގިރި ޕިކްނިކް އައިލެންޑް އާންމުންނަށް ހުޅުވާލުން ފަސްކޮށްފިއެވެ. ސަރުކާރުން ވިދާޅުވީ ކުޑަގިރި ހުޅުވުން ފަސްކޮށްފައިވަނީ ރަށުގައި އިތުރު ފެސިލިޓީތައް ޤާއިމުކުރުމާއި ރަށް ފެހިކުމުގެ މަސައްކަތް ކުރުމަށްކަމަށެވެ.
ކުޑަގިރި ތަރައްޤީކުރުމުގެ މަސައްކަތަކީ، މާލެކައިރިން ދަތުރު ދާނެ ރަށެއް ހަމަޖައްސަވައިދެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވެވަޑައިގެން ވަޢުދުފުޅާއެކު ފެށްޓެވި މަޝްރޫޢުއެކެވެ.
މިއީ މާލެ ކައިރީގައި ހިއްކައިގެން ހަދާފައިވާ 8 ހެކްޓަރުގެ ރަށެކެވެ. އަދި ރަށާ އިންވެގެން 1.5 ހެކްޓަރުގެ ކުޑަ ފިނޮޅެއްވެސް ވަނީ ހަދާފައެވެ. ސުމަކުން ފެށި މި މަޝްރޫޢުގެ މުހިންމު މަސައްކަތްތައް ނިންމައި ކުރިން ތާވަލު ކުރީ މިނިވަން ދުވަހު، ރަށް އާންމުންނަށް ދަތުރުދިއުމަށް ހުޅުވާލުމަށެވެ.
މިއީ މާލެއިން ލޯންޗުގައި ދިހަވަރަކަށް މިނެޓުން ދެވޭހާ ކައިރީގައި ހަދާފައިވާ ރަށެކެވެ.
އަދި އެކަމަށް ވާންޖެހޭ ފުރިހަމަ ތައްޔާރީތައް، އެ މަސައްކަތާ ހަވާލުވެ ތިބި ސަރުކާރު ޙިއްސާވާ ކުންފުނިތަކުން އަންނަނީ ވަރަށް ފޯރީގައި ކުރަމުންނެވެ.
ރަށް ހިއްކުމުގެ މަސައްކަތްތާއި ފަސްގަނޑު ޙިމާޔަތް ކުރުމަށް ރަށުގެ ވަށައިގެން އެކި ސަރަޙައްދުތަކުގަިއ ބޮޑު ހިލަ ޖެހުމާއި، މޫދަށް އެރޭ ސަރަހައްދުތަކާއި ގޮނޑުދޮށް ހެދުމުގެ މަސައްކަތްތައްވެސް ވަނީ ނިމިފައެވެ.
އަދި ރަށަށް ބޭނުންވާ ކަރަންޓާއި ފެނާއި ނަރުދަމާގެ ޚިދުމަތްތަކުގެ ވިއުގަތައްވެސް މިހާރު ވަނީ އަޅާފައެވެ.
ސަރުކާރުން ޕްލޭން ކުރީ ޕިކްނިކް އައިލެންޑްގެ ފުރަތަމަ ފިޔަވަހީގައި ހިމަނާފައިވާ، އަސާސީ ޚިދުމަތްތައް ޤާއިމުކޮށް ރަށް ދަތުރުދިއުމަށް ހުޅުވާލުމަށެވެ.
އެގޮތުން ފްރަންޓް އޮފީހަކާއި އިންޖީނުގެއާއި މިސްކިތާއި ދަތުރުދާ މީހުން ބޭނުންކުރުމަށް 15 ހަޓްވެސް ވަނީ ހަދާފައެވެ. އަދި އާއްމު ފާޚާނައެއްވެސް ހަދާފައިވެއެވެ.
ބިން ހިއްކުމުން ފެށިގެން މިހާތަނަށް ކުރިއަށްގެންދިޔަ މަސައްކަތްތަތަކީ 6 މަސް ދުވަހުގެ މަސައްކަތްކެވެ.
ޕްލޭނިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ޕީއެސްއެމް ނިއުސްއަށް ވިދާޅުވީ، ޕިކްނިކް އައިލެންޑް އާއްމުންނަށް ހުޅުވާލުން ފަސްކޮށްފައި ވަނީ އާއްމުންނަށް ހުޅުވާލުމުގެ ކުރިން އެތަނުގައި އިތުރަށް ޤާއިމުކުރަންޖެހޭ ބައެއް ފެސިލިޓީތަކުގެ މަސައްކަތް ކުރުމަށްކަމަށެވެ. ޚިދުމަތްތައް އިތުރަށް ފުރިހަމަ ކުރުމުގެ އިތުރުން، އެންމެބޮޑު އެއް ބޭނުމަކަށްވީ ގަސް އިންދައި ރަށް ފެހިކުރުންކަމަށް އަކްރަމް ވިދާޅުވިއެވެ.
ޕިކްނިކް އައިލްންޑް ފެހިކުރުމަށް، އެރަށުގައި ގަސް ހެއްދުމު ގިނަ ޕްރޮގްރާމްތަކެއް މިހާތަނަށްވެސް ކުރިއަށް ގެންގޮސްފައިވެއެވެ. ނަމަވެސް މިއީ ހިއްކި ބިމަކަށްވުމުން، މި މަސައްކަތަށް އިތުރަށް ދުވަސް ބޭނުންވެއެވެ.
އަކްރަމް ވިދާޅުވީ ރަށް އިތުރަށް ފެހިކޮށް، މާ ލަސްތަކެއް ނުވެ ރަށް ހުޅުވާލެއްވުމަށް ސަރުކާރުން މަސައްކަތް ކުރައްވާނެކަމަށެވެ. އަދި އެ ތާރީޚުތައް ފަހުން އިޢުލާނު ކުރައްވާނެކަމަށެވެ.
ޕިކްނިކް އައިލެންގެ މަސައްކަތް ކުރަނީ ސަރުކާރުގެ 5 ކުންފުންޏެއް ގުޅިގެންނެވެ.
ޕިކްނިކް އައިލެންޑްގެ މާސްޓަރ ޕްލޭން ތައްޔާރު ކުރީ ހައުސިން ޑިވެލޮޕްމަންޓް ކޯޕަރޭޝަން އެޗްޑީސީންނެވެ. ރަށް ތަރައްޤީކުރުމުގެ މަސައްކަތުގައި ދެން ބައިވެރިވަނީ އެމްޓީސީސީ، އެމްޑަބްލިއެސްސީ ފެނަކަ އަދި ސްޓެލްކޯއެވެ.