2021 ވަނަ އަހަރުގެ ދިރާސީ އަހަރުގެ ކިޔެވުން ނިމި، ސްކޫލް ދަރިވަރުންގެ ޗުއްޓީ ފެށިއްޖެއެވެ.
މިއަހަރުގެ ދިރާސީ އަހަރުގެ ކިޔެވުން މިއަދު ނިމިފައިވާއިރު، ސްކޫލްތަކުގައި މިއަދު ވަނީ ރިޕޯޓްވެސް ހަވާލުކޮށްފައެވެ.
92000 އަށްވުރެ ގިނަ ދަރިވަރުންނާއިއެކު 2021 ވަނަ އަހަރުގެ ދިރާސީ އަހަރުގެ ކިޔެވުން ނިންމާލާފައިވާއިރު، މިއީ ރާއްޖޭގެ ތަޢުލީމީ ޙަޔާތުގައި އަހަރެއްގެ މެދުތެރެއިން ދިރާސީ އަހަރުގެ ކިޔެވުން ފަށައިގެން ނިންމާލި ފުރަތަމަ ފަހަރެވެ. އަހަރުގެ މެދުތެރެއިން ކިޔެވުން ފެށުން ނަމަވެސް ކިޔަވައިދިނުން ކުރިއަށް ގެންގޮސްފައިވަނީ އެހެން އަހަރުތަކެކޭވެސް އެއްފަދައިން 2 ޓާމަށް ބަހާލައިގެން އެކަޑަމިކް ކަލަންޑަރުގެ ތާވަލާ އެއްގޮތަށެވެ.
ދިރާސީ އަހަރުގެ ކިޔެވުން 2 ޓާރމަށް ކުރިއަށް ގެންދިޔައިރު ފުރަތަމަ ޓާރމްގެ ކިޔެވުން މިދިޔަ އަހަރުގެ އޯގަސްޓް މަހުގެ 10 ވަނަ ދުވަހުން ފެށިގެން ޑިސެމްބަރު މަހުގެ 23 ވަނަ ދުވަހުގެ ނިޔަލަށް ވަނީ ކުރިއަށް ގެންގޮސްފައެވެ. އަދި ދެވަނަ ޓަރމްގެ ކިޔެވުން މިއަހަރުގެ ޖެނުއަރީމަހުގެ 16 ވަނަ ދުވަހުން ފެށިގެން މިއަދު މިވަނީ ނިމިގެންގޮސްފައެވެ.
ކޯވިޑް-19ގެ ހާލަތާ ގުޅިގެން ވޭތުވެދިޔަ ދޮޅު އަހަރެއްހާ މުއްދަތު ވެގެންދިޔައީ ތަޢުލީމީ ނިޒާމަށް ދަތި އަހަރަކަށެވެ. ސްކޫލަށް ހާޒިރުނުވެވުމުގެ ސަބަބުން ތަޢުލީމުގެ އިތުރަށް ދަރިވަރުންނަށް ބޭނުންވާ އިތުރު ހަރަކާތްތަކުން މަހުރޫމުވެ ގޭ ބަންދުގަ ތިބެންޖެހުނު އަހަރަކަށެވެ. އެހެންނަމަވެސް ނިމިގެން މިދިޔަ ދިރާސީ އަހަރަކީ ވަރަށް ކާމިޔާބުކަމާއިއެކު ނިންމާލެވުނު ދިރާސީ އަހަރެކެވެ.
އަހަރުގެ ކިޔެވުން ނިމުނުއިރު އެޑިއުކޭޝަން މިނިސްޓްރީން މިހާރު ވަނީ އަންނަ އަހަރުގެ ދިރާސީ އަހަރަށް ބޭނުންވާ ފޮތްތައް ސްކޫލްތަކަށް ދޫކުރަން ފަށާފައެވެ.
ކުރިއަށް އޮތް ދިރާސީ އަހަރުގެ ކިޔެވުން ފެށުމަށް ހަމަޖެހިފައިވަނީ އޯގަސްޓް މަހުގެ 7 ވަނަ ދުވަހުއެވެ. އެ އަހަރުގެ ފުރަތަމަ ޓާރމްގެ ކިޔެވުން ނިމޭނީ ޑިސެންބަރު މަހުގެ 22 ވަނަ ދުވަހުއެވެ. އަދި ދެވަނަ ޓަރމްގެ ކިޔެވުން އަންނަ އަހަރުގެ ޖެނުއަރީ މަހުގެ 8 ވަނަ ދުވަހު ފަށާއިރު ދެވަނަ ޓާމްގެ ކިޔެވުން ނިމޭނީ ޖޫންމަހުގެ 22 ވަނަ ދުވަހުއެވެ.